Стапи во сила новиот закон за безбедност во сообраќајот во Грција - Канал 5

Балкан

Стапи во сила новиот закон за безбедност во сообраќајот во Грција

Стапи во сила новиот закон за безбедност во сообраќајот во Грција, МИА ги анализира казните за сообраќајни прекршоци.

Стапи во сила новиот закон за безбедност во сообраќајот во Грција

– Високи парични казни што достигнуваат и до 8.000 евра, одземање на возачките дозволи, па дури и активирање на Кривичниот законик, предвидува новиот закон за безбедност во сообраќајот на патиштата во Грција што од денеска стапува во сила, а има за цел намалување на сообраќајните несреќи, јави дописничката на МИА од Атина.

Според Министерството за инфраструктура и транспорт на Грција, земјата е над европскиот просек во смртните случаи во сообраќајни несреќи на патиштата, а прекршоците, како што се користење мобилен телефон, пребрзо возење, неносење појас или кацига и возење под дејство на алкохол се клучните причини за несреќи.

Новиот закон, пред три месеци со широко мнозинство беше изгласан од грчкиот Парламент, а како што тогаш објави МИА, предвидува низа промени во казните, токму за овие прекршоци што доведуваат и до сообраќајни несреќи.

Казни од 350 до 2.000 евра за употреба на мобилен телефон или за неносење појас или кацига на мотор, казни од 2.000 до 8.000 евра за брзина од над 200 километри на час, казна до 2.000 евра за поминување на црвено, активирање на Кривичниот законик при опасно возење, воведување систем на казни на повеќе нивоа при повторување на прекршокот, предвидува меѓу другото новиот во закон.

Од 350 до 4.000 евра казна за употреба на мобилен телефон при возење

Досега, за користење мобилен телефон без разлика дали е предизвикана несреќа или не, само се одземаа возачката дозвола и регистарските таблички на 60 дена.

Сега, постои разграничување и доколу при употребата на мобилниот не се предизвика сообраќајка, казната е 350 евра и одземање на дозволата на 30 дена, доколку се работи за прво прекршување.

При второто, казната е 1.000 евра и одземање на дозволата за 180 дена, а доколку возачот биде фатен по трет пат да користи мобилен додека вози, ќе треба да плати 2.000 евра и една година ќе остане без возачка дозвола.

Казните се построги ако поради употребата на мобилниот телефон биде предизвикана несреќа, а во овој случај се активира и Кривичниот законик за опасно возење, што вклучува и казна затвор.

За предизвикување сообраќајна несреќа при користење мобилен телефон казната е 350 евра и одземање на возачката дозвола за 30 дена, доколку се повтори прекршокот паричната казна е 2.000 евра и одземање на возачката дозвола на четири години, а во случај возачот по трет пат да го стори истиот прекршок парична казна се зголемува 4.000 евра, а осум години ќе остане без возачка.

Слични казни се предвидени и за некористење кацига или појас како од возачите на мотори, така и од сопатникот.

Возење без безбедносен појас или без кацига на мотор – казни и за возачот и за совозачот

Неносењето појас во возилата или заштитна кацига на моторите досега се казнуваше со 50 евра и одземање на дозволата и регистарските таблици на 60 дена, додека пак сега, казната за возачите е 350 евра и одземање на возачката дозвола на 30 дена.

Совозачот на моторот, доколку не носи кацига ќе биде казнет со 350 евра, но казна ќе добие и возачот, па дури и да носи.

Истото важи и за безбедносниот појас, ако совозачот не носи ќе биде казнет со 150 евра, а иста казна ќе добие и возачот, без разлика дали носи или не.

Овие казни се однесуваат на прекршокот доколку е сторен прв пат.

За втор пат, казните се 1.000 евра и одземање на возачката на 180 дена, а за трет пат е 2.000 евра и возачот ќе биде една година без возачка дозвола.

Возење под дејство на алкохол

За возење под дејство на алкохол казните се движат меѓу 350 до 4.000 евра и одземање возачка од 30 дена до десет години, во зависност од количината алкохол и дали станува збор за прв, втор или трет прекршок.

Претходно, за возење под дејство на алкохол од 0,50 до 1,10 г/л предвидена беше парична казна од 200 до 700 евра и одземање на возачката дозвола до 90 дена, како и кривична постапка во потешки случаи.

