Здравје

Студија: За 12 години над половина луѓе на светот ќе бидат предебели

Повеќе од половина од светската популација ќе биде со прекумерна тежина или ќе бидат дебели до 2035 година, доколку не се преземат чекори за да се спречи тоа, се вели во новиот извештај на Светската федерација за борба против дебелина.

Извештајот на Светската федерација за борба против дебелината предвидува дека 51 отсто од населението на нашата планета, или повеќе од 4 милијарди луѓе, ќе бидат дебели или ќе страдаат од проблеми поврзани со вишокот на телесна тежина во следните 12 години. Извештајот забележува дека стапките на дебелина ќе се зголемат особено брзо меѓу децата и населението во земјите со среден и низок приход.

Велејќи дека податоците зборуваат сами за себе и претставуваат многу „јасно предупредување“, Луиз Баур, претседателка на Федерацијата, додаде дека креаторите на политиката мора да дејствуваат сега за да спречат влошување на ситуацијата.

„Особено загрижува фактот што стапките на дебелина се зголемуваат најбрзо кај децата и адолесцентите“, рече таа, додавајќи: „Владите и креаторите на политики ширум светот мора да направат сѐ што можат за да избегнат пренесување на здравствените, социјалните и економските трошоци на помладите генерации“.

Извештајот покажува дека дебелината кај децата може да се удвои повеќе од стапката во 2020 година. „Поточно, до 208 милиони момчиња и 175 милиони девојчиња се изложени на ризик да се соочат со овој проблем до 2035 година“, се вели во извештајот.

Организацијата предвидува дека до 2035 година светот ќе троши повеќе од четири трилиони долари годишно или три отсто од глобалниот БДП за болести поврзани со дебелината. Но, авторите на извештајот нагласуваат дека не ги обвинуваат поединците, туку повикуваат светот да се фокусира на социјалните, еколошките и биолошките фактори кои можат да предизвикаат дебелина.

Во проценките, Федерацијата го користела индексот на телесна маса (БМИ), кој укажува на врската помеѓу телесната тежина и висината. Според упатствата на Светската здравствена организација, БМИ над 25 значи дека човекот има прекумерна тежина, а над 30 значи дека е дебел.

Во 2020 година, околу 2,6 милијарди луѓе, или 38 отсто од светската популација, спаѓаат во гореспоменатите категории. Извештајот, исто така, покажал дека речиси сите земји каде што се предвидува најголем пораст на дебелината во наредните години се азиските и африканските земји со низок и среден приход.

Податоците следната недела ќе им бидат претставени на креаторите на политиките на Обединетите нации и земјите-членки.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Раздор во францускиот тим – говорот на Дембеле ги налути соиграчите

Атмосферата во соблекувалната на француската репрезентација беше многу напната на полувремето од полуфиналето на Светското првенство против Шпанија, а во центарот на вниманието беше Усман Дембеле.

Како што објави францускиот „Л'Екип“, неговиот обид да ги мотивира соиграчите предизвикал бурни реакции и незадоволство кај дел од тимот.

Франција отиде на полувреме со гол заостанување, а Дембеле одржа говор критикувајќи го начинот на кој тимот врши притисок.

Освојувачот на „Златната топка“ за 2025 година сметаше дека играта без топката е лошо организирана и недоволно координирана, поради што ги повика своите соиграчи да играат поагресивно и да се обидат да го свртат резултатот. Сепак, неговите зборови не беа одобрени од сите репрезентативци.

Според француските медиуми, некои играчи го критикуваа Дембеле за кревање на гласот и покажување незадоволство, најчесто кога се наоѓа во тешка ситуација на теренот, додека во други моменти не е подеднакво ангажиран како лидер на тимот.

Затоа неговиот говор, наместо дополнителна мотивација, предизвика гнев кај дел од соблекувалната. На крајот, обидот да се потресе тимот не даде резултати.

Шпанија поведе во 22-та минута со голот на Микел Ојарзабал од пенал, а триумфот го потврди Педро Поро со гол во 58-та минута. По поразот, Франција ќе игра натпревар за третото место против Англија во сабота во 23:00 часот во Мајами.

Тагови: Дембеле

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Нова спортска зона во Кисела Вода: Калистеник парк и терен за одбојка на песок

Општина Кисела Вода доби нов, современ спортски комплекс во населбата 11 Октомври Бараки, кој претставува прв спортски проект од ваков вид на нејзината територија.

Лоциран во непосредна близина на Паркот на шахот, овој простор е функционално дизајниран за да ги унапреди условите за рекреација и за развој на спортот на отворено.

Централно место во комплексот зазема модерниот Калистеник парк, кој се простира на површина од 380 квадратни метри. Истиот е целосно осветлен со рефлектори, со што се овозможува непречено користење и во вечерните часови. Оваа нова спортска зона е наменета за физичка активност преку вежби со сопствената телесна тежина. Опремена е со разновидни справи, вклучувајќи вратило, разбој, паралелки и шведски скали, кои овозможуваат изведување комплексни вежби за развој на силата, издржливоста, координацијата и флексибилноста.

Како дополнување на понудата, во склоп на комплексот е изграден и професионален терен за одбојка на песок. Теренот располага со мрежа поставена на универзална висина и е осветлен со рефлектори, исполнувајќи ги стандардите за одржување на спортски натпревари и квалитетна рекреација. Со успешната реализација на овој проект, се потврдуваат заложбите за континуирано вложување во спортската инфраструктура и за создавање современи услови за активен живот на сите генерации.

Тагови: Општина Кисела Вода

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Влада: Кризната состојба за нафта и нафтени деривати продолжена до 20 октомври

Владата донесе одлука - кризната состојба за нафта и нафтени деривати продолжена до 20 октомври

Владата на денешната седница ја донесе Одлуката за изменување на Одлуката за одобрување на продолжување на рокот за постоење на кризна состојба поради можност од нарушување на снабдувањето со нафта и нафтени деривати.

Со донесената одлука, рокот на важење на кризната состојба се продолжува од 21 јули до 20 октомври, со што се обезбедува континуитет во институционалното постапување и навремено преземање на мерки доколку дојде до нарушувања во снабдувањето или до значителни ценовни шокови на меѓународните пазари на нафта и нафтени деривати.

Целта на оваа одлука е Владата да располага со соодветен правен механизам за брза и ефикасна реакција, со цел да се зачува стабилноста во снабдувањето, да се ублажат последиците од евентуални пазарни нарушувања и да се заштитат интересите и животниот стандард на граѓаните и стопанството.

Владата и понатаму внимателно ќе ги следи состојбите на домашниот и меѓународниот енергетски пазар и, доколку тоа го наложат околностите, ќе продолжи да носи навремени и соодветни мерки во интерес на сигурно, стабилно и непречено снабдување со нафта и нафтени деривати.

По усогласување на одлуката во рамки на владините процедури истата ќе биде доставена до Собранието на разгледување и донесување, согласно законските надлежности.

Тагови: Владата

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.