По вчерашните долги и како што самиот ги нарече, продуктивни телефонски разговори со Путин и Зеленски, Трамп вели дека најважно е што сите сакаат мир, без да открие колку тој ќе чини за Украина или за Русија.
-Мислам дека сме на пат да донесеме мир. Мислам дека претседателот Путин сака мир, претседателот Зеленски сака мир и јас сакам мир. Само сакам да видам да заврши убивањето луѓе. , изјави Доналд Трамп, претседател на САД.
Она што го откри во Овалната соба е дека стои зад ставот на Путин дека местото на Украина не и е во НАТО и дека планира директни средби со рускиот, но не и со украинскиот претседател.
-Очекуваме дека тој (Путин) ќе дојде овде, а јас да одам таму, но најверојатно ќе се сретнеме во Саудиска Арабија за прв пат. Дали се обврзaвте да одите во Украина? Не, не се обврзав да одам во Украина. , изјави Трамп.
Освен пораките од Кремљ дека Москва веќе ги подготвува преговарачките тимови, Путин засега јавно не се огласува. Украинскиот претседател Зеленски пак, се надева дека во посредство на Трамп ќе се обезбеди траен мир.
-Претседателот Трамп ме информираше за тоа што му кажал Путин. Веруваме дека силата на Америка, заедно со Украина и сите наши партнери, е доволна за да ја принуди Русија на мир. , изјави Володимир Зеленски, претседател на Украина.
Но, колкава цена ќе треба да плати Украина за мирот, која во моментов не контролира 20 проценти од територијата? Американскиот министер за одбрана јавно соопшти дека враќањето на Украина на границите од минатото се тешко возможни.
-И ние, како и вие сакаме суверена и просперитетна Украина, но мораме да признаеме дека враќањето на границите од 2014 година е нереална цел. , изјави Пит Хегсет, секретар за одбрана на САД.
Хегсет подоцна уверуваше дека зад обидите на САД за примирје не се крие предавство на Украина, но пораките од Вашинтон веќе ги разбрануваа европските земји, кои порачуваат дека Русија не смее да биде наградена за нејзината агресија.
-Администрацијата на Трамп веќе направи јавни отстапки во корист на Путин пред преговорите воопшто да почнат. Според мене, на преговарчка маса би било подобро да се зборува за можното членство на Украина во НАТО или за евентуалното губење територии. , изјави Борис Писториус, министер за одбрана на Германија.
Тајмингот на вчерашниот разговор на Трамп со Путин и Зеленски се совпадна и со деталите од наводниот план на Трамп, кој неодамна го објави украинскиот портал „Страна“, а чија автентичност не е потврдена. Во текстот се вели дека веќе во март се предвидени средби меѓу Трамп, Путин и Зеленски, на Велигден да биде прогласено примирје, а на 9 мај конечен крај на војната. Украина да остане надвор од НАТО, а да добие членство во ЕУ, но и да се откаже од враќање на окупираните територии, без да го признае рускиот суверенитет.