Светската премиера на „Соларис“ на МНТ в петок на Виенскиот фестивал - Канал 5

Култура

Светската премиера на „Соларис“ на МНТ в петок на Виенскиот фестивал

Претставата „Соларис“ на Македонскиот народен театар в петок ќе има светска премиера во Виена на „Винер фествохен“ (Wiener Festwochen) - престижен фестивал кој е копродуцент на нашиот театарски проект во режија на Украинецот со меѓународна кариера Андриј Жолдак.

Светската премиера на „Соларис“ на МНТ в петок на Виенскиот фестивал

Нему ова му е втора соработка со МНТ по премиерата на „Електра“ во 2014 година. Овојпат режисерот, кого го нарекуваат Мејерхолд на новото време, го поставува на сцена истоимениот филозофски и научнофантастичен роман на Станислав Лем и се очекува повторно да ја покаже својата специфична театарска естетика.

Книгата на полскиот писател, која раскажува за залудните обиди за комуникација со животот на други планети во вселената, го инспирирала и режисерот Тарковски кој ја екранизираше во 1972, а филм „Соларис“ направи и Содерберг 30 години подоцна.

Сценскиот „Соларис“ на Жолдак е најавен како фасцинантна и опасна одисеја низ сеќавањата и искрените копнежи. Во најавата за македонската претстава, Виенскиот фестивал пишува дека „Соларис“ е еден вид повратен лет - патување од далечна ѕвезда во најдлабокото себе, во свет кој е помистериозен и од огромниот универзум.

За режисерот Жолдак, пак, „Винер фествохен“ наведува дека е автор кој не признава бариери, комбинира комедија дел арте со сајберпанк и научна фантастика, дека создава нагол и сигурен во себе театар кој понекогаш опасно непретпазливо се истура со енергија и имагинација. - Неговиот театар е чист бес, ја слави ирационалноста и достигнува до самите ѕвезди кои ја инспирираат неговата космогониска визуелна екстраваганција. Затоа и не изненадуваат неговите најнови продукции..., најавува фестивалот во програмата.

Подготовките на претставата траеја 40 дена и по светската премиера во комплексот MuseumsQuartiers (MQ) во австриската престолнина, скопската публика ќе ја види во септември. Жолдак, кој живее во Берлин и режира во повеќе европски центри (оваа година во Русија и Белгија), неодамна изјави дека е задоволен од соработката со ансамблот на МНТ. За нашиот театар рече дека станува можеби најдобар на Балканот, а за Македонија дека веќе е негов втор дом.





Во актерската екипа на „Соларис“ се: Дарја Ризова, Дејан Лилиќ, Александар Ѓорѓиоски, Славиша Кајевски, Драгана Левенска, Александар Михајловски, Борче Начев, Софиа Наевска-Трифуновска, Арна Шијак, од кои повеќето учествуваа и во „Електра“. Андриј Жолдак е автор и на сценографијата, заедно со Моника Пормале од Летонија, костимограф е Даниел Жолдак, а музиката е на Владимир Кликов. Асистент на режија е Никола Кимовски.

Оваа копродукциска претстава ќе има уште две изведби (11-ти и 12 јуни) на Виенскиот фестивал на кој, како и во минатите години учествуваат претстави на големи имиња на европскиот и светскиот театар.

Според директорот на МНТ Дејан Пројковски, премиерата на „Соларис“ на „Винер фествохен“, кој постои од 1951 година, е почеток на презентирањето на МНТ во првата лига театарски фестивали. Селекторката на фестивалот Марина Давидова, која посети една од пробите на „Соларис“ во Скопје, оцени дека ќе биде најдобра претстава иако на фестивалот нема официјален натпревар.

„Винер фествохен“ (т.е. Виенски фестивалски недели) се одржува пет или шест седмици во мај и јуни и годишно има околу 180.000 посетители. Свечено беше отворен на 13 мај и ќе трае до 19 јуни. Годинава е домаќин на продукции од сите страни на Европа, но и надвор од континентот (на пример од Тел Авив и од Техеран) и е копродуцент и на други претстави кои во Виена ќе бидат изведени премиерно. Од нашиот регион фестивалот е копродуцент и со ХНК Риека и Словенско младинско гледалишче од Љубљана за претставата „Нашето насилство и вашето насилство“.

Гостуваат проекти од различни жанрови и режисерски пристапи - покрај драми, опери и балет, има и мјузикли, танцов театар, мултимедијални претстави и необични перформанси (како театарот на фигури „Mi gran obra“ од Барселона, интерактивната исталација „Les thermes“ на продукција од Лил, 24-часовниот перформанс од Антверпен „Mount Olympus“...) Во придружната програма се секојдневни средби со режисери, автори, актери, продуценти, дијалози и дебати, изложби, инсталации и концерти на отворено.



Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Судбина

Петгодишно девојче ја убила својата помала сестричка со пиштолот на татко им

Петгодишно девојче ја застрелало и убило својата помлада сестра, Оливија Мело Мореира, откако го пронашла наполнетиот пиштол од 9 мм на нејзиниот татко на кујнскиот пулт во нивниот дом. 

Петгодишно девојче ја убила својата помала сестричка со пиштолот на татко им

Трагедијата се случила во недела, 8 ноември, во Рио де Жанеиро, Бразил.

Оливија била пронајдена на подот од нејзината семејна куќа од страна на нејзините родители, а нејзините две сестри биле покрај неа. Девојчето било итно однесено во болница, каде што лекарите се обиделе да ја реанимираат, но за жал, не можеле да ја спасат.

Според истражителите, семејството си легнало доцна претходната ноќ бидејќи улична забава пред нивната куќа траела до 6 часот наутро.

Откако забавата завршила, мајката забележала дека вратата од гаражата е широко отворена и го известила својот партнер. Потоа таткото го зел пиштолот и се симнал долу за да провери дали некој влегол во куќата.

Кога се уверил дека нема натрапници, се вратил во кревет, но го оставил наполнетиот пиштол, кој сè уште бил во футролата, на кујнскиот пулт.

Родителите подоцна се разбудиле од силен шум и ја пронашле Оливија на подот. Според таткото, неговата петгодишна ќерка истрчала кај него и постојано повторувала: „Извини, тато, извини, тато“.

Таткото доброволно отишол во полициската станица за да даде изјава како осомничен, но во тој момент не бил уапсен, меѓу другото поради неговата соработка со истражителите.

Полицијата соопшти дека тој би можел да се соочи со обвиненија за убиство од небрежност и непочитување на прописите за безбедност на огнено оружје затоа што не го спречил детето да го дофати пиштолот. Истражителите не ја исклучиле можноста за покренување случај за убиство со умисла.

Пиштолот бил запленет, а членовите на одделот за убиства спровеле форензичко испитување на семејниот дом на Мореира. Во тек е истрага за да се утврдат сите околности на трагедијата.

Според достапните информации, таткото имал дозвола за оружје и бил регистриран како колекционер, спортски стрелец и ловец.

Неговиот правен тим одбил да коментира за случајот, наведувајќи дека семејството не сака да дава изјави во ова исклучително тешко и трагично време.

Тагови: девојче пиштолот

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Драма во Ливерпул: Вооружен маж виден покрај училиште, итна реакција на полицијата

Вооружена полиција реагираше на настанот во центарот на Ливерпул откако беше пријавено дека еден маж носи оружје.

Драма во Ливерпул: Вооружен маж виден покрај училиште, итна реакција на полицијата

Полицијата од Мерсисајд соопшти дека полицајците биле повикани поради пријави за маж кој носел оружје во Пел Мол околу 18:45 часот во понеделник. Вооружена полиција била повикана на местото на настанот и мажот бил уапсен во близина во 19:10 часот. Според извештаите, кај него била пронајдена лопата, објави Мирор.

42-годишен маж од Ливерпул бил уапсен под сомнение дека поседувал предмет што може да се користи како офанзивно оружје и бил приведен на испрашување, објави „Мирор“.

Учениците и родителите на Институтот за современа музичка продукција и изведба (ICMP), кој се наоѓа во Пел Мол, изјавија за „Ливерпул Ехо“ дека зградата е ставена во „целосна блокада“ по инцидентот.

Рејчел, чиј син Зак посетува ICMP, изјави во 19:30 часот во понеделник:

„Син ми се јави и ми рече дека сè уште не се враќа дома бидејќи имало лице [со пиштол] на улицата Пел Мол. Трчаше по улицата.“

„Вработените ги спуштија ролетните. Навистина е страшно. Тој е заробен внатре. Мислам дека е повикана полиција.“

Непосредно пред 20 часот, три полициски автомобили и единица со кучиња беа видени паркирани пред МКИП, на улиците Прусија и Хајфилд. Ролетните на зградата беа делумно спуштени и двајца полицајци влегоа внатре.

Неколку минути подоцна, ролетните беа целосно подигнати и десетици ученици почнаа да ја напуштаат зградата. Никој не е повреден, а полицијата потоа ја прекина операцијата.

Лука Пирсон, 19, рече дека тој и неколку други ученици виделе човек со пиштол на улицата Прусија.

„Сите влеговме во зградата на училиштето“, рече тој.

Друг студент рече: „Имаше еден човек во долна облека [со пиштол]. Беше по улицата. Нè погледна, ние го погледнавме него.“

„Потоа веднаш влеговме внатре. Навистина не знаевме што да правиме. Се случи пред околу два часа.“

Секој што има информации за инцидентот се повикува да контактира со полицијата во Мерсисајд преку профилот @MerPolCC на социјалните мрежи или со повик на бројот 101, наведувајќи го референтниот број 907.