Сега се воведуваат современи методи за откривање, кои вклучуваат и тестирање за психоактивни супстанции, а возилото се запира задолжително и се чува под надзор.

За возење под дејство на алкохол што е меѓу 0,50 и 0,80 г/л, паричната казна е 350 евра, а возачката дозвола се одзема на 30 дена, додека пак ако количината алкохол во крвта е меѓу 0,80 и 1,10 г/л, паричната казна е 700 евра и одземање на дозволата на 90 дена.

При повторни прекршувања и во двете категории казната се зголемува на 1.000 евра и одземање на дозволата на 180 дена, а со следното прекршување има и ново зголемување на казните, односно паричната на 2.000 евра, а возачот една година ќе биде без возачка дозвола.

За возење под дејство на алкохол што е над 1,10 г/л, претходно возачот се казнуваше со 1.200 евра, одземање на дозволата за 180 дена и најмалку 2 месеци затвор, додека пак сега се менува само затворската што може да биде од два месеци до пет години.

За одново повторување на прекршокот казната е 2.000 евра, возачката дозвола се одзема на седум години, а при трет пат, возачот ќе треба да плати казна од 4.000 евра и десет години ќе биде без дозвола.

Надминување на дозволената брзина – од 700 до 8.000 евра казна

Високи се казните и за возење со прекумерна брзина, за прекршување на сообраќајни знаци, за возење без дозвола итн.

За надминување на дозволената брзина над 50 километри на час, претходната регулатива предвидуваше парична казна од 20 до 175 евра и одземање на возачката дозвола до 60 дена, сега пак, паричната казна се зголемува на 700 евра.

При повторување на прекршокот, казната е 1.000 за првото, 2.000 евра за второто прекршување, а возачката се одзема на 180 дена, односно една година.

Посебни казни се предвидени и за недозволени трки на автомобили и брзина од над 200 км/ч, каде што казните се од 2.000, 4.000 и 8.000 евра при првиот, вториот и третиот прекршок, заедно со одземање на возачката дозвола на една, две или четири години, во зависност дали е прв, втор или трет прекршок, наспроти казната од 700 евра и одземање на возачката дозвола и регистарските таблици на 30 дена, што важеше досега.

Поминување на црвено и незастанување на СТОП

За поминување на црвено светло, казната останува иста како и досега, 700 евра и одземање на возачката дозвола на 60 дена, а се укинува одземањето на регистарскитре таблици на 20 дена.

Казната е поголема при повторување на прекршокот, 1.000 евра за прво повторување, 2.000 евра за второ и одземање на дозволата за 180 дена, односно една година.

Ако возачот не застане на СТОП знакот, казната се менува во однос на тоа дали прекршокот резултирал со предизвикување сообраќајна несреќа, нешто што не беше случај досега.

И во двата случаи, претходно се казнуваше со 700 евра и одземање на возачката дозвола и регистарските таблички на 20 дена.

Сега, ако не се предизвика сообраќајна несреќа, при првото прекршување, казната е 350 евра и одземање на возачката дозвола за 30 дена, а во случај да има повторување се зголемува на 1.000 и 2.000 евра и одземање на дозволата за 180 дена, односно една година.

Ако возачот не застане на СТОП и предизвика сообраќајна несреќа паричната казна е 700 евра за првиот прекршок, 2.000 за вториот и 4.000 евра за третиот, а возачката дозвола се одзема на 60 дена, четири години или осум години.

За возење без возачка дозвола предвидена е парична казна од 1.000 евра и затворска казна до две години, а во случај на несреќа, се применуваат одредбите од Кривичниот законик за опасно возење.

Дополнително, за паркирање на место наменето за инвалиди, казната е 150 евра и ќе се отстрануваат регистарските таблици и ќе се одземе возачката дозвола на прекршителот, додека пак за велосипедистите ќе биде забрането да возат на улица.

Паралелно од 1 јануари 2026 година ќе се воведе ограничувањето на брзината во зависност од населените места, а до тогаш останува границата до 50 километри на час во градовите.

Тагови: грција

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Се соборуваат историски рекорди низ Европа, топлотниот бран однесе над 300 жртви

Топлотниот бран што повеќе од една недела руши рекорди низ Европа и кој однесе десетици животи, се движи кон исток.

