Работничките штрајкови го парализираа воздушниот, морскиот и железничкиот сообраќај.
Во несреќата што се случи на 28 февруари 2023 година, загинаа 57 лица, меѓу кои и многу студенти, кога патнички воз се судри со товарен воз во близина на кањонот Темпи во централна Грција.
Иако поминаа две години, безбедносните пропусти кои доведоа до несреќата не се поправени, сѐ уште не е завршена посебната судска истрага, а никој не е осуден за несреќата, што дополнително го зголеми гневот на јавноста.
Во градовите низ Грција се одржаа протести, во една од најголемите масовни демонстрации во земјата во последните години. Во главниот град Атина, протестот стана насилен кога група млади мажи фрлаа молотови коктели врз полицијата и се обидоа да ги пробијат барикадите пред парламентот.
Во центарот на градот одекнаа детонации од солзавец од страна на полицијата. Претходно голем број демонстранти се собраа на централниот плоштад Синтагма пред парламентот, извикувајќи „убијци“ и обвинувајќи ја државата за одговорност за трагедијата.
Грчкиот премиер Киријакос Мицотакис, чија десничарска влада беше реизбрана по катастрофата во 2023 година, се соочува со постојани критики од семејствата на жртвите поради тоа што не започна истрага за политичка одговорност. Власта негира каква било вина и тврди дека судството треба да ја истражи несреќата.
Протестите го одразуваат растечкиот гнев во Грција, каде недовербата кон владата е длабоко вкоренета по должничката криза 2009-2018 година, при која милиони граѓани ги загубија своите плати и пензии, додека јавните служби целосно пропаднаа.
„Владата не направи ништо за да ја донесе правдата“, рече Христос Мејн, 57-годишен музичар кој учествуваше на протестот во Атина. „Ова не беше несреќа, ова беше убиство“, додаде тој.
Една од демонстрантите, која се претстави како Еви, рече дека дошла да им оддаде почит на загинатите, „но и затоа што владата се обидела да ја прикрие вистината“. Деловните простории се затворени, а театрите ги откажаа претставите.
Во објава на Фејсбук, Мицотакис изјави дека неговата влада ќе работи на модернизирање на железничката мрежа и нејзината безбедност. „Таа ноќ ја видовме најгрдата страна на земјата во националното огледало“, напиша тој за ноќта на несреќата. „Трагичните човечки грешки наидоа на хронична државна неспособност.“
Опозициските политичари ја обвинуваат власта дека прикрива докази и ја повикуваат да поднесе оставка. Следната недела парламентот ќе расправа за можноста за формирање комисија која ќе ја испита политичката одговорност за несреќата.
Според анкетите спроведени оваа година од Пулс, 82 отсто од Грците сметаат дека катастрофата е „едно од најважните“ или „најважните прашања во земјата“, додека 66 отсто од нив се незадоволни од истрагите што се започнати.
„Секој ден пред нас се прикажува монструозната моќ на корупцијата“, рече Марија Каристијану, чија ќерка загина во несреќата и која раководи со здружението на семејствата на жртвите.
Студентите извикуваа „Пратете ми порака кога ќе стигнете таму“, што беше последната порака што многумина од убиените ја испратија до своите семејства. Натписите гласеа: „Грција ги убива своите деца“. „Тука сме затоа што сме родители... утре тоа би можеле да бидат нашите деца“, рече 45-годишната медицинска сестра Лица.