Денес тие испратија писмо во кое бараат средба со премиерот Зоран Заев, а на пратениците им даваат рок до крајот на месецов да ги усвојат нивните барања за намалување на бројот на предмети за полагање на државна матура. Велат дека доколку нивните барања не бидат изгласани, следуваат радикални протести.
-Доколку хипотетички, нема да се гласа во Собрание за менување на Законот за средно образование што ќе дозволи на матурантите да полагаат матура со само два предмета, тогаш ние ќе продолжиме со протест и до 1ви март очекуваме да кампуваме пред МОН, изјави Бленди Ходаи.
Предлог-измените на Законот за средно образование се очекува да бидат разгледувани на дневен ред во Собранието до крајот на оваа недела. Од ВМРО-ДПМНЕ велат дека очекуваат поддршка од пратениците на владејачкото мнозинство откако претходно измените ги подржаа сите опозициони партии,а начелна поддршка даде и ДУИ.
Сепак, останува нејасно дали партијата на Ахмети би гласала „ЗА“ и со тоа би обезбедила мнозинство за предлогот, доколку владините коалициони партнери од СДСМ останат „ПРОТИВ“. Одговор на ова прашање се обидовме да добиеме од координаторот на пратеничката група Изет Меџети и пратеникот и екс-министер за образование Арбер Адеми, но до почетокот на вестите не добивме.
Засега, министерството за образование останува на ставот дека промени во државната матура годинава не се можни..
-Јас би сакала заеднички да стигнеме до решение, но не смееме да им го ограничиме правото на учениците да полагаат матура и да се запишат на факултетите.... заради тоа што ние минатата година бевме негативен пример во регионот и светот... наши ученици останаа незапишани на факултет, изјави Мила Царовска.
Предлог измените предвидуваат оваа година, матурантите наместо 4 да полагаат 2 предмета. Македонски јазик и литература и еден изборен предмет- сроден со факултетот на кој ќе се запишат.