Македонија

Стојкоски: Две нови градинки со капацитет од по 120 деца, нови училници и мега-парк на кејот на Вардар

Две нови градинки со капацитет од по 120 деца, нови училници и мега-парк на кејот на Вардар, Ѓорче Петров се развива со засилено темпо.

Довербата што ми ја дадовте ја разбирам како обврска да носам одлуки што ќе го подобрат нашиот живот и ќе создадат сигурна иднина за сите нас во Ѓорче. Во минатиот период, завршивме едно важно поглавје. Наш приоритет беше подобрувањето на инфраструктурата и создавањето услови за понатамошен развој на општината.

Денес може да кажеме дека направивме еден сериозен исчекор и не застануваме тука. Секој развој има своја цел. Нашата цел во овој мандат и нашиот најголем фокус се децата, нивното образование, креирањето подобри услови и создавање подобар квалитет на живот за сите семејства во Ѓорче . Нашиот најважен приоритет во овој мандат е целосно надградување на образовната инфраструктура во нашата општина.

Во само првата година во мојот нов мандат, започнуваме со три големи училишни доградби. Во основното училиште „Страшо Пинџур“ Во Даме Груев се градат 6 нови училници Во основното училиште „Јоаким Крчоски“ во Волково се градат 8 нови училници.

Во подрачното училиште „Димитар Поп-Георгиев Беровски“ во населбата Хром започнавме со изградба на исто така 8 нови училници, со што вкупно 22 нови училници на територија на општина Ѓорче Петров во моментов се градат и создаваме услови за едносменска настава во сите основни училишта. Хром конечно ја доби и новата спортска сала во подрачното училиште на „Димитар Поп-Георгиев Беровски“. Реконструираме училишни простории, инвестираме во опрема и ги уредуваме кабинетите по информатика.

Истовремено градиме и нови детски градинки. Новата градинка во Дексион ќе биде со капацитет од 120 деца и целосно современ, енергетско ефикасен објект. А продолжуваме и со изградбата и на новата градинка во Стопански двор, која е исто така со капацитет од 120 дечиња и ќе има дополнително нова централна кујна со нов магацински простор кои ќе служат за потребите на јавната установа Росица во Ѓорче Петров. Нашата грижа е секое едно дете да има услови и можност за квалитетно образование и личен развој.

Основното училиште „Димитар Поп-Георгиев Беровски“ е првото училиште во општината кое доби најсовремен систем за греење со топлински пумпи. Во соработка со нашите партнери од УНОПС започнуваме проект во кој сме лидери со кој ги опфаќаме сите 6 основни училишта во Ѓорче Петров како и објекти од 3 детски градинки, со што постојните системи за греење ќе бидат надградени со современи топлински и еколошки пумпи.

Единствена фотоволтаична централа од 2.2 МВ на покривите на училиштата, самата по себе претставува еден исклучителен проект и не позиционира како општина лидер во Република Македонија , бидејќи по самиот обем е најголема проект преку кој со јавно приватно партнерство покрај тоа што ги поставуваме фотоволтаичните централи на нашите кровови, обезбедуваме и дополнителен приход во буџетот од најмалку 7 милиони денари годишно, без дополнителен трошок од општинскиот буџет.

Покрај тоа што инвестираме во образовната инфраструктура, воведовме и мерки што директно влијаат на намалување на семејниот буџет. За 410 првачиња обезбедивме бесплатни ранци, училишен прибор и по 3.000 денари еднократна финансиска поддршка. За прв пат сите полуматуранти во Ѓорче добија по 5.000 денари финансиска поддршка, мерка која што ќе продолжи и во иднина. А за младите од 18 до 25 години започнавме со иницијатива и програма за добивање на субвенции од 10.000 денари за полагање на возачки испит од Б категорија.

Учениците со попреченост во нашата општина во основното образование добиваат по 10.000 денари еднократна поддршка во текот на образованието. А ја зголемивме и поддршката за новороденчиња на 8.000 денари. Општина Ѓорче Петров е инклузивна општина. А во мај оваа година и официјално го отворивме Центарот за дневен престој и индивидуален третман, кој обезбедува стручна грижа и индивидуални третмани за децата и возрасните со попреченост.

Во патната инфраструктура само во периодот од последната година изградивме повеќе од 10 км нови коловози, улици и нивни краци во повеќе населени места, со што вкупната бројка на досега реализирани нови улици и краци од почетокот на првиот мандат изнесува над 300 нови вакви објекти.

Ја реконструиравме улицата Воин Драшкоци во населбата Хром, главна улица којашто после години добива темелна реконструкција во должина од 950 м, а покрај целосната реконструкција на коловозот изведени се и нови тротоари на обете страни на коловозот, ќе бидат изведени и легнати полицајци и за првпат оваа улица добива и атмосферска канализација.

