Изборната листа „Александар Вучиќ - Србија не смее да запре“ на владеачката Српска напредна странка (СНС) ја поддржуваат 39,2 отсто од граѓаните, додека 25,8 отсто од испитаниците би се определиле за листата на проевропската опозиција „Србија против насилството“, покажа ноемвриското истражување на Новата српска политичка мисла (НСПМ), јави дописникот на МИА од Белград.
Според оваа анкета, изборната листа на Социјалистичката партија на Србија (СПС) на „Ивица Дачиќ за премиер“ би освоила 8,1 отсто, а 8,4 отсто од граѓаните одговориле дека би гласале за опозицијата, но не знаат за кого.
Опозициските партии од десницата, Двери и Заветници заедно имаат поддршка од 5,1 отсто од гласачите, коалицијата Нада составена од Нов ДСС и Покс има 4,4, а прагот би го поминала и Народната партија на Вук Јеремиќ со 3,2 отсто поддршка.
Според досегашното истражување, коалицијата на СДС-партијата на поранешниот петседател Брис Тадиќ и Доста беше има 2,5 отсто од гласачите.
Како што соопшти НСПМ, 38,8 отсто од анкетираните го поддржуваат влезот на Србија во ЕУ, додека 63,4 отсто од анкетираните поддржуваат посилни врски со Русија и Кина и земјите од БРИКС.
Вонредните парламентарни, покраински, локални и избори за градот Белград ќе се одржат на 17 декември. /МИА