Трајчулески: Државата е во финансиска агонија, буџетот се распаѓа, владата трупа нови долгови - Канал 5

Македонија

Трајчулески: Државата е во финансиска агонија, буџетот се распаѓа, владата трупа нови долгови

Денес на дневен ред, по скратена постапка, имаме закон за задолжување на државата во износ од 260 милиони евра кај комерцијални банки.

Трајчулески: Државата е во финансиска агонија, буџетот се распаѓа, владата трупа нови долгови

И уште на самиот почеток би сакал да истакнам дека најодговорниот човек во државата, кој треба денеска да биде тука во Собранието и да објасни не само пред народните избраници, туку и пред македонските граѓани по однос на овој заем – денеска го нема тука во Собранието.

Тоа е министерката за финансии, која држеше беседи и делеше покани преку Фејсбук по однос на разрешување на одредени прашања и објаснувања. Меѓутоа денеска гледаме како таа гордо, комитски избега од оваа седница, каде што треба да се дадат клучните одговори на прашањата кои ги загрижуваат граѓаните, затоа што денес зборуваме за народни пари, односно за пари на граѓаните

Втора работа која ја одбележува оваа седница и овој закон е бруталното кршење на процедурите во Собранието. И на овој начин уште еднаш се докажува дека кога се пари во прашање, кога буџетот е во ваква кризна ситуација каква што е, власта е спремна на сè и на целосно прекршување на Деловникот, правилата и процедурите во Собранието.

И оваа фактура оди на сметка на претседателот на Собранието, затоа што ниту во политиката, ниту во економијата не постои ручек без да биде платен. И оваа фактура уште еднаш оди кај претседателот на Собранието.

И ако направиме аналогија, ако денеска имавме друг Деловник за работа во Собранието, како што беше тој во 2012 година, јас очекувам дека на ист начин ќе бевме исфрлени денеска од Собранието само за да помине овој закон и ова задолжување.

Понатаму да одиме на она што значи суштина. А суштината е дека ова не е нешто што не беше очекувано, затоа што ние неколку пати укажувавме – и кога се носеше Буџетот за 2025 година и кога се носеше Буџетот за 2026 година – на целосно погрешното буџетско планирање од страна на Министерството за финансии.

Укажувавме на тоа дека приходната страна вештачки се напумпува за да се стави во корелација со дефицитот. Укажувавме на сите овие работи кои денеска ни се случуваат, а за волја на вистината и Фискалниот совет во мислењето за стратегијата укажува:

„Најновите истражувања на ММФ покажуваат дека, поаѓајќи од оптимистичките проекции на јавните приходи и повисоките тековни расходи, додека инвестициите во инфраструктурата задоцнуваат, буџетските дефицити ги преминуваат поставените таргети и граници. Создадената разлика ја намалува фискалната дисциплина и ја редуцира сигурноста. Затоа, зајакнувањето на буџетскиот кредибилитет преку подобро предвидување, подобра контрола врз јавните расходи и подобрување на институциите помага во економската стабилност и развој.“

Она што го укажувавме претходно, денеска е ставено и во мислењето на Фискалниот совет.

На крајот на денот, ние можеме само дополнително да го потврдиме тоа и со бројки.

2025 година оваа Влада ја заврши со реализација на капитални расходи од нешто над 50%, или најнизок процент на реализација на капиталните инвестиции.

Ја заврши со долг кон приватните компании од страна на државата, по однос на завршени, а ненаплатени работи, над 600 милиони евра и дополнителен долг по однос на поврат на ДДВ од околу 150 милиони евра.

Кога ќе ги соберете сите овие средства, тие не можат да останат ненаплатени, односно обврските кон тие компании се префрлаат во оваа година, што значи дека притисокот врз буџетот и врз функционирањето станува уште посилен.

Исто така, би сакал да го спомнам и првичниот, најголем проект кој го најави Владата и кој го реализираше, а тоа се милијарда евра земени преку кредитот со Унгарија, кои беа наменети за покривање на стари долгови – 500 милиони, 250 милиони за општините и 250 милиони за компаниите.

Од 250 милиони за општините, според податоците кои ни се достапни, имаме реализација од околу 20%, што значи дека парите се веќе потрошени, меѓутоа компаниите за сработени работи ќе треба да чекаат година, две, три за да си ги земат парите, ако воопшто си ги земат.

И втората работа – 250 милиони кои беа наменети за компаниите како кредитна линија. Не успеавме да дознаеме ниту од Министерството за финансии, ниту од отчетната и транспарентна министерка, кои се компаниите што добиле кредити, за какви проекти ги добиле тие кредити и кои се индикаторите по однос на кои ќе се мери дали таа кредитна линија била успешна.

