Но, нивната свадба годинава не е само продолжение на традицијата, таа е и продолжение на посебна семејна приказна. Пред точно 35 години, на првата современа Галичка свадба, судбоносното „да“ го кажале и родителите на младоженецот. Денес, истата чест му припадна и нему, правејќи ја оваа свадба единствена по својата симболика. Тесните галички сокаци беа исполнети со бројни посетители, домашни и странски, кои имаа можност да бидат дел од овој посебен ден. Атмосферата и чувството да се присуствува на Галичката свадба го опишаа како незаборавно и прекрасно искуство.

Главните свадбарски обичаи започнаа уште во раните утрински часови. Според вековната традиција, меѓу обичаите се бричењето на зетот, гледањето низ прстен, но и одењето по вода од трите галички чешми. Откако невестата ја напушта родната куќа, свадбената поворка, придружена од звуците на зурлите и тапаните, минува низ преполните галички сокаци.. Младенците судбоносното „да“ го кажаа во црквата „Св. Апостоли Петар и Павле“, а веселбата продолжи со изведба на мијачки песни и традиционална музика, со кои и годинава беше заокружена една од најпрепознатливите македонски традиции. Токму еден од највпечатливите моменти е изведбата на традиционалните македонски ора по венчавањето.

Младенците се закитија и со бројни дарови, меѓу кои и пафта со мотив од Галичник од претседателката Гордана Сиљановска-Давкова...

Галичката свадба се одржува секое лето и претставува една од најзначајните културни манифестации во земјава, која повеќе од шест децении го зачувува автентичниот свадбениот обред, песните, ората и носиите на Мијаците.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

На три дена до истек на крајниот рок од исполнување на реформската агенда, од владејачката партија ја повторија нивната позиција дека опозицијата треба да пресече што побрзо и да постигнат договор за нов изборен законик за да се заокружи списокот на обврски. Велат условот за дијаспората останува ист, во спротивно доколку останат старите изборни правила, од ВМРО-ДПМНЕ потенцираат дека одговорноста нема да е нивна.

-Наместо Македонија да покаже политичка зрелост и да испрати порака дека најважните закони можат да се носат со договор, опозицијата избра конфронтација и дневнополитички пресметки. ВМРО-ДПМНЕ и понатаму останува на ставот опозицијата да седне и да се договори што сака, а ние тоа веднаш ќе го прифатиме, само да се олесни гласањето на дијаспората. Одлуката да не се искористи оваа можност и на следните избори повторно да бидеме со стариот ИЗ е исклучиво одговорност на СДС, Левица и ДУИ. - Валентин Манасиевски – портпарол на ВМРО-ДПМНЕ

Од опозициската СДСМ пак им забележуваат дека целосно кренале раце од евроинтеграциите на Македонија. Потврда за тоа биле изјавите на премиерот Мицкоски, за кој од партијата на Филипче велат дека бара изговори и алиби за неуспех во испорака на вистински реформи.

-Христијан Мицкоски вчера потврди дека е подготвен да ја жртвува Македонија, и кажа збогум на Европа и порача дека ќе чека покана. Со децении да чекаме заглавени додека регионот оди напред. Мицкоски призна дека тој и неговата криминална организација ВМРО, не сакаат Македонија да биде членка на Европската Унија. Не затоа што не веруваат во Европа, туку затоа што се плашат од тоа што Европа го носи: независно судство, европско јавно обвинителство и одговорност за сите оние што ја ограбиле и ја уништиле државата. - Богданка Кузеска – портпаролка на СДСМ

Дали ќе има договор до среда за Изборниот законик најверојатно ќе се знае утре по понеделничката собраниска координација на партиите. Од Левица најавија дека утре ќе се состанат со останатите опозициска партии за да ги усогласат ставовите за Изборниот законик.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Откако Уставниот суд ја поништи одлуката од 2007ма година за која Општина Тетово не добила согласност од Владата за менување на имињата, сега пред актуелниот состав е нова иницијатива од ДУИ. Во неа повторно се предлагаат имињата кои беа во осопорената одлука, но дел се сосема други улици, па затоа предлогот го третираат како целосно нов и очекуваат да биде прифатен од советниците. Од партијата на Ахмети за Канал 5 велат дека тој потег не би предизвикал распуштање на советот, иако според Законот за локална самоуправа, Советот се распушта ако повторно го донесе прописот кој претходно бил поништен или укинат со одлука на Уставниот суд.

Политичкиот аналитичар Љуљзим Фаризи оценува дека неизвесно е дали воопшто оваа точка ќе биде ставена на дневен ред за да се расправа и гласа, а според него неизвесно е како тоа ќе се рефлектира при евентуални нови избори за совет.

-И истите се обидуваат од тоа да профитираат, односно ДУИ што ја има направено грешката во минатото, да се обидат да ја поправат но за политичка цел. Но од тоа што вчера видовме дека имаше многу мал број кои излегоа на тој протест, се разбира дека двете структури ќе тактизираат за одлуката утре, но топката е во Влен кои ќе одлучуваат дали ќе одат на предвремени избори за советот на Тетово или не.- Љуљзим Фаризи – политички аналитичар

Протестниот марш против одлуката за променетите имиња на улиците кој синоќа се одржа во Тетово беше во организација на ДУИ.

Учесниците носеа пароли „Историјата не се брише и улиците зборуваат албански“, Ова е Тетово, а не Белград“, „Титовлен“, пораки кои на крајот ги залепија на влезот од општинската зграда.

Денеска од Уставен се огласија преку писмена реакција- да не се политизираат одлуките на судиите, судот нема да подлегне на политички притисоци.

-Посебно сакаме да нагласиме дека за Судот нема никаква релевантност какви и кои се имињата на улици, школи, инфраструктурни објекти и слично. Тоа се политички одлуки кои ние не ги цениме, но она што е важно за Судот и за граѓаните е дали тие одлуки се донесени во законски пропишана постапка. - велат од судот.

Освен во Тетово, иницијатива за промена на улици со имиња на борци на ОНА има и во Чаир, Командант Тели и Зекирија Хасани. Советот дал согласност, но засега нема одговор дали имало и Бадентерово мнозинство, како што налага законот.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.