Со којашто го решаваме долгогодишниот проблем со одведувањето на атмосферските води во населбата Хром.

Поставуваме и нова канализациона мрежа во руралниот дел на улица 31 и 37 во вкупна должина од приближно 1 км. Улицата 101 во Волково во тек е со реконструкција и уредување на последната автобуска станица на линијата 22 со нова автобуска постојка, проект којшто го работиме заедно со градот Скопје.

Продолжуваме со уредување на многу улици и нивни краци во руралниот дел на Ѓорче Петров, а во урбаниот дел во населбата Александрија успеавме да поставиме нова топловодна инфраструктура со цел поекономично и еколошко централно греење за жителите на оваа населба. Паралелно на тоа работиме и на ново улично осветлување од приближно 700 м и нова мрежа во населбата Александрија.

Нашата цел е Општина Ѓорче Петров да стане силна општина во која луѓето не само што ќе живеат, туку ќе сакаат да останат, да создаваат семејства и да ја градат својата иднина заедно во заедницата. Затоа во периодот што следи фокус ставаме и на јавните простори, зеленилото, спортот и местата за дружење и рекреација. Започнуваме со изградбата на нов мега-парк во Ѓорче Петров, паркот Македонија на кејот на реката Вардар, веднаш до фудбалското игралиште Македонски лавови. Паралелно со тоа продолжуваме со создавање на нови рекреативни простори, меѓу кои и нов парк во населбата Волково.

Продолживме со инвестиции во спортските и рекреативните зони, нешто по што бевме и претходно препознатливи, а изградивме и три нови фитнес зони во дворот на училиштето Мирче Ацев, во дворот на Беровски како и близу локалитетот Бранители во населеното место Волково, со што создаваме услови за младите од овие делови да може да рекреираат и спортуваат на отворен простор.

Нашата визија е јасна: општина која ги решава инфраструктурните проблеми, општина која ја градиме во која квалитетот на живот ќе биде еден од нејзините најголеми предности. И тоа нема да го постигнеме со само еден проект, туку заедно со граѓаните и со нивното партиципативно учество во секој еден проект, заедно со институциите на општината Ѓорче Петров.

Со сето ова, со отворениот пристап, Ѓорче Петров е високо на скалата на транспарентност, со подобрување од минатата година, и со сериозен напредок од 25%. А во март оваа година успеавме да ја добиеме и европската ознака CAF Effective User и станавме првата општина во Република Македонија што успешно ја помина надворешната евалуација за признание за квалитет во јавната администрација.

Продолжуваме да работиме за секое маало, за секое дете и за секое семејство. Ѓорче Петров е општина во која се живее, се расте и се создава иднина заедно.

Александар Стојкоски, градоначалник на Општина Ѓорче Петров

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Анкета на „Маркет Вижн“: ВМРО-ДПМНЕ со тројно поголема поддршка од СДСМ

Владејачката ВМРО-ДПМНЕ има повеќе од трипати поголема поддршка од опозициската СДСМ, а разликата е уште поизразена кај нивните лидери, Христијан Мицкоски и Венко Филипче.

Ваква слика за партиските рејтинзи покажува последната анкета објавена од порталот МКД.мк.

Според истражувањето, на следните избори за ВМРО-ДПМНЕ би гласале 19,3 проценти од испитаниците, наспроти 5,6 проценти за СДСМ. ДУИ и ВЛЕН имаат изедначена поддршка од по 4,2 проценти, Левица четири, а ЗНАМ еден процент.

Но, анкетата покажува и висок процент граѓани без јасна определба за учество на изборите. Дури 41 процент од испитаниците изјавиле дека нема да гласаат, не знаат дали ќе излезат или не сакаат да одговорат на прашањето.

Значителна разлика има и во довербата кон партиските лидери. Христијан Мицкоски има поддршка од 20,4 проценти, додека Венко Филипче од 3,8 отсто. Следуваат Али Ахмети со 3,7 проценти, Димитар Апасиев со 3,4 и Изет Меџити со 2,6 проценти.

Истовремено, дури 44,1 процент од анкетираните немаат доверба во ниту еден политички лидер, додека 12,5 проценти не сакале да одговорат на прашањето.

Од опозициската СДСМ го оспоруваат толкувањето за убедливо водство на ВМРО-ДПМНЕ, тврдејќи дека споредбата со изборните резултати покажува пад на поддршката за владејачката партија.

-Поддршката за ВМРО-ДПМНЕ во анкетата изнесува 19,3 проценти. СДСМ ја спореди таа бројка со околу 32 проценти на изборите и оцени дека власта губи доверба.Зборуваат за убедливо водство, а бројките покажуваат пад на поддршката, порачаа од СДСМ.

