Претставата беше дел од програмата на Националниот театарски фестивал и привлече големо внимание кај корејската културна јавност. Со тоа, Пројковски е првиот македонски режисер што поставил театарска претстава во соработка со национални институции во Јужна Кореја. И двете премиерни изведби, публиката во Инчеон ги испратија со стоечки овации.

Станува збор, инаку, за современа интерпретација на античкиот мит за Електра, во којашто јазикот на телото, минималните дијалози и прецизната визуелна естетика создаваат универзален сценски израз. Темите за семејството, насилството, сеќавањата и судбината се обработени низ емотивно концентрирана и визуелно изнијансирана форма, својствена за естетиката на Пројковски и Димоски, веќе докажана на неколку меѓународни театарски проекти.

- Работата со корејски уметници беше вистински предизвик - не само поради јазикот, туку и поради нивниот прецизен и визуелно рафиниран пристап кон театарот. Но, токму затоа, кога ќе успееш да се разбереш без зборови, сфаќаш дека темите што ги носи оваа претстава се навистина универзални. Тука престануваат да важат сите бариери и ограничувања што ни се наметнуваат во животот, вели режисерот Пројковски.

Продукцијата е резултат на соработката меѓу Театарската асоцијација на Јужна Кореја, Националниот театарски фестивал на Инчеон и „Артема - театарска лабораторија“. Овој формат на копродукција овозможи вклучување на целосна корејска актерска екипа, селектирана преку национален кастинг. Меѓу глумците, на овој начин, се најдоа признати имиња на тамошната сцена: Ким Чоин, Ким Сеонг-ми, Чои Минхјок, Јанг Мин Ки и Ха Џин.

Авторскиот тим зад претставата е главно македонски: автор на текстот и драматург е Сашо Димовски, Сашко Костов (музика), Сергеј Светозарев (сценографија и видео-дизајн), Раде Василев (костимографија). Кореографијата е на Кјонг Џаеми Рјуи, дизајнот на светло на Џеонгсу Ли, а продукциското водство го потпишуваат Џинион Јун и Хје Јеонг Чунг. Асистент на режисерот е Мари Шин, а уметнички директор Џеонг Ву Сон.

- Ми значи што една ваква соработка и продукција покажува дека и во глобален контекст, македонските културни професионалци можат да бидат препознаени како партнери со висока естетика и став. Тоа не е чест случај, и токму затоа секоја ваква можност носи вредност и остава простор за идни соработки, додава Пројковски.

„’Приказната на Електра’ ќе гостува и во Македонија на 20 август, на свеченото затворање на фестивалот 'Охридско лето'. По одекот што го постигна во Јужна Кореја, ова гостување претставува ретка можност домашната публика да ја доживее претставата во нејзината полна сценска и емотивна сила - токму онаква каква што беше препознаена и надвор од нашите граници“, се вели во соопштението.

Инаку, Дејан Пројковски е еден од нашите најнаградувани и најактивни театарски режисери. Неговите претстави „Ана Каренина“ и „Ричард Трети“ беа дел од јубилејната Театарска олимпијада во Унгарија. „Ана Каренина“ досега има освоено над 40 награди, а „Ричард Трети“ доби „Гран при“ на Фестивалот во Кишварда. Во неговото портфолио се вбројуваат и „Дон Жуан“ (награда за најдобра претстава во Хрватска), „Ромео и Јулија“ (највисока театарска награда во Турција), „Скупљачи перја“ во Српско народно позориште, „Мајка Храброст“ во Нови Сад, како и „Падот на Масада“, „Инферно“ и „Нема струја за електричниот стол“ во македонските театри.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.