Се соборуваат историски рекорди низ Европа, топлотниот бран однесе над 300 жртви

Велика Британија, Франција, Швајцарија и Германија доживеаја рекордна топлина во јуни, а временскиот систем би можел да тестира уште рекорди додека се движи низ Германија кон Полска. Вчера, најмалку 193 милиони луѓе во Европа, вклучувајќи 75 милиони жители на Германија, во одреден момент биле изложени на температури повисоки од 35 степени Целзиусови.

Екстремните временски услови ги ставија здравствените системи под голем притисок во неколку земји. Шпанија пријави повеќе од 300 смртни случаи поврзани со топлината во изминатата недела. Најмалку 74 лица се удавија во Франција. Во Германија, 11 автопати биле оштетени поради топлината. Најдолгата река По во Италија пресушува.

Највисоки измерени температури по земја:

• Франција - 44,3 °C

• Германија - 41,5 °C

• Чешка - 40,7 °C

• Холандија -39,4 °C

• Швајцарија - 38,7 °C

• Англија - 37,3 °C

• Данска - 36,6 °C

• Белгија - 35,3 °C

Историските рекорди се натрупуваат во Европа

Голем дел од Европа вчера се соочи со уште еден топол ден, со температурни рекорди срушени во Чешка, Германија и Данска, ставајќи ги здравствените системи под огромен притисок. Додека овој топлотен бран се движи кон североисток низ континентот, најмалку 193 милиони луѓе во Европа, вклучувајќи 75 милиони во Германија, доживеале температури над 35 степени Целзиусови во одреден момент во саботата, според пресметките на АФП, што е зголемување од петокот.

И историските записи се натрупуваат: Данска никогаш немала толку високи температури откако започнале временските записи во 1874 година, со вредности што достигнале 37 степени.

Чешката Република го забележа својот рекорд на сите времиња од 40,6 степени Целзиусови, а Германија исто така вчера сруши нов рекорд, достигнувајќи 41,5. Швајцарија го сруши рекордот за најжешкиот јунски ден трет ден по ред, со температури што достигнаа 39 степени во Базел.

Низ цела Европа, луѓето прават сè што е можно за да избегаат од топлината: се засолнуваат во цркви, спијат во подруми или се ладат во фонтани и реки. Властите пријавија повеќе од 300 смртни случаи во Шпанија, но има жртви и во остатокот од Европа: стари лица, лица со хронични болести, деца, тинејџери и бездомници. Топлината ги убива луѓето со давење, хипертермија и срцеви удари.

Во Франција, „гледаме поголем број смртни случаи од вообичаеното“, изјави министерката за здравство Стефани Рист во интервју за „Ла Трибјун“. „Но, обезбедувањето сигурни податоци бара време“, додаде таа.

74 удавени во Франција

Франција регистрираше 74 смртни случаи од давење поврзани со екстремниот топлотен бран од 18 јуни, објави вчера министерот за внатрешни работи Лоран Нуњез. Службите за итни случаи се исто така сè повеќе преоптоварени. „По десет последователни дена екстремна топлина и без значително заладување во текот на ноќта, ситуацијата е сериозна“, соопшти градската администрација на Келн.

Додека Парадата на гордоста се одржа во Минхен и Будимпешта, Париз остана без свој ЛГБТ+ настан. Во Германија, полумаратонот во Хамбург исто така ќе биде откажан, додека велосипедските и трките „Ајронмен“ во Франкфурт се скратени. Престижната Берлинска филхармонија го олабави својот кодекс на облекување поради очекуваната температура од 41 степен: мажите можат да ги соблечат јакните и да ги засукаат ракавите. Во Унгарија, армијата беше мобилизирана за да дели илјадници шишиња вода на јавни настани во мали градови низ целата земја.

Во неколку земји, екстремните временски услови и придружното загадување ги ставија здравствените системи под огромен притисок. Во парискиот регион, повиците до службите за итна медицинска помош се зголемија за 80 проценти.

Тагови: Европа топлотен бран

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Муцунски на Дубровник форум: Постепената интеграција во ЕУ мора да биде мост кон полноправно членство, а не трајна чекална

Министерот за надворешни работи и надворешна трговија, Тимчо Муцунски, учествуваше на панел-дискусијата „The EU and the Western Balkans: Resolving Unfinished Business Together“, во рамки на Дубровник форумот.

Муцунски на Дубровник форум: Постепената интеграција во ЕУ мора да биде мост кон полноправно членство, а не трајна чекална

Министерот за надворешни работи и надворешна трговија, Тимчо Муцунски, денеска, на покана на министерот за надворешни и европски работи на Република Хрватска, Гордан Грлиќ Радман, учествуваше на панел-дискусијата „The EU and the Western Balkans: Resolving Unfinished Business Together“, во рамки на Дубровник форумот, посветена на европската перспектива на Западен Балкан и иднината на политиката на проширување.

Во обраќањето, министерот Муцунски се осврна на актуелните иницијативи за постепена интеграција на земјите кандидати во Европската Унија, оценувајќи дека тие можат да бидат значајна алатка доколку претставуваат мост кон полноправното членство.

„Доколку новиот модел на постепена интеграција претставува мост кон полноправно членство, тогаш ќе биде исклучително корисен. Но, мора да внимаваме да не стане алатка која ќе создаде трајна чекална без врата кон целосно членство“, истакна Муцунски.

Тој нагласи дека иницијативите како СЕПА и Планот за раст веќе покажуваат конкретни придобивки за регионот преку поттикнување на реформите и обезбедување директна финансиска поддршка, оценувајќи дека ваквите механизми можат значително да придонесат за побрза европска интеграција.

Осврнувајќи се на процесот на проширување, Муцунски истакна дека е потребна поголема дисциплина, со појасни стандарди, рокови и исходи, како и покредибилен и попредвидлив пристапен процес.

Во однос на прашањата поврзани со македонскиот идентитет, министерот порача дека не постои „северномакедонски“ народ, „северномакедонски“ јазик или „северномакедонски“ идентитет, туку единствено македонски народ, македонски јазик и македонски идентитет, нагласувајќи дека секој обид за нивно оспорување ќе наиде на соодветен одговор.

Говорејќи за европската интеграција, Муцунски истакна дека државата продолжува да испорачува резултати во спроведувањето на реформите и останува целосно усогласена со Заедничката надворешна и безбедносна политика на Европската Унија, при што, како што посочи, придонесува и пошироко од формалната усогласеност.

Во однос на билатералните односи со Бугарија, министерот оцени дека со новата легитимна влада во Софија постои можност за разговор за отворените прашања, но и за заедничката европска иднина.

„Нашата намера не е само да ги започнеме пристапните преговори и по неколку месеци повторно да се најдеме во истата ситуација. Нашата цел е да ги започнеме и успешно да ги завршиме врз основа на европското законодавство, Копенхашките и Мадридските критериуми“, порача Муцунски.

Во завршниот дел од своето обраќање, министерот упати повик до земјите членки на Европската Унија од Југоисточна Европа за уште поактивна поддршка на европската интеграција на регионот, оценувајќи дека е потребен заеднички напор за искористување на актуелната историска можност.

„Историската шанса постои. На нас е да ја препознаеме и да ја искористиме за да одиме напред“, заклучи министерот Муцунски, соопштуваат од МНРиНТ.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Накитот на Клаудија Кардинале е продаден за 826.000 евра

Накитот на француско-италијанската актерка Клаудија Кардинале, која почина во септември, беше продаден на аукција во петокот за 826.262 евра, соопшти аукциската куќа „Кристи“ за АФП. 

Накитот на Клаудија Кардинале е продаден за 826.000 евра

Накитот вклучува „дваесет парчиња што ги сакала и носела Клаудија Кардинале“, се вели во соопштението.

Дел од сумата ќе биде исплатен на фондацијата

Дел од сумата ќе биде исплатен на Фондацијата „Клаудија Кардинале“, која актерката ја основала заедно со својата ќерка за да им помогне на младите современи аудиовизуелни уметници, особено на жените. Резултатот од аукцијата ги надмина проценките на „Кристи“, појасни куќата, додавајќи дека сите парчиња накит биле продадени.

Легендата на италијанското кино, Клаудија Кардинале, беше муза на големи режисери како Лукино Висконти, Федерико Фелини и Серџо Леоне. Таа глумеше во повеќе од 150 филмови во Италија, Франција и Холивуд и беше една од иконските актерки на италијанското кино, заедно со Џина Лолобриџида и Софија Лорен.

Почина на 23 септември минатата година во Немур, во близина на Париз, каде што живееше многу години.

Тагови: Клаудија Кардинале

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер