Здравје

СЗО: Доказите за поврзаност меѓу парацетамол и аутизам се неконзистентни, вакцините се безбедни

Трамп синоќа на прес-конференција во Белата куќа го поврза аутизмот со употребата на вакцини кај деца и со популарниот аналгетик Тајленол (парацетамол) кај бремените жени.

Светската здравствена организација (СЗО) денеска соопшти дека доказите за врска меѓу употребата на парацетамол за време на бременост и аутизам остануваат неконзистентни, додека вредноста на вакцините што спасуваат животи не треба да се доведува во прашање.

Американскиот претседател Доналд Трамп синоќа на прес-конференција во Белата куќа го поврза аутизмот со употребата на вакцини кај деца и со популарниот аналгетик Тајленол (парацетамол) кај бремените жени, вметнувајќи неосновани тврдења во здравствената политика на САД. Тој им порача на бремените жени и родителите да не го користат лекот, освен во случаи на екстремна треска, и предложи вакцините да не се даваат заедно или рано во животот на детето.

Доказите остануваат недоследни, изјави портпаролот на СЗО, Тарик Јашаревиќ, на прес-конференција во Женева, кога беше прашан за можна врска помеѓу употребата на парацетамол во бременоста и аутизмот.

- Знаеме дека вакцините не предизвикуваат аутизам. Вакцините, како што реков, спасуваат безброј животи. Значи, ова е нешто што науката го докажала и овие работи навистина не треба да се доведуваат во прашање, додаде тој.

И ЕМА и британските здравствени власти се согласуваат со СЗО

Европската агенција за лекови (ЕМА) и британските здравствени институции, како што пренесува Би-Би-Си, ја потврдија безбедноста на парацетамолот за време на бременост, оспорувајќи го предупредувањето на Трамп. „Достапните докази не пронајдоа врска меѓу употребата на парацетамол во бременост и аутизам“, наведе ЕМА во соопштение, нагласувајќи дека лекот може да се користи кога е потребен, но во најниска ефективна доза и фрекфентност. Британскиот регулатор вчера потврди дека е безбеден.

Американската администрација за храна и лекови (ФДА) издаде умерено упатство до лекарите да го ограничат користењето на ацетаминофен (активната состојка во Тајленол), но нагласи дека е најбезбедната опција за третман на треска и болка кај бремените жени, кои можат да го загрозат мајчинското и феталното здравје. „Иако многу студии опишуваат поврзаност меѓу ацетаминофен и аутизам, каузална врска не е утврдена, а постојат и спротивни студии“, наведе ФДА.

Медицински експерти остро против тврдењата на Трамп

Медицински експерти силно ги отфрлија тврдењата на Трамп, нарекувајќи ги опасни. Американското здружение на гинеколози и акушери (ACOG) изјави дека врската „не е поткрепена со целокупните научни докази и опасно ги поедноставува сложените причини за невролошки проблеми кај децата“. Студии не пронајдоа јасна врска меѓу разумната употреба на ацетаминофен во кој било триместар и проблеми во развојот на фетусот.

Ајсија Халадеј од Фондацијата за наука за аутизам изјави дека доказите не ја поддржуваат идејата дека Тајленол предизвикува аутизам, повикувајќи се на големи студии со контрола на генетската позадина што не пронајдоа поврзаност, пренесува Пи-Би-Ес. Епидемиологот Џенифер Нузо од Универзитетот Браун предупреди дека нелекувањето на треска во бременост може да биде штетно, а советите на Трамп се „неодговорни“ и базирани на избор на нискоквалитетни докази.

Производителот на Тајленол, Кенву, за Би-Би-Си изјави дека науката јасно покажува дека ацетаминофенот не предизвикува аутизам и изрази загриженост за здравствениот ризик за бремените мајки.

Левкорворин - лек за третман на симптоми на аутизам

Истовремено, ФДА вчера го одобри лекот левковорин (концентрирана форма на фолна киселина) за третман на симптоми на аутизам кај деца со одредени невролошки состојби, по мали студии што покажуваат подобрување на вербалните и социјалните вештини и намалена раздразливост. Сепак, експертите бараат поголеми клинички испитувања за потврда, бидејќи безбедносните податоци се ограничени. Министерот за здравство Роберт Ф. Кенеди помладиот вети проширување на пристапот до овој лек.

Аутизмот е спектар од состојби со различни нивоа на тешкотии во социјалната интеракција и комуникацијата, често поврзани со необични однесувања и сензорни реакции (според дефиницијата на СЗО). Преваленцата расте поради проширување на дефиницијата и подобра дијагностика, а не поради зголемена употреба на парацетамол. Генетиката игра главна улога, со стотици идентификувани гени, комбинирани со фактори како возраста на таткото, предвремено раѓање или мајчински инфекции.

Научници и здруженија за аутизам повторно ги отфрлија поврзаностите со вакцини, нагласувајќи дека се темелно тестирани и безбедни. „Деца ќе страдаат“ од овие тврдења, рече д-р Пол Офит од Детската болница во Филаделфија.

Трамп ја искористи студијата на деканот од Харвард за да го поврзе Тајленол со аутизам

Деканот на Факултетот за јавно здравје при Харвард, Андреа А. Бакарели, се сретнал со министерот за здравство и човечки услуги, Роберт Ф. Кенеди помладиот, и директорот на Националниот институт за здравство (НИХ), Џеј Батачарја, за да разговараат за неговата студија која го поврзува ацетаминофенот со аутизмот. Ова беше објавено во изјава од Бакарели, поставена на официјален профил на Белата куќа на социјалната мрежа Икс.

Бакарели, кој е коавтор на прегледна статија што ја поврзува употребата на ацетаминофен за време на бременост со аутизам кај децата, напишал до Белата куќа дека ја цени заинтересираноста на Кенеди и Батачарја. Изјавата потоа е објавена на Икс од страна на портпаролката на Белата куќа, како и од профилот на администрацијата „Рапиден одговор 47“.

Оваа изјава, која не беше објавена на веб-страницата на Харвардскиот факултет за јавно здравје, следеше по прес-конференцијата во Белата куќа, Трамп, придружуван од Кенеди и Батачарја, тврдеше дека изложеноста на ацетаминофен предизвикува аутизам кај децата. Иако Трамп не го спомена Харвард по име, комесарот за храна и лекови, Марти А. Макари, на прес-конференцијата цитираше студии од Харвард како доказ за тврдењето.

- Цитирајќи го деканот на Харвардскиот факултет за јавно здравје, постои причинско-последична врска меѓу пренаталната употреба на ацетаминофен и невроразвојните нарушувања како што се АДХД и нарушувањата од аутистичниот спектар, изјави Макари.

Трамп, исто така, рече дека лекот, познат и како Тајленол, земен за време на бременост, може да биде поврзан со „многу зголемен“ ризик од аутизам. „Не земајте Тајленол. Не го земајте“, рече тој. „Борете се со сите сили да не го земате“.

Изјавата на Бакарели, сепак, тврди само дека постои „можност за причинско-последична врска“ и повикува на понатамошни истражувања.

Објавен во август, прегледот на Бакарели на претходно објавени студии на луѓе беше финансиран со грант од НИХ, кој беше прекинат како дел од намалувањето на федералното финансирање за Харвард во износ од 2,2 милијарди долари. Деканот ја напиша статијата заедно со истражувачи од Маунт Синај, Универзитетот на Калифорнија во Лос Анџелес и Универзитетот на Масачусетс во Лоуел. Грантот на Бакарели беше вратен откако окружен судија на САД пресуди дека првичното намалување на администрацијата на Трамп е неуставно. Две недели по одлуката, парите од федералната влада почнаа да пристигнуваат во Харвард.

Според студијата на Бакарели, ацетаминофен користат повеќе од 50 проценти од бремените жени ширум светот за ублажување на треска и болка за време на бременост. Тоа е една од единствените опции, бидејќи другите средства за намалување на болката и треската имаат несакани ефекти, според Министерството за здравство и човечки услуги (ХХС).

„Како единствен одобрен лек за намалување на болката и треската за време на бременост, ацетаминофенот останува важна алатка за бремените пациенти и нивните лекари“, напиша Бакарели во својата изјава до администрацијата на Трамп, напоменувајќи дека високата температура исто така може да им наштети на мајките.

Портпарол на Факултетот за јавно здравје на Харвард одби да го коментира користењето на истражувањето од страна на Белата куќа, упатувајќи на соопштението за печатот на Бакарели.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ПИОМ: Пензиите се сигурни, нема ризик за исплатата и здравствените услуги

Исплатата на пензиите продолжува редовно, а здравствените права на пензионерите остануваат целосно обезбедени, уверуваат од Фондот за пензиско и инвалидско осигурување.

Реакцијата оттаму доаѓа по објавениот извештај на Државниот завод за ревизија во кој утврди слабости во начинот на пресметката и навремената уплата на придонесите за осигурениците во вториот пензиски столб. Ревизијата утврди и дека приходите од наплатен придонес за пензиско и инвалидско осигурување во 2024 година се зголемиле за 14 отсто но тоа не било доволно за полривање на расходите за пензии кои и понатаму бележат раст. Од ПИОМ велат и дека предмет на ревизија е 2024 година кога со фондот раководел кадар на претходната влада.

Бидејќи придонесот за здравствено осигурување на пензионерите се пресметува како процент од исплатената пензија и изнесува 11,8 проценти од нето исплатената пензија, а делот за вториот столб е 6 проценти од вкупните придонеси за пензиско осигурување, сосема очекувано е со растот на пензиите да се зголемува и обврската по овој основ кон Фондот за здравствено осигурување. Оттука, Фондот на ПИОМ нагласува дека зголемените обврски се директен резултат на повисоките пензии и подобриот животен стандард на пензионерите, а не последица на нарушена финансиска стабилност или нефункционирање на системот.