Тагови: Ливерпул училиште

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Балкан

На Бугарија ѝ се заканува политички земјотрес по трагедијата- опозицијата бара оставка од владата на Радев

Сообраќајна несреќа на автопатот Тракија во Бугарија, во која загинаа 12 лица, а 50 беа повредени, предизвика политички реакции откако беше откриено дека камерите и системите за надзор снимиле опасно густа магла два часа пред трагедијата.

На Бугарија ѝ се заканува политички земјотрес по трагедијата- опозицијата бара оставка од владата на Радев

Опозицијата тврди дека властите имале доволно време да реагираат, но не ги презеле потребните мерки, поради што сега бара оставка од премиерот и министрите, пренесува БНТ.

Тешката сообраќајна несреќа се случила рано наутро на автопатот Тракија, во близина на раскрсницата Зимница, каде што се судриле десетици автомобили и камиони поради исклучително лоша видливост.

Според официјалните бројки презентирани од министерката за здравство Катја Ивкова, во сообраќајната несреќа животот го загубиле 12 лица, додека 50 повредени лица се лекуваат во болници.

Меѓу тешко повредените е и лекар од Детската болница „Света Анастасија“ во Бургас, што го потврди и директорот на оваа здравствена установа, д-р Благомир Здравков.

Поради големиот број повредени, започната е обемна спасувачка и медицинска операција.

Поголемиот дел од пациентите, 27 од нив, беа сместени во болниците во Сливен, 12 беа префрлени во здравствените установи во Јамбол, додека седум беа лекувани во две болници во Бургас.

Властите, исто така, предвидоа можност најтешко повредените да бидат префрлени со авион во Софија, каде што ќе продолжат со лекувањето. Бугарскиот премиер Румен Радев го прогласи 11 ноември за ден на жалост.

Камерите предупредија на опасноста неколку часа пред несреќата

По трагедијата се постави прашањето за одговорноста на надлежните институции, бидејќи, според експертите и опозицијата, густата магла не беше изненадување.

Георги Галабов од Институтот за безбедност во сообраќајот рече дека камерите на Агенцијата за патна инфраструктура (API) регистрирале спуштање и постепено згуснување на маглата на оваа делница околу два часа пред несреќата.

Според него, интерактивниот систем испратил предупредување до надлежната институција за влошување на временските услови, додека камерите истовремено ги снимиле возилата што се движат со голема брзина и покрај драстично намалената видливост.

Галабов нагласи дека имало доволно време за преземање превентивни мерки.

Меѓу можните решенија, тој ги наведе третирањето на патот за да се спречи формирање мраз, привремено или етапно затворање на ризичниот дел за два до три часа, како и испраќање полициски патроли за регулирање на сообраќајот.

Опозицијата бара оставка од премиерот, се подготвува гласање за недоверба

Трагедијата предизвика жестоки реакции и во бугарскиот парламент, каде што претставниците на опозициската партија ГЕРБ побараа оставка од премиерот Румен Радев и надлежните министри.

Потпретседателот на партијата Даниил Митов, поранешниот регионален министер Николај Нанков и Теменушка Петкова ги обвинија властите за неактивност и обид за префрлање на одговорноста, најавувајќи дека ќе започнат консултации и ќе собираат потписи за гласање за недоверба на владата.

Митов ги отфрли тврдењата на министерот за внатрешни работи Иван Демерџиев дека нема врска помеѓу системот на Агенцијата за патна инфраструктура и Министерството за внатрешни работи.

Тој истакна дека размената на податоци во реално време функционира преку Националниот координативен центар за безбедност во сообраќајот.

Николај Нанков тврдеше дека информациите за густа магла стигнале до Центарот за ситуации на Агенцијата за патна инфраструктура еден ден пред несреќата, додека камерите покажале исклучително лоша видливост најмалку еден час пред судирот.

Тој ги обвини властите дека не го обезбедиле соодветно патот, наведувајќи дека патот не бил третиран од мраз и дека режимот на зимско одржување не бил воведен дури ни до 10 ноември.

Нанков, исто така, посочи на проблемите во одржувањето на патната инфраструктура. Според него, августовската наредба го ограничила тековното одржување на патиштата, вклучително и сигнализацијата и ознаките, додека договорот од 2020 година за поставување 40 електронски информативни табли на автопатот „Тракија“ бил раскинат две години подоцна, без да биде завршена работата.

Теменушка Петкова ги обвини премиерот и владата дека ги манипулирале наодите од ревизорскиот извештај на Сметковната комора со цел да ја префрлат одговорноста за лошата состојба на патиштата на претходната влада.

Истрагата за околностите на трагедијата и одговорноста на надлежните служби ќе биде клучна за утврдување како се случила една од најсериозните сообраќајни несреќи во Бугарија.

Тагови: Бугарија Румен Радев

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер