Косовската влада на Албин Курти воведе нов пакет на мерки за реципроцитет овој викенд што ги замени 100 процентните царините за стоките од Србија.
Властите во Белград ги сметаат за полоши од 100% такси од ноември 2018 година, што беа причина за целосно прекинување на дијалогот за нормализација на односите меѓу Белград и Приштина, што започна со договорот од Брисел постигнат под покровителство на ЕУ на 19 април 2013 година.
Веќе три дена возачите со стока од Србија, но и оние кои возат странска стока, но имаат српски регистарски таблички, чекаат во колона долга неколку километри на преминот Јариње, јавуваат белградските и локалните медиуми.
Камиони од други земји, како Словенија, Босна и Херцеговина и Полска, се во транзит во колоната на југот на Србија.
Возачите кои превезуваат странска стока рекоа дека нивните шпедитери ќе ја менуваат документацијата така што да има ознака „Република Косово“, додека возачите чии камиони имаат стока од Србија велат дека „не знаат како ќе се реши ситуацијата“, објави Н1.
Претседателот на Здружението на бизнисмени од Северот на Косово, кое претежно е населено со Срби, вели дека ниту еден камион со српска стока не влегол во Косово од вчера.
„Целокупниот увоз на српска стока е запрен, па затоа е вратен на нула. Српските производи започнаа да влегуваат по укинувањето на некои даноци, но заклучно со вчерашниот ден, сите камиони застанаа“, рече Радош Петровиќ за порталот „Косовска онлајн“.
Ниту српски печат не е доставен на Косово, затоа што нема ознака „Република Косово“, па Здружението на новинари на Србија (УНС) побара распределбата на печатените медиуми да биде „ослободена од сите политички ограничувања“.
УНС ќе ги извести меѓународните и европските федерации на новинари, ОБСЕ и Советот на Европа за состојбата со која се соочуваат медиумите по одлуката на косовската влада.