"Време е Џо Бајден да поднесе оставка поради она што се случи во Авганистан. Тоа не треба да биде голема работа со оглед на тоа што тој не беше легитимно избран", рече Трамп, критикувајќи го Бајден за ситуацијата во Авганистан, но и порастот на случаи на коронавирус во САД, имигрантската, економската и енергетската политика.

Тој тврди дека повлекувањето од Авганистан би било многу поинаку и многу поуспешно доколку тој бил претседател.

„Ова ќе биде запаметено во историјата како еден од најголемите порази во американската историја“, рече Трамп.

Бајден ја бранел својата одлука овој викенд да ги повлече американските војници, велејќи дека американското присуство во Авганистан во последните 20 години не е прифатливо.

"Уште една година, или уште пет години американско воено присуство нема да направи разлика. Бескрајното присуство на САД среде граѓански конфликт во друга земја за мене не беше прифатливо ", рече Бајден.

Да потсетиме, Талибанците вчера влегоа во Кабул и ја окупираа претседателската палата, откако претседателот избега во Узбекистан.

Портпаролот на Талибанците, Мохамед Наим, рече дека војната во Авганистан е завршена, дека сакаат да имаат односи со меѓународната заедница и дека сакаат да го постигнат тоа преку дијалог. "Го постигнавме она што го сакавме, а тоа е слобода на нашата земја и независност на нашиот народ. Подготвени сме да разговараме со сите фактори во земјата и да им ја гарантираме потребната заштита", рече Наим, додавајќи дека талибанците го почитуваат правата и слободата на жените и малцинствата и изразување во рамките на шеријатското право.

Повеќето странски дипломати биле евакуирани веднаш, а на аеродромот во Кабул владее хаос. Илјадници луѓе очајно се обидуваат да избегаат.