Тероризам или предизборна манипулација: Србија пронајде експлозив крај гасоводот Турски тек, Виктор Орбан со порака – ситуацијата е сериозна - Канал 5

Балкан

Тероризам или предизборна манипулација: Србија пронајде експлозив крај гасоводот Турски тек, Виктор Орбан со порака – ситуацијата е сериозна

Обид за терористички напад или предизборен трик? Наводниот експлозив кој српскиот претседател откри дека бил пронајден во близина на гасоводот кон Унгарија дополнително ја вжешти атмосферата во земјата шест дена пред избори. 

Тероризам или предизборна манипулација: Србија пронајде експлозив крај гасоводот Турски тек, Виктор Орбан со порака – ситуацијата е сериозна

Унгарскиот премиер Орбан обвини дека станува збор за саботажа и најави дека војската ќе го чува гасоводот кој оцени дека е од клучно значење за енергетската стабилност на државата. Од Српско-Унгарската граница каде пристигна рано утринава порача дека не сака да впери прст кон никого, но посочи дека Украинците се единствените кои според него имаат можност и желба да го уништат гасоводот. Ги отфрли обвинувањата од опозицијата дека станува збор за лажна операција во соработка со Москва и Белград.

-Ако овој гасовод биде уништен унгарската економија ќе застане, а стотици илјади унгарски семејства ќе останат без гас. Затоа ова што се случи во Србија е многу сериозно. / Има обвинувања од опозицијата за соработка на Русите и Србите со вас за изборите? / И марсовците се вклучени секако. / Не би сакал да обвинам некоја земја, како на пример Украина без да ги знам фактите. Додека ги немаме сите факти не можеме да го направиме тоа. Но, нема сомнеж дека Украинците имаат такви способности и сакаат да направат такво нешто,- - Виктор Орбан – Премиер на Унгарија.

На обвинувњата од Орбан експресно реагираа властите во Киев кои отфрлија секаква одговорност. Тврдат дека станува збор за операција организирана од Москва со цел мешање во изборите. Унгарскиот опозициски лидер Петар Маѓар го обвини Орбан дека заедно со Вучиќ го исценирале инцидентот кој го нарече српска провокација. Му порача на политичкиот противник дека нема да ја спречи волјата на унгарските граѓани на изборите во недела.

-Сакам да му се обратам на Виктор Орбан. Треба да знаеш дека нема да можеш да ги спречиш изборите на 12 април со било какви цели. Ако ти или твојата пропаганда ја користите оваа српска провокација за изборни цели, тоа ќе биде отворено признание дека ова е однапред испланирана лажна операција,- - Петар Маѓар – Лидер на „Тиса“.

Срспките власти во меѓувреме, според најавите ги истражуваат сите аспекти на случајот, а претседателот Вучиќ откри дека станувало збор за два ранци со експлозив од како што кажа, разорна природа.

-На неколку стотина метри од гасоводот, турски, јужни или како сакате, балкански тек, пронајдени се колку што сфатив два ранци, два големи пакети со експлозив со фитили. Имаме и некои други траги за време на увидот. Пред малку разговарав со Виктор Орбан бидејќи ако дојдеше до прекин, Унгарија ќе немаше гас, а и ние на северот на Србија не би имале гас,- - Александар Вучиќ – Претседател на Србија.

Според последните анкети во Унгарија, партијата Фидес на актуелниот премиер Виктор Орбан се соочува со најголемиот предизвик во 16 годишното владеење со земјата. Иако исходот се уште е неизвесен поради големиот број на неопределени гласачи, според анкетите, опозициската партија „Тиса“ на Виктор Маѓар има водство од 56 проценти, за разлика од 37 проценти кои се изјасниле дека ќе гласаат за партијата на Орбан.

Тагови: Виктор Орбан гас

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Ќерката на Никол Кидман го оствари сонот што го имала на 16 години: „Плачев од среќа“

Ќерката на Никол Кидман, Сандеј Роуз, преку социјалните мрежи се осврна на еден од најголемите моменти во нејзината досегашна кариера.

Ќерката на Никол Кидман го оствари сонот што го имала на 16 години: „Плачев од среќа“

Младата манекенка се присети како, пред само две години, го гледала настанот „Vogue World“ со својата мајка и сонувала еден ден и самата да учествува во него. Оваа година, таа желба се оствари.

„Дојдов во Париз со мајка ми пред две години и се сеќавам дека слушнав оти токму тој ден се одржува ’Vogue World‘. Се вратив во хотелот и го гледав преносот на YouTube – сите тие прекрасни жени, музиката и целиот спектакл. Во Милано сфатив дека оваа година и самата ќе учествувам во шоуто. Мојата 16-годишна верзија ќе плачеше од среќа, а плачев и јас сега, на 18 години. Имам огромна среќа што можам да доживеам вакви работи и да запознаам толку многу луѓе“, напиша Сандеј на Инстаграм.

Оваа 18-годишна девојка учествуваше на ревијата „Vogue World“ за време на Модната недела во Милано во септември. Таа се појави во полупроѕирен бел фустан со длабоко деколте, широки ракави и лелеава силуета. Фустанот беше украсен со нежен цветен вез.

Советот на Никол Кидман за нејзината ќерка

Во интервју за ноемвриското издание на „Vogue“, Никол откри како ги советува своите ќерки додека тие растат под будното око на јавноста. Кога ја прашаа за омразата на интернет, осудувањето и нападите, таа одговори: „Едноставно се вртиш и си заминуваш. Зашто тоа ќе те скрши. Ќе те уништи“.

„Тоа многу ме плаши. Но, јас почнав да работам на 14 години, така што и немам многу право на глас“, додаде таа. Сандеј претходно зборуваше за магазинот „Nylon“ за правилата што нејзината мајка ги поставила во врска со нејзината кариера.

„Постојат две важни правила“, рече таа. „Првото беше дека не можев да работам во модната индустрија сè додека не наполнив 16 години. Второто е дека училиштето секогаш мора да биде на прво место. На почетокот тоа го мразев, но всушност мило ми е што постојат тие правила, бидејќи ми помагаат да останам цврсто на земја.“

Тагови: никол кидман

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Фридрих Мерц е во сериозни проблеми

Само 10% од Германците изјавиле дека се задоволни од работата на канцеларот Фридрих Мерц – што претставува најниска бројка во последните речиси 30 години – според анкетата „Deutschlandtrend“, за што известува порталот „Interia“.

Фридрих Мерц е во сериозни проблеми

На почетокот на септември, 13% од испитаниците ја оценувале работата на Мерц позитивно. Оваа нова бројка го означува најниското ниво во текот на целиот негов мандат како канцелар.

Доколку изборите за Бундестагот се одржеле на преминот од септември кон октомври, блокот CDU/CSU би можел да смета на 20% од гласовите. Тоа е за еден процентен поен помалку отколку на почетокот на септември.

Крајно десничарската партија „Алтернатива за Германија“ (AfD) доби најголема поддршка во анкетата, со 27%; нејзиниот рејтинг остана непроменет во текот на месецот. Зелените би освоиле 16%, Социјалдемократската партија на Германија (SPD) 13%, а партијата „Левица“ (Die Linke) 11%. Со 4% од гласовите, Слободната демократска партија (FDP) не би го достигнала изборниот праг од пет проценти.

Што се однесува до членовите на владата, министерот за одбрана Борис Писториус (SPD) доби значително подобри оценки од канцеларот: 50% од учесниците во анкетата биле задоволни или многу задоволни од неговата работа. Работата на министерот за надворешни работи Јохан Вадефул позитивно ја оцениле 34% од испитаниците, додека работата на министерот за внатрешни работи Александар Добринд добила позитивна оценка од 27%. Околу 20% од испитаниците биле задоволни од работата на вицеканцеларот и министер за финансии Ларс Клингбајл, додека приближно еден од шест испитаници бил задоволен од работата на министерката за труд Бербел Бас. И двајцата се членови на „SPD“.

Анкетата била спроведена кон крајот на септември од страна на институтот „Infratest dimap“. Истражувањето било спроведено преку телефон и интернет, користејќи репрезентативен примерок од 1.303 гласачи со право на глас.

Извор: Б92

Тагови: Фридрих Мерц

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

„Тајм“: Трамп го прашал „Грок“ што би се случило ако го уапси Мадуро

Американскиот претседател Доналд Трамп го прашал „Грок“ – чет-бот со вештачка интелигенција во сопственост на Илон Маск – како народот на Венецуела би реагирал на апсењето на тогашниот претседател Николас Мадуро.

„Тајм“: Трамп го прашал „Грок“ што би се случило ако го уапси Мадуро

Ова се случило неколку недели пред тој да нареди операција за негово приведување, открива списанието „Тајм“. Наводно, вештачката интелигенција му рекла на Трамп дека многумина во Венецуела веројатно би го прославиле падот на Мадуро.

Во декември 2025 година, Трамп се сретнал приватно со Маск во Овалната соба, каде што со часови го испрашувал „Грок“ за својот мандат и политичкото наследство. „Тајм“ ја заснова оваа информација на изјава од официјално лице кое присуствувало на средбата.

Едно од прашањата што Трамп му ги поставил на чет-ботот било како би реагирале Венецуелците доколку САД го уапсат Мадуро. Официјалното лице цитирано од списанието вели дека „Грок“ го опишал Мадуро како „репресивен и крајно непопуларен диктатор“ и проценил дека многумина во Венецуела навистина би можеле да го прослават неговиот пад.

Операција во Каракас

Еден месец подоцна, Трамп наредил операција за апсење на Мадуро. Американските сили го привеле него и неговата сопруга, Силија Флорес, за време на воена операција во Каракас на 3 јануари, а потоа ги префрлиле во Соединетите Држави.

Мадуро бил однесен во Њујорк, каде што се соочува со федерални обвиненија за трговија со дрога – обвинувања што тој ги негира. Кога некои Венецуелци навистина го прославиле апсењето, Трамп – според официјалното лице – заклучил дека „Грок“ е „генијален“.

Извор: Индекс.хр

Тагови: Доналд Трамп Николас Мадуро

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер