Црногорецот Јован Клишиќ, кој беше убиен утрово во престрелка во Бар, е познат од порано на полицијата , а тамошните медиуми го опишуваат како еден од водачите на барскиот клан. Велизар Гардашевиќ, кој беше ранет во пресметката, е исто така познат на полицијата, пренесува белградски Блиц.

Откако непознати напаѓачи испукале повеќе куршуми во правец на Гардашевиќ и Клишиќ, двајцата биле пренесени во болница, но Клишиќ таму починал.

Додека бегале од местото на настанот, напаѓачите оштетиле неколку автомобили и контејнери на блискиот паркинг.

Набргу потоа, бил најден запален автомобилот „Сеат“, кој, наводно, бил користен во убиството.

Според очевидци, граѓаните кои биле во близина на местото на пукањето бегале во паника, јавуваат црногорските медиуми.

Јован Клишиќ беше ослободен од затвор во август, по што полицијата постојано го бараше и го повикуваше на информативни разговори.

Причината веројатно лежи во фактот дека, како што наведуваат црногорските медиуми, тој е етикетиран како еден од водачите на криминалниот барски клан.