Премиерот Мицкоски, пак, коментирајќи ги ниските рејтинзи на опозициските партии, оцени дека тоа е лоша вест за политичарите кои, како што рече, водат политика со лаги, клевети и измислици. Според него, таквите партии ќе продолжат да ја губат поддршката од граѓаните.

„Граѓаните се свесни за перфомансите на денешната наша опозиција. И оние кои што од страна седат и само клеветат без бритоа да понудат малку помош да понудат катастрофално завршува. И оние коишто имаа 7 години можност а ја ограбија и ја уништија државата и сега единственото нешто што им останува е да измислуваат, да лажат, да клеветат итн. И тие ќе продолжат да тонат до конешно дефакторизирање од политичката сцена – изјави – Христијан Мицкоски – премиер на Македонија.

Инаку, анкетата е спроведена за порталот МКД.мк од агенцијата „Маркет вижн“, во периодот од 11 до 27 септември, преку телефонско анкетирање на 1.200 испитаници. Примерокот е репрезентативен според регион, пол, возраст и етничка припадност, согласно пописот од 2021 година. Статистичката грешка изнесува три проценти, со интервал на доверба од 95 проценти.

Македонија

Мицкоски: Дијалогот со Бугарија ќе продолжи и очекувам во определена фаза ставовите да се приближат

Дијалогот со Бугарија за деблокада на евроинтеграциите ќе продолжи, и покрај тоа што немаше успех од првата средба меѓу шефовите на дипломатиите, најавува премиерот Христијан Мицкоски.

Излезот од блокадата тој го гледа преку разговор, иако не сакаше да прецизира дали има иницијатива за нова средба со соседите до декемврискиот самит на ЕУ. За досегашниот тек на преговорите премиерот вели дека се запознаени и меѓународните партнери.

„ Јас се радувам што тој дијалог почна, се радувам што за дијалогот се запознаени нашите партнери. Тоа е убавината во демократијата, да разговарате кога имате различни ставови, а умешноста во демократијата е кога тие различни ставови ќе ги приближите и на крај ќе дојдете до компромис. Очекувам дијалогот да продолжи да се води и во одреден момент ставовите да се приближат и да дојдеме до решение. “Христијан Мицкоски – претседател на Влада.

Решението за спорот меѓу Македонија и Бугарија е во директно учество на Европската Унија, оценува поранешниот грчки премиер и министер за надворешни работи Јоргос Папандреу во интервју за МРТ. Тој вели дека е вистинска трагедија процесот да трае волку долго и смета дека ЕУ треба активо да се вклучи и за Македонија и за другите балкански земји кои долги години стојат во место, во спротивно смета дека овие процеси може да станат внатрешни проблеми на унијата.

Инаку, средбата Муцунски-Чамова во четвртокот поминала во конструктивна атмосфера, но без решение за суштинските прашања. И јавно беа повторени веќе познатите пораки од официјална Софија - дека очекуваат да се исполнат преземените обврски од 2022 година, меѓу кои и промена на Уставот. Покрај ова, шефицата на бугарската дипломатија соопшти дека тие се и категотично против уставни измени со одложено дејство, но и против идејата на Брисел за воведување на квалификувано мнозинство за одлучување за земјите – кандидатки.

Свет

Нападнат клучен руски нафтен центар

Украинските сили нападнаа клучен руски нафтен центар кратко откако Доналд Трамп ги изненади сите со склучување голем договор за увоз на дизел со Владимир Путин.

Веднаш по телефонскиот разговор меѓу Трамп и Путин, руските сили започнаа нов напад врз цивили кои спиеле во Запорожје. Загинаа најмалку седум лица – меѓу кои и три девојчиња – десет беа повредени, а 16 се водат како исчезнати. Со ова, вкупниот број на цивилни жртви од руските напади во изминатите три дена достигна речиси 90, пренесува „Дејли мејл“.

Договорот за дизел меѓу Трамп и Путин го шокираше Киев, а украинскиот лидер го обвини американскиот претседател за „слабост“ и за попуштање пред Москва.

Од друга страна, како што пренесува информативниот портал „Аксиос“, Трамп му замерил на Зеленски што ги игнорирал дури шесте негови барања за запирање на нападите врз руските рафинерии – напади што предизвикувале раст на цените на горивото во САД пред изборите за конгресот.

Дополнителен притисок дојде од советникот за надворешна политика на Путин, Јуриј Ушаков, кој изјави дека едноиполчасовниот разговор меѓу Трамп и Путин бил толку срдечен што „ниту едната страна не сакала прва да ја прекине врската“. Самиот Трамп навести дека е подготвен да продолжи со комуникацијата со рускиот претседател во текот на ноќта, па и следниот ден, пренесува „Дејли мејл“.,,