Одлуките на Уставниот суд се конечни и извршни, но истовремено, значајно е да се почитуваат уставно загарантираната самостојност на судовите и законски уредениот тек на судските постапки – реагираат од Судскиот совет и Здружението на судии за пријавата на Уставниот суд против судија од Основниот граѓански суд Скопје за непочитување на нивна конкретна одлука. Во заедничкото соопштение, се потенцира неправосилноста на решението на судијата, против кое е поднесено и жалба по која сега треба да одлучува Апелација.

-Постапката сè уште е во тек, а оценката на законитоста на првостепената одлука му припаѓа само на надлежниот второстепен суд. Во такви околности, Судскиот совет и Здружението на судиите сметаат дека секое институционално постапување поврзано со конкретната неправосилна судска одлука бара особена внимателност и воздржаност, за да не се создаде впечаток на прејудицирање на исходот од постапката или на притисок врз судиите кои одлучуваат во конкретниот предмет.

Како што додаваат, без оглед на уставната положба, ниту еден орган не може да определува или да прејудицира каква одлука треба да биде донесена од судот.

Канал 5 го контактираше Претседателот на Уставниот суд - Дарко Костадиновски, за став по реакциите кои деновиве ја разбрануваа правната фела отворајќи ги дилемите - дали во овој случај, Уставниот суд ги пречекорил неговите надлежности, дополнително создавајќи потенцијален притисок врз судската независност и автономија. Костадиновски не одговори конкретно на досегашните дилеми но изјави дека ќе го разгледа заедничкото соопштение на Судскиот совет и Здружението на судии и како што рече, доколку има потреба, Уставниот суд ќе излезе со свој став.

Според правниот експерт Дарко Аврамповски, ваквата постапка на Уставниот суд е избрзана токму поради неправосилноста на решението на судијата од Основниот суд, меѓутоа како што вели, заедничкото соопштение на Судскиот совет и Здружението на судии делумно ја носи дебатата за односот меѓу редовното судство и Уставниот суд во непотребен правец.

-Мислам дека во конкретниот случај одлуката на УС да го активира овој механизам беше преуранета бидејќи не станува збор за правосилна одлука од страна на Основниот суд, допрво треба да одлучува Апелација за истото прашање. // Меѓутоа, во овој случај зборуваме за одлуките на Уставниот суд а не за било кој друг државен орган, кој дава упатство за тоа како вие треба да го разбирате и применувате Уставот во пракса. Не станува збор дека е одлука на државен орган која редовните судови мора да ја спроведат, особено затоа што одлуката на Уставниот суд не навлегува во меритумот на предметот и каква треба да е конечната одлука во предметот. - Дарко Аврамовски, Коалиција сите за правично судење

Предметот по кој Уставниот суд одлучуваше се однесува на повреда на слободата на јавно изразување на новинарка во настаните во Собранието од 2017та година, а судијата од Основниот граѓански суд Скопје, повикувајќи се на Законот за парнична постапка, навел дека Одлука на Уставниот суд не може да биде основ за повторување на постапката како нов факт или доказ.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.