Околу стабилноста на вториот пензиски столб денеска реагираше и претседателот на СДСМ Венко Филипче. Повикувајќи се на изјава на премиерот Христијан Мицкоски дека корисниците на овој столб нема да бидат задоволни, Филипче тврди дека е оправдана загриженоста кај пензионерите.

Околу прашањатра поврзани со обврските и трансферите кон пензиските друшва од вториот столб, од ПИОМ истакнуваат и дека зголемувањето на овие обврски е директна последица на историски најголемото зголемување на пензиите во државата.

Македонија

Извори на Канал 5: Култура, спорт и односи меѓу заедницата ги презема Влен, ВМРО-ДПМНЕ здравство, социјала, евроинтеграции

Правда, култура, спорт, односи меѓу заедниците ги презема Вреди, ВМРО-ДПМНЕ ги добива здравство, социјална политика, евроинтеграции и вицепремиерското место за добро владеење, а земјоделство ќе оди кај ЗНАМ.

Ова неофицијално е досега договорено меѓу премиерот и коалиционите партнери за владина реконструкција. Извори на Канал 5 брифираат дека најверојатно владиниот тим ќе го напушти вицепремиерот Иван Стоилковиќ, министрите Цветан Трипуновски, Игор Филков, Борко Ристовски, Зоран Љутков и Фатмир Лимани.

Информациите засега никој не ги потврдува ниту демантира, но начелно постигнале согласност за рокада на овие ресори. Според лидерот на ЗНАМ, Максим Димитриевски, сите опции се на маса и треба да се согледаат грешките, но уверува дека односите во коалицијата се на највисоко ниво.

„ Сега во моментов разговараме само за министерските позиции, сите опции се отворени бидејќи треба да се слушнат сугестиите на владините партнери, но секако да се согладаат и сондажите на граѓаните колку тие се задоволни од реализација на проектите на одредени ресори. Ние не разговараме само за местата на ЗНАМ, туку за сите места во владата и реализацијата на владината програма во две години.“ - Максим Димитриевски – претседател на ЗНАМ

Неофицијално, конечна одлука за распределбата на ресорите ќе има вечерва, откако премиерот Мицкоски ќе се сретне со Димитриевски за да го прецизираат договорот, а потоа се очекува внатрепартиски да решаваат за новите имиња. Целиот процес на реконструкција во владата се најавува дека ќе заврши многу брзо, а според премиерот списокот до Собрание ќе биде доставен најдоцна до први јули. Тој потенцираше дека промената во кадрите нема да запре со министрите, туку следни се директорите кои во првите две години од мандатот на оваа влада не ги исполниле своите ветувања.

Македонија

Предлогот на Законот за кривичната постапка е објавен на ЕНЕР

Предлогот е усогласен со јуриспруденцијата на Европскиот суд за човекови права.

Министерството за правда го објави Предлогот на Законот за кривичната постапка на Единствениот национален електронски регистар на прописи (ЕНЕР), со што започнува јавната консултација за едно од најзначајните законски решенија во областа на правосудството.

Предлог-законот содржи решенија за унапредување на одредбите што се однесуваат на конфискацијата, правата на жртвите на кривични дела, мерките за пронаоѓање и обезбедување лица и предмети, електронските докази, посебните истражни мерки, финансиските истраги, увидот во списите, одржувањето рочишта и изведувањето докази на далечина, постапувањето по обвинителен акт, главната расправа, правните лекови, скратената постапка и други аспекти на кривичната постапка.

Предлогот е усогласен со јуриспруденцијата на Европскиот суд за човекови права, како и со меѓународните и европските стандарди. Воедно, законот е усогласен со 18 директиви на Европската Унија, особено во делот на процедуралните права на осомничените и обвинетите лица, правата на жртвите и конфискацијата.

Најзначајните новини во Предлогот на Законот за кривичната постапка се:

• Подобрување на одредбите за конфискација;

• Дигитализација на кривичната постапка;

• Ревидирање на одредбите за посебните истражни мерки;

• Унапредување на процедуралните права на осомничените и обвинетите лица, како и правата на жртвите согласно законодавството на Европската Унија;

• Усогласување со Законот за АРО, Законот за управување со конфискуван имот, имотна корист и одземени предмети во кривична и прекршочна постапка и Законот за исплата на паричен надоместок на жртви од кривични дела со насилство;

• Отстранување на недостатоците утврдени во досегашната практика.

Со предложените решенија се создава основа за поефикасна, потранспарентна и помодерна кривична постапка, усогласена со европските стандарди и потребите на современиот правосуден систем.

Тагови: Министерство за правда