Долго време ќе биде потребно да заздрават лузните од изгорениците на повредените во трагедијата во Кочани...Вака лекарите кои сè уште прават реевалуација на нивната здравствена состојба ги објаснуваат повредите на пациените од Кочани, и на оние кои се вратија од странство, но и на тие што се лекуваа во земјава. Досега повторни прегледи од страна на стручен тим на лекари од Скопје кои одат во кочанската болница се завршени на околу 140 млади луѓе, но евалуацијата продолжува и во наредните денови, потврдува за Канал 5 заменик министерот за здравство Јовица Андовски.

Резултатите од прегледите, длабочините на раните, зафатената површина на кожата и целосната моментална здравствена состојба всушност ќе бидат и проценка за Црвениот крст, за да го префрлат остатокот од собраните парични сретства на оние на кои им е најпотребна. Досега од собраните околу 2 ипол милиони евра веќе се исплатени околу еден милион и 700 илјади евра, дел за семејствата на починатите, а останатите за повредени лица..

Од платформата „Support Kocani” чии волонтери комуницираат дирекно со повредените велат дека најмногу им се потребни лепенки за изгорениците и компресивни ракавици.

-Во фокус ни е набавката на комресивна облека која значи подобар третман за изгорениците и лузните. Имаме обезбедено донација од 40.000 евра од нашата дијаспора во Италија, веќе е набавена компресивната облека, а очекуваме во наредните недели да пристигне во државата. Согласно нашата евиденција, има околу 600000 евра дирекни донации до лицата, до нивните сметки, тој податок поминал низ филтерот, односно донаторот приложил и доказ до нас. Има заедничка донаторска сметка, има определена сума на парични сретства која ќе биде распределена до засегнатите лица, очекуваме тоа да се случи наредниот месец. - Кристина Петрова - „Support Kocani”.

Инаку, и после два месеци од трагедијата во која 62 лица ги загубија животите, а околу 200 беа повредени, 11 сè уште се на лекување во странство.

За помош на семејствата на загинатите и повредените, опозициската СДСМ предложи и посебен закон, но власта го отфрли со оценка дека е обид за добивање на политички поенти на сметка на трагедијата..

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.