Средба на Џафери со делегација од Стопанската комора на Македонија – Турција

Претседателот на Собранието Талат Џафери и пратеничката група за соработка со Парламентот на Р. Турција  денеска остварија средба со делегација од Стопанската комора на Македонија – Турција (МАТТО).

Претседателот на Собранието Талат Џафери и пратеничката група за соработка со Парламентот на Република Турција, во состав Енес Ибрахим, Амди Бајрам, Јусуф Хасани, Теута Биљали и Драган Цуклев, денеска остварија средба со делегација од Стопанската комора на Македонија – Турција (МАТТО), предводена од претседателот на МАТТО, Ајдован Адемоски, во состав Есер Џевахир, Имер Селмани и Турхан Адеми и извршниот директор Шахпаз Молалиев.

На средбата, како што информираат од собраниската прес-служба, биле разменети мислења и предлози за подобрување на бизнисот и унапредување на економскиот развој на Република Македонија, при што било оценето дека интензивните и пријателски билатерални односи меѓу Република Македонија и Република Турција отвораат простор за уште поинтензивна економска соработка меѓу двете земји.

Претседателот на Собранието Џафери, се вели во соопштението, на средбата изразил задоволство од воспоставувањето на комуникација и институционална соработка меѓу Собранието и МАТТО, истакнувајќи го значајниот придонес на трговската размена меѓу двете земји, ккао и на турските инвестиции во земјава кон економските текови и буџетот на државата. Истовремено, тој го подвлекол значењето на соработката на МАТТО со сите стопански комори во земјава.

Нагласувајќи дека во изминатиот период главниот придонес на економската соработка беше фокусиран во Скопје и во југоисточниот дел од земјата, тој се заложи за зголемување на соработка и инвестициите во западниот и југозападниот дел од Република Македонија. Претседателот на Собранието истакна дека меѓу пратениците од власта и опозицијата не постои разлика во врска со економските прашања, односно постои консензус за потребата за унапредување на економскиот развој и соработка.

Претседателот на МАТТО Ајдован Адемоски, се вели во соопштението, изразил задоволство што законодавниот дом е отворен кон бизнис-заедницата и информираше дека во МАТТО членуваат околу 100 еминентни компании од земјава и инвеститори од Република Турција, кои вработуваат речиси 10.000 граѓани на Република Македонија. Тој посочи дека турските инвестиции во земјава изнесуваат две милијарди УСД, а вкупната трговска размена меѓу Македонија и Турција повеќе од 521 милиони УСД, со заложба истата да се зголеми до една милијарда УСД.

Претставниците на МАТТО се заложиле за понатамошна либерализација на Договорот за слободна трговија меѓу Македонија и Турција, со што во голема мера ќе се зголеми обемот на трговска размена и ќе се унапреди влезот на домашните компании на турскиот пазар.

На средбата било истакнато дека МАТТО спроведува активности во доменот на општествената одговорност, како што се стипендии за средношколци и студенти, при што Република Македонија би можела да стане „оаза на образованието", доколку се олесни влезот на идните странски студенти.

На крајот од средбата, претседателот Џафери истакнал дека Собранието останува отворено за соработка со бизнис-секторот и ги повика претставниците на МАТТО да се обратат до пратениците за сите отворени прашања, бидејќи преку институтот „пратенички прашања" може да се даде јавност на нивните деловни активности и да се поттикне Владата да ги адресира сите предизвици.

ЦУК: Спасен овчар заглавен на речен остров во водите на Црна Река

Спасен е овчар заглавен на речен остров во надојдените води на Црна Река, заедно со неговите стотина овци, соопштија вечерва од Центар за управување со кризи.  

Оттаму нагласија дека сега овчарот и овците се на безбедно место, откако се намалило нивото на водата и тие биле евакуирани.

- Центарот за управување со кризи известува дека од единствениот број за итни случаи 112, до Секторот за операции и координација, во 17:32 часот добил информација за заглавен овчар среде Црна Река, со неговите стотина овци, на мало островче на 200 метри лоцирано под селото Манастирец во општина Росоман. Реката била надојдена заради зголемен проток при производство на електрична енергија од страна на АД „ЕЛЕМ“ ПО „ХЕЦ Тиквеш Водостопанство Тиквеш“. ЦУК презеде координативни активности за да се запре протокот на вода од Акумулација „Тиквеш“ и да се намали нивото на реката, соопштија од Центарот.

Од ЦУК веднаш биле преземени сите неопходни мерки.

- Овчарот чекаше нивото на реката да се намали за заедно со неговите овци да се засолни на безбедно место. При ваков случај, било потребно три до четири часа да се намали нивото на водата. Инаку, на лице место е испратена екипа на МВР – ПС Кавадарци, а во контакт со градоначалникот на Општина Росоман е добиена потврда дека и од таму ќе биде пратена екипа, информираа од ЦУК.

Видео: Пагани вреден два милиони снимен на поплавените улици во Дубаи

Велат дека е тенка линијата помеѓу храброста и глупоста.

Веројатно веќе сте виделе снимки од поплавениот Дубаи на социјалните мрежи - градот се соочи со рекордни врнежи од дожд, но ниту тоа не можеше да го спречи возачот на „Pagani Utopia“ на патот до целта.

Возилата вредни повеќе од два милиони евра најчесто се заклучуваат некаде за случајно да не се оштетат. Меѓутоа, овде тоа не беше случај.

Се гледа дека возачот на почетокот малку се двоумел, но на крајот храбро решил да помине низ поплавените улици. Тој ризикуваше, може да тргне наопаку и да го чини десетици илјади поправки, со оглед на тоа што автомобилот е речиси „залепен“ за земја.

„Pagani Utopia“ е многу ретка глетка, бидејќи се направени само 99 примери. Сите имаат твин-турбо 6.0-литарски AMG V-12 мотор кој испорачува 852 КС. Претпоставуваме дека нема оштетувања на болидот, но сепак треба да се признае за храброста (или лудоста) на овој возач.

Извор: Б92

Жителите на Канарските острови демонстрираа против масовниот туризам

 Десетици илјади луѓе демонстрираа денеска на шпанските Канарски острови во знак на протест против масовниот туризам на архипелагот во Атлантскиот Океан во близина на брегот на Африка.

Според полицијата имало 20.000 луѓе, а според организаторите 50.000 во поворки низ улиците на градовите на Канарските острови, кои свиреле и извикувале слогани против неограничен туризам.

Демонстрантите носеа натписи „Жителите на Канарските острови не се на продажба“, „Мораториум на туризамот“ и „Почитувај го местото каде што живеам“.

За организаторите на демонстрациите, сегашниот економски модел е штетен и за жителите и за животната средина. Бараат надлежните да го ограничат бројот на туристи.

„Ние не сме против туризмот. Само бараме да го сменат сегашниот модел кој овозможува неограничен раст на туризмот“, рече еден од демонстрантите.

Насобраните бараат да се запре изградбата на два нови хотели на Тенерифе, најголемиот и најразвиениот од седумте острови на архипелагот, а жителите да имаат право на глас при донесувањето одлуки за развој на туризмот.

Демонстрации на поддршка беа одржани и во Мадрид и Барселона.

Сместени на брегот на Северна Африка, Канарските Острови привлекуваат туристи со нивните вулкански пејзажи и сончеви плажи. Архипелагот со 2,2 милиони жители лани примил 16 милиони туристи.

Една четвртина од населението работи во туризмот, што носи 36 отсто од бруто домашниот производ (БДП). /МИА

притисни ентер