Судот ја блокира забраната за WeChat во САД

Судијка од Калифорнија денеска го блокираше извршувањето на налогот на Министерството за трговија на САД од страна на „Епл“ и „Гугл“ за отстранување на кинеската апликација „WeChat“.

Судијката Лорел Билер од Сан Франциско рече дека корисниците на WeChat во тужбата „покренале сериозни прашања поврзани со Првиот амандман“ на Уставот на САД, кој ја штити слободата на изразување и дека спроведувањето на забраната е суспендирано до новото известување заради потенцијална штета што би ја предизвикало.

„Регулативата што отстранува еден канал на комуникација без достапни замени го ограничува говорот повеќе отколку што е потребно за да се остварат интересите на владата“, објасни таа.

Министерството се уште не ја коментирало одлуката на судот.

Здружението на корисници на WeChat ја поздрави пресудата како „важна победа“ за милиони корисници на апликацијата во САД.

Мајкл Биен, адвокат на здружението на корисници, рече дека „САД никогаш не затвориле некоја поголема комуникациска платформа, дури ни за време на војните“.

„Во врска со забраната на WeChat што влијае на кинеско-американската заедница, постои сериозен проблем во врска со усогласеноста со Првиот амандман“, рече тој.

Министерството за трговија на САД во петокот објави дека забраната за преземање кинески апликации за преписка и трансфер на пари, како и видеата на „WeChat“ и „ТikTok“, ќе стапи на сила во САД во недела, а како причина ја наведуваат „националната безбедност“, пренесоа агенциите.

„Кинеската комунистичка партија покажа дека има средства и намера да ги користи овие апликации како закана за националната безбедност на САД, надворешната политика на САД и економијата“, објасни министерот.

ByteDance, сопственикот на апликацијата TikTok која се грижи за апликацијата и нејзините корисници на пазарот во САД, се обидува да стори сé за да постигне договор за судбината на американскиот бизнис, а официјални претставници на Министерството велат дека претседателот Доналд Трамп има уште време да ја укине забраната до крајот на денот.

Секретарот за трговија Вилбур Рос во писмената изјава рече дека САД мора да се спротивстават на „злонамерната практика на собирање лични податоци на граѓаните на САД додека ги промовираат националните вредности, демократските норми засновани на правила и агресивно да ги спроведуваат законите и регулативите на САД“.

Министерството за трговија бара забрана за преземање на апликациите, и затоа „Епл“, „Гугл плеј“ и другите онлајн продавници не смеат да ги нудат тие апликации на која било платформа достапна во САД.

Но, забраните не се однесуваат на американски компании кои работат надвор од САД преку WeChat.

Мрежа за заштита од дискриминација: Да се изберат членовите на КСЗД што поскоро

Комисијата за спречување и заштита од дискриминација останува да се избира по пат на партиски договор?!

На 21.10.2020 година одржана беше седница на Комисијата за европски прашања и Законодавно –правната комисија на Собранието на Република Македонија на кои на дневен ред беше Предлог – Законот за спречување и заштита од дискриминација, попрецизно неговото второ читање и разгледување на поднесените амандмани. Од поднесените амандамани ниту еден не беше усвоен. Еден од амандамните беше и амандманот на Член 18 поднесен од пратениците Маја Морачанин и Мирослав Богдановски, а за кој се застапуваше Мрежата за заштита од дискриминација.

Мрежата за заштита од дискриминација со разочарување ја прими веста дека амандманот на Член 18 не е усвоен и остро ја осудува одлуката на пратениците од власта да не го поддржат. Со амандманот на член 18 се уредува изборот на членовите на комисијата за заштита од дискриминација, чија цел е да се осигура независноста на Комисијата, транспарентна и инклузивна постапка за избор што е во согласност со сите меѓународни стандарди и препораки, како и со мислењето на Венецијанската комисија.

Останува неодговорено прашањето зошто на коалициските партии на власта им пречи потранспарентен начин на избор и именување на членови на Комисијата за спречување и заштита од дискриминација (КСЗД), со оглед на тоа дека пратениците на ДОМ и опозициските пратеници ја препознаа и поддржаа потребата од промена на Членот 18, чија одлука ја поздравуваме.

Членот 18 кој го предложивме најпрво беше прифатен и предложен од Министерството за труд и социјална политика, но Владата го одби и го поднесе Предлог-Законот со истиот текст кој беше усвоен во 2019 година без притоа да даде објаснување, а чија одлука ние исто така остро ја осудивме.

Како Мрежа испративме барање до сите пратеници да предложат и поддржат амандман на членот 18 со кој постапката ќе се уреди по примерот на постапката за избор на членови на Државната комисија за спречување на корупцијата. Дополнително, Мрежата за заштита од дискриминација поднесе барање за јавна дискусија до Собранието на Република Македонија. Комисијата за европски прашања, заедно со Комисијата за еднакви можности организираа средба со здруженијата по однос на Законот за спречување и заштита од дискриминација на 20.10.2020 година каде Мрежата за заштита од дискриминација, останатите здруженија и екперти од областа аргументирано ја образложија потребата од амандман на Член 18.

Овој амандман го предложивме бидејќи претходниот состав на Собранието не успеа да избере членови на КСЗД, а медиумите известуваа дека партиите не можат да постигнат партиски договор во Комисијата за прашања на избори и именувања.

Стравуваме дека со неусвојувањето на амандманот на Член 18 ќе се потврдат нашите сомнежи и изборот на членовите на КСЗД ќе зависи од партиски договор, а не од квалитетот и заслугите на кандидатите, бидејќи здруженијата на граѓани и медиумите нема да можат непосредно да учествуваат во постапката за избор.

Бараме од пратениците да го донесат Законот за спречување и заштита од дискриминација и да ги изберат членовите на КСЗД што поскоро, на начин со кој ќе ги демантираат нашите сомнежи и ќе одберат професионални членовите на Комисијата кои имаат искуство, знаење и посветеност на недискриминацијата и заштитата на човековите права, а не партиски кадри.

Мрежа за заштита од дискриминација

ВМРО-ДПМНЕ:Во државата 500.000 граѓани денот го минуваат со помалку од 130 денари

​Срамно е СДСМ да пушта соопштение и да се фали пред народот дека нивните политики обезбедуваат раст на платите во време на кризата поврзана со КОВИД-19.

Поради погубните политики од месец март односно од почетокот на корона кризата до сега над 40.000 граѓани ги изгубија своите работни места и останаа без своите приходи.

Се фалат дека платите растат, а во државата околу 100.000 граѓани живеат во сиромаштија и 500.000 граѓани денот го минуваат со помалку од 130 денари

Во период на пандемија го зголемија и јавниот долг за 1 милијарда евра.

Без никаков срам СДСМ се дрзна да покачи даноци и давачки на граѓаните односно ја покачија сметката за струја за 7.4%.

Сето ова докажува дека со СДСМ на власт Македонија тоне во криза. Оваа криминална влада мора да си замине час поскоро. Граѓаните на Република Македонија заслужуваат подобар и поквалитетен живот.

Центар за комуникации на ВМРО-ДПМНЕ

СДСМ: Секој, вклучително и ВМРО-ДПМНЕ да покаже одговорност во борбата против коронавирусот

Ззаконските измени мора да се донесат, мерките мора да се почитуваат.

Во период на есенски бран од коронавирусот потребна е максимална одговорност и посветеност на секој поединец во спречување на ширењето на заразата.

Согласно новите мерки, работното време на сите угостителски објекти е ограничено до 23 часот, освен на тие што вршат испорака, а воведено е и ограничување на капацитетот на патници во возилата на јавниот превоз на 50%.

Владата предводена од СДСМ ја прифати и препораката на Комисијата, државната и јавната администрација, општините и судовите да работа во смени, онлајн од дома или редуцирано со систем на ротации.

Владата предводена од СДСМ ги усвои и мерките со кои се предвидува носење маски на отворено, ограничување на групирање по 22 часот, како и ограничување на семејните собири. Овие мерки се проследени до Собранието кое треба да ги усвои измените на Законот за заштита на населението од заразни болести.

Но во време кога се соочуваме со нов бран на коронавирусот, кога и кај нас,но и во регионот и во европските земји бројот на заразени секојдневно расте, ВМРО-ДПМНЕ повторно прави се за да ги одолговлекува мерките важни за справување со пандемијата.

Нивните обиди за деструкција и блокирање на законските измени е смислен и тенденциозен обид за дневно политички поени, со што директно се загрозува јавното здравје. Христијан Мицкоски и ВМРО ДПМНЕ, повторно докажуваат дека последно за што се грижат е здравјето на граѓаните.

Нема време за одложување. Ситуацијата со коронавирусот е сериозна и потребно е брзо делување, конструктивност и соработка.

Здравјето на граѓаните е пред се. Законските измени мора да бидат донесени, мерките и задолженијата мора да бидат почитувани од сите. Само на тој начин ќе го заштитиме јавното здравје и побрзо ќе ја надминеме заканата од коронавирусот.

Центар за комуникации со јавноста на СДСМ

притисни ентер