Затоа што на крајот на денот се работи за средства кои се субвенционирани од страна на државата, односно од парите на граѓаните, и граѓаните имаат право да знаат кој ги добил тие средства, за каков вид проекти и како тие средства се потрошени.

И уште на крај, по однос на самото задолжување – дали беше очекувано или не – да, беше очекувано.

Затоа што, почитувани колеги, имаме целосно нефункционални институции во државата, затоа што имаме целосно нефункционална Влада, односно носители на јавни функции.

Затоа што сега ако излезете низ Дебар Маало, кафаните се преполни со вашите директори и функционери, и ако не се на работа, тогаш значи дека ништо не се работи.

Затоа немаме ефикасно функционирање на институциите и затоа немаме ефикасна работа која ќе се рефлектира во економијата.

Или, на крајот на краиштата, ние две години не научивме како му поминува работниот ден на вицепремиерот Љупчо Димовски.

Во две години, освен што видовме дека Стоилковиќ функционира како културен центар на Србија во Македонија, не видовме никаква друга активност.

Во земја која велиме дека е земјоделска, дека е аграрна, ние немаме министер за земјоделие. Односно, поарно да го немавме отколку ваков, кој направи повеќе штета отколку ќар.

Или ако го земеме министерот за култура и туризам – пошто го збогативме тоа министерство, додадовме и туризам – човекот е како Алиса во земјата на чудата. Освен делот од туризмот што го користи до максимум, во другиот дел немаме ништо.

И на крајот на денот, сите овие алки во синџирот кои демонстрираат сериозна неефикасност, го даваат резултатот што го имаме денес.

И ова не е крај, туку ова задолжување денес е почеток на една финансиска агонија за оваа држава, која ќе видиме како на крајот ќе заврши.

Ви благодарам.

Oбраќање на пратеникот Митко Трајчулески од СДСМ

YouTube video

Скопје, 26.05.2026

СДСМ

Тагови: СДСМ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Хали Бери го прославува 60-тиот роденден со жешки фотографии: „Не ми е гајле што мислат другите луѓе“

Хали Бери денес наполни 60 години, а го одбележа својот роденден со објава на Инстаграм во која уште еднаш покажа дека нема намера да ги крие своите години.

Хали Бери го прославува 60-тиот роденден со жешки фотографии: „Не ми е гајле што мислат другите луѓе“

Актерката сподели серија фотографии и накратко рече дека не ѝ е гајле за мислењата на другите луѓе.

Објавата брзо го привлече вниманието на нејзините следбеници, кои најчесто ѝ честитаа во коментарите и ја пофалија нејзината самодоверба.

„Не ми е гајле што мислат другите луѓе“

Бери напиша покрај фотографиите: „Не ми е гајле што мислат другите луѓе“, а нејзината објава собра повеќе од 600.000 лајкови за само 17 часа откако беше објавена.

Коментарите беа исполнети со пораки за поддршка. „Ова е апсолутно совршено“, напиша еден следбеник, додека друг напиша: „Не ти е гајле за ништо! Продолжи така, @halleberry!“

Еден корисник го опиша нејзиниот потег како симбол на слобода и самодоверба, додека друг напиша: „Шеесет години никогаш не изгледале подобро!“

Со години, таа зборува за стареењето

Бери отворено зборуваше за притисокот што жените го чувствуваат во врска со стареењето и очекувањето дека треба да останат млади што е можно подолго. Таа беше особено гласна за прифаќањето на промените што доаѓаат со возраста и потребата жените да престанат да се обидуваат да изгледаат помлади по секоја цена.

Во колумна за Опра Дејли пред две години, таа ги повика жените да „престанат да се обидуваат да останат во своите 30-ти засекогаш и да си дозволат да бидат стари колку што сте“.

„Мора да се прифатиме себеси, да ги прифатиме нашите тела како што се менуваат и нашите простори како што се менуваат“, напиша таа во тоа време. „Благословени сме што сме тука. Вистинската самодоверба, сексапил и моќ доаѓаат од сознанието дека стануваме подобри со секоја измината година“.

Актерката, исто така, се осврна на идејата дека жените губат вредност како што стареат. „Општеството ни кажува дека откако ќе достигнеме одредена возраст, повеќе не сме вредни, витални или важни. Дека сме бескорисни“, рече таа. „Но, мора да се спротивставиме и да кажеме „не“. Ја отфрлам таа теорија“.

„Се чувствувам самоуверено, силно и секси“

Бери пред две години изјави дека со нетрпение очекува да остари.

„Се чувствувам како најдобрата верзија од себе и мислам дека ќе бидам уште подобра на 60 години“, рече таа. Таа, исто така, зборуваше за тоа како посветува поголемо внимание на своето здравје и долговечност, што, како што рече, ѝ дава чувство на контрола врз нејзиниот живот. „Се чувствувам самоуверено, силно и секси. Помудра и попаметна сум од кога било досега“, рече таа во тоа време.

Сега, на нејзиниот 60-ти роденден, се чини дека решила да го покаже својот став на Инстаграм.

Извор: Индекс.хр

Тагови: Хали Бери

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Технологија

„iPhone 18 Pro“ ќе биде многу поскап, но дали ќе има ист простор за складирање?

Се чини дека „iPhone 18 Pro“ би можел да биде значително поскап од сегашниот модел, а според новите извештаи, нема да има поголем основен капацитет за складирање.

„iPhone 18 Pro“ ќе биде многу поскап, но дали ќе има ист простор за складирање?

Тајванската истражувачка фирма „TrendForce“ проценува дека цената на компонентите за „iPhone 18 Pro“ ќе биде речиси 40 проценти повисока отколку за „iPhone 17 Pro“. И покрај ова, основниот модел на „iPhone 18 Pro“ наводно ќе има 256 GB внатрешна меморија, што моментално го нуди „iPhone 17 Pro“.

Ова значи дека капацитетот за складирање на моделот „Pro“ би изгледал вака:

• iPhone 16 Pro - 128 GB

• iPhone 17 Pro - 256 GB

• iPhone 18 Pro - 256 GB

„TrendForce“ не го спомена конкретно „iPhone 18 Pro Max“ во извештајот, но „Apple“ ги понуди моделите „Pro“ и „Pro Max“ со ист почетен капацитет за складирање за претходните две генерации, па се очекува дека истото би можело да важи и за новата генерација, објавува „MacRumors“.

Доаѓа повисока цена

Сепак, фактот дека основниот капацитет останува ист не значи дека цената ќе остане иста. Напротив, „TrendForce“ наведува дека зголемувањето на цените за моделот „iPhone 18 Pro“ е практично „неизбежно“, првенствено поради зголемените трошоци за компонентите.

Посебен проблем е меморијата. Цената на „RAM“ меморијата значително се зголеми поради моменталниот недостиг на мемориски чипови, додека се очекува цената на меморијата за складирање и новиот чип „A20 Pro“ исто така да се зголеми.

Според претходните информации, почетната цена на „iPhone 18 Pro“ во САД би можела да биде за 200 до 300 долари повисока од „iPhone 17 Pro“.

Во тој случај, „iPhone 18 Pro“ би можел да започне од дури 1.399 долари, додека почетната цена на „iPhone 18 Pro Max“ би можела да достигне 1.499 долари.

Извор: Б92

Тагови: iPhone 18 Pro

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Автомобилизам

Инвазија на роботакси во Европа – „Uber“ подготвува повеќе од 2.000 возила

„Uber“ и „Pony.ai“ денес објавија дека сакаат да воведат повеќе од 2.000 роботакси низ цела Европа и дека партнерството ќе се прошири на Блискиот Исток.

Инвазија на роботакси во Европа – „Uber“ подготвува повеќе од 2.000 возила

Двете компании веќе лансираа комерцијална услуга за роботакси во Загреб во март, каде што поддржаа 10 автономни возила од компанијата Верн, која е во сопственост на претприемачот Мате Римац, а новиот договор ќе воведе роботакси во уште четири европски градови кои сè уште не се наведени.

Голема флота што надминува 2.000 возила е важна за развојот на автономното возење бидејќи поголем број возила овозможува поголемо собирање податоци, поефикасно работење и полесен доказ за безбедноста пред регулаторите, објавува „CNBC“. Покрај тоа, поголемата достапност на роботакси може да охрабри повеќе корисници да почнат да го користат овој вид транспорт.

„Uber“ работи паралелно и со други кинески компании за автономно возење, како што е „WeRide“, со која планира пилот-програма за роботакси во Мадрид. „Waymo“ е светски лидер во оваа област, со возен парк од околу 5.000 возила, претежно во Соединетите Американски Држави.

„Waymo“ веќе тестира возни возила во Лондон и се подготвува да го прошири својот бизнис на други глобални пазари, а една од неговите цели е Токио. Целта на „Uber“ е да стане водечка светска комерцијална платформа за автономни возила, наместо самата да ја развива целата технологија за автономно возење.

Компанијата сака да ја користи својата платформа за поврзување на различни производители на роботски такси возила со корисниците, а во исто време да собира голема количина на податоци што можат да им помогнат на партнерите во понатамошниот развој на автономни системи.

Извор: Б92

Тагови: Uber

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер