Живот

Свештена бигорска Обител: Велигден не е време за профит, туку за милосрдие

Свештената бигорска Обител и годинава се придружува на апелите на властите и на поединечни организации за поевтинување на основните прехранбени производи во пресрет на најголемиот христијански празник – Воскресението Христово.

-Веруваме дека празничната радост треба да биде достапна за сите, вклучително и за оние кои се во потешка материјална положба. Меѓутоа, со особена болка и разочараност го забележуваме повторното покачување на цените од страна на дел од трговците кај нас, токму во деновите кога сè повикува на милосрдие, љубов и човечност, наведуваат од Обителта.

Додаваат дека овој чин, во најмала рака, претставува навреда за многу семејства, кои, иако живеат во сиромаштија, имаат човечко достоинство и посакуваат да го прослават празникот над Празниците барем со малку радост, со празнична трпеза и со семејно заедништво.

- Не е потребно човек да биде верник, за да покаже солидарност со своите сограѓани – доволно е да биде човек. За жал, кај дел од трговците, како што гледаме, човечноста отстапува пред алчноста, а љубовта кон ближниот се заменува со среброљубие. Притоа, најмногу се тангирани токму оние производи што традиционално се купуваат за Велигден – јајцата и јагнешкото месо. Овој чин не само што е крајно неетички, туку претставува и непочит кон својот сограѓанин. Секој што е трговец е истовремено и нечиј брат, сосед, пријател, нагласуваат понатаму.

Прашуваат зошто тогаш, во најсветлите денови на нашата вера, да се заработува од туѓата немаштија.

-За жал оваа појава што се забележува е вистински срам за Македонија и крајна дрскост, бидејќи единствено кај нас се случува вакво нешто пред најголемиот празник цените да растат, додека во другите земји од регионот се случува токму спротивното – таму се поттикнуваат кампањи за намалување на цените, за да може секој граѓанин достоинствено да празнува и да се израдува. Следствено, прашуваме со сериозност и одговорност: дали е етички да се збогатува некој врз туѓата сиромаштија, дали е морално, кога Христос доброволно ја принесува Својата љубов за светот, некој да смета колку повеќе може да заработи од оние кои сакаат со своите ближни да ја споделат празничната трпеза на радоста, посочуваат од бигорската Обител.

Ваквата трговска бездушност, според Обителта, придонесува не само кон социјална неправда, туку и привлекува големи несреќи и води до нарушувања во општествениот морален поредок.

-Сите добро знаеме дека вистинскиот напредок на едно општество не се мери само во бројки и профити, туку во мерката на човечноста, на солидарноста и на почитта кон празничната и духовната реалност на народот. Затоа, од срце апелираме: да не се поскапуваат продуктите пред големите празници, особено пред Велигден, да се покаже милосрдие, социјална одговорност и основна човечка обѕирност. Нека тоа биде најубавиот дар што трговците можат да го принесат во чест на Воскресението – дар на човечност, љубов и разум. Не грижете се секој само за себе, туку и за другите!“ (Филип. 2,4). Со молитви за милостиво срце и достоинствена, радосна Пасха Господова, стои во апелот на Свештената бигорска Обител.

Тагови: Велигден Св. Јован Бигорски

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Бензините поскапи за 1,5 , дизелот за 3,5 денари

Регулаторната комисија за енергетика, водни услуги и услуги за управување со комунален отпад на Република Македонија (РКЕ) донесе Одлука со која се врши зголемување на малопродажните цени на нафтените деривати во просек за 2,62%

Регулаторната комисија за енергетика, водни услуги и услуги за управување со комунален отпад на Република Македонија (РКЕ) донесе Одлука со која се врши зголемување на малопродажните цени на нафтените деривати во просек за 2,62% во однос на одлуката од 17.8.2026 година.

Референтните цени на нафтените деривати на светскиот пазар во споредба со претходната пресметка бележат зголемување и тоа во просек: кај бензините за 3,795%, кај дизелот за 4,842%, кај екстра лесното масло за 3,958% и кај мазутот зголемувањето е за 6,467%.

Курсот на денарот во однос на доларот во изминатиот период по кој беа формирани цените со претходната пресметка е понизок за 0,5340%.

Од 25.8.2026 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС - 95 93,00 (денари/литар)

Моторен бензин ЕУРОСУПЕР БС - 98 95,00 (денари/литар)

Дизел гориво ЕУРОДИЗЕЛ БС (Д-Е V) 101,50 (денари/литар)

Масло за горење Екстра лесно 1 (ЕЛ-1) 100,50 (денари/литар)

Мазут М-1 НС 45,576 (денари/килограм)

Малопродажните цени на бензините ЕУРОСУПЕР БС-95 и ЕУРОСУПЕР БС-98 се зголемуваат за 1,50 ден/лит.

Малопродажната цена на ЕУРОДИЗЕЛ (Д-Е V) се зголемува за 3,50 ден/лит.

Малопродажната цена на Екстра лесното масло за домаќинство (ЕЛ-1) се зголемува за 2,00 ден/лит.

Малопродажната цена на Мазутот М-1 НС се зголемува за 1,850 ден/кг. и сега ќе изнесува 45,576 ден/кг.

Напоменуваме дека ова се максималните цени на нафтените деривати од 00:01 часот на 25.8.2026 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Министерството за јавна администрација ја започна оперативната фаза за воспоставување на Академијата за обука и стручно усовршување на јавните службеници

„Академијата не е само институционална новина. Таа е инвестиција во квалитетот, интегритетот и ефикасноста на јавната администрација, а со тоа и во довербата на граѓаните во институциите.“

„Академијата не е само институционална новина. Таа е инвестиција во квалитетот, интегритетот и ефикасноста на јавната администрација, а со тоа и во довербата на граѓаните во институциите.“ Со овие зборови министерот за јавна администрација, Горан Минчев, ја отвори првата работна сесија со тимот кој ќе биде дел од Академијата за обука и стручно усовршување на јавните службеници, која треба да започне со работа на полетокот од 2027 година.

Во изминатиот период беа поставени основите за формирање на Академијата, беше спроведена анализа на постојната состојба и потребите, а во наредниот период следува дефинирањето на организацискиот модел, клучните функции и оперативната поставеност на новата организациска единица во рамките на Министерството за јавна администрација.

Во рамките на дводневната работна сесија тимот ќе работи на подготовка на клучните документи за воспоставување на Академијата, како и на преточување на стратешката рамка и четирифазниот патоказ на реформата во конкретен, реалистичен и временски дефиниран акциски план. Овие документи ќе ја постават основата за започнување на оперативната фаза и функционирањето на Академијата во состав на Министерството за јавна администрација.

„Работата во овие два дена бара од секого од нас конкретност и посветеност. Не бараме уште еден документ на хартија, бараме јасен, реалистичен и спроведлив акциски план, со прецизно распределени одговорности, идентификувани ризици и временска рамка на која можеме да се потпреме. Тоа е она што ќе го означи вистинскиот почеток на оперативната фаза на Академијата“ истакна министерот Минчев.

Работната сесија се реализира во соработка со Регионалното училиште за јавна администрација – РеСПА. Преку менторската поддршка, регионалната експертиза и споделените искуства и практики од земјите во регионот, Министерството за јавна администрација добива значајна поддршка во процесот на градење на одржлив и функционален институционален модел на Академијата.

Воспоставувањето на Академијата претставува важен чекор во создавањето современа, професионална и ефикасна јавна администрација, во која континуираното учење, развојот на компетенции и стручното усовршување ќе бидат составен дел од професионалниот развој на јавните службеници.

Министерството за јавна администрација продолжува посветено да работи на реформите кои значат поквалитетна администрација, подобри услуги за граѓаните и создавање услови во кои јавните службеници ќе имаат можност континуирано да ги развиваат своите знаења и професионални компетенции.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Се урна борбен авион во Унгарија, пилотот се катапултирал

Борбен авион „Грипен“ на Унгарските вооружени сили се урна во близина на Солнок доцна претпладнево, а пилотот успеа безбедно да се катапултира. Информацијата ја потврди премиерот Петер Маѓар, пренесува „Еуроњуз“.

Премиерот на својот профил на мрежата „Икс“ (X) напиша: „Од засега непознати причини, пред неколку минути во близина на Солнок се урна борбен авион 'Грипен' на Унгарските одбранбени сили. Пилотот успешно се катапултираше. Во тек е истрага, а министерот за одбрана е на пат кон местото на несреќата“.

Министерот за одбрана Ромулус Русин-Сенди подоцна извести дека пилотот е пренесен во болница и дека нема други повредени. Според него, пилотот направил сè што е во негова моќ за да обезбеди авионот да падне на воен терен.

Во близина на Солнок се наоѓа и унгарска воена воздухопловна база. Унгарската флота на авиони „Грипен“ Унгарските вооружени сили располагаат со вкупно 14 борбени авиони „Грипен“. Сите тие се стационирани во воздухопловната база Кечкемет и редовно учествуваат во меѓународни операции.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.