Здравје

Спанаќот е здрава намирница, но ако го приготвувате вака е отров!

Еве која група на луѓе не би требало да го јаде

Спанаќот се расипува најбрзо во однос на другиот лиснат зеленчук.

Спанаќот е несомнено една од најздравите намирници. Треба да се внимава при консумирање, најдобро е да се подготви онолку колку што ќе изедеме, бидејќи подгревањето на спанаќот воопшто не се препорачува.

Спанаќот (најдобар е младиот) може да се јаде свеж, како салата. Богат е со витамини А, Ц, бета-каротен и фолна киселина. Овој зеленчук долго време се смета за најдобар извор на железо, што е неточно, бидејќи не го содржи во големи количини. Затоа, не можеме да очекуваме поголема корист во третманот на анемија од јадење оброк со оваа храна.

Совети за подготовка

* Секогаш купувајте свеж спанаќ, проверете дали стеблото и листовите не се жолти.

* Пред подготовката, потребно е добро да се измие спанаќот за да се отстрани преостанатата земја и другите нечистотии од листовите.

* Подготвениот спанаќ изедете го истиот ден, бидејќи не треба да се остава долго време, ниту пак треба да се подгрева.

* Остатоците од приготвениот спанаќ не треба да се чуваат на собна температура. Тие треба веднаш да се стават во фрижидер.

* Не се препорачува да се подготвува како чорба со брашно и маст од животинско потекло бидејќи може да предизвика дијареја.

* За да се зачуваат витамините и минералите, треба да се вари на пареа или во многу мала количина врела вода околу пет минути.

* Треба да се приготви со млеко за да се отстрани оксалната киселина, која се врзува за калциумот, создавајќи калциум оксалат и на тој начин се исфрла од телото. Можете исто така да користите некои млечни производи (јогурт, павлака, свежо сирење).

Кому може да му наштети?

Спанаќот содржи и одредени количини на оксална киселина, која поради високата концентрација на пурини може да предизвика проблеми кај пациентите со бубрежни заболувања, а треба да ја избегнуваат оние со гихт, жолчни камења и артритис.

Бидете внимателни, брзо се расипува

1. Единствената маана на спанаќот е што брзо се расипува бидејќи листовите му се нежни, а една од причините за тоа е големата количина на вода што ја содржи (90%).

2. Расипаниот спанаќ изгледа „лигаво“ или има непријатен мирис. Сепак, постои начин да се продолжи неговиот век на траење. Трикот е во тоа да остане сув. Затоа, треба да се измие непосредно пред готвењето.

3. Препорачливо е спанаќот да се консумира во рок од три дена, а можете и да го замрзнете, но пред тоа треба да го бланширате во врела вода две минути - додека не добие светло зелена боја, а потоа да го изладите под ладна вода. После тоа, се става во кеси за замрзнување, па се додава во јадењата на крајот од готвењето.

Зошто треба почесто да јадете спанаќ

Свежиот спанаќ е одличен извор на витамини А и Ц, лутеин и бета-каротен. Во комбинација истите формираат одлична заштита од разни болести.

Овој зеленчук е исто така богат со минерали како што се калиум (важен за снабдување на клетките со вода, регулирање на срцевиот ритам и крвниот притисок), магнезиум, манган, цинк (неопходен за раст и развој, производство на квалитетна сперма и подобрување на варењето) и бакар, кој му е потребен на телото за производство на црвени крвни зрнца. Тоа е одличен извор на омега-3 масни киселини, кои ја подобруваат концентрацијата и штитат од срцеви заболувања и срцев удар.

Бидејќи сезоната на спанаќ штотуку започна, тој сега е млад и има најдобар вкус.

Фудбал

Халанд ја опиша сезоната на Сити како „ужасна“

Достигнувањето до трето последователно финале на ФА Купот и евентуалното квалификување за Лигата на шампионите не е доволно за најдобриот стрелец на Манчестер Сити, Ерлинг Халанд, кој ја опиша сезоната како „ужасна“.

Норвежанецот, кој го продолжи договорот со Сити до 2034 година, за Би-Би-Си Спорт изјави дека играчите не се доволно добри.

-Добра традиција е да се игра на „Вембли“ за важни трофеи. Имаме финале на ФА Купот, кое треба да го играме по ужасната сезона, што кажува сè. Кога ја освојуваш титулата четири пати по ред, а не ја освојуваш петтата, тоа не е успешна сезона. Тоа се стандардите што си ги поставивме самите на себе. Не бевме доволно добри, но сепак се надеваме дека ќе се квалификуваме за Лигата на шампионите, изјави тој.

Сити ќе игра против Кристал Палас во финалето во сабота и е четврти во лигата, два бода пред петтопласираниот Челси.

-Не бевме доволно стабилни, секако имаше повреди во текот на сезоната. Но, не бараме изговори. Секој од нас не беше доволно добар и не бевме на свое ниво, а кога е тоа случај, не се добиваат натпреварите бидејќи првенството е многу тешко, сигурен е тој.

Норвешкиот репрезентативец постигна 21 гол во текот на сезоната, но исто така беше надвор од терените еден месец поради повреда на глуждот во март.

Тагови: Манчестер сити Халанд

Свет

Трамп: Мој приоритет е да се стави крај на конфликтите

Претседателот на САД, Доналд Трамп денеска за време на посетата на најголемата американска воена база на Блискиот Исток, која се наоѓа во Катар, изјави дека негов приоритет е „прекин на конфликтите, а не нивно започнување“.

„Како претседател, мој приоритет е да се стави крај на конфликтите, а не нивно започнување. Но, нема да се двоумам да распоредам американски сили доколку е потребно за да ги заштитам САД и нашите партнери“, рече тој пред американските сили во Катар, една од земјите кои ги посети во рамки на неговата турнеја низ Блискиот Исток.

Трамп, исто така, рече дека непријателствата меѓу Индија и Пакистан се решени и ги повика двете земји да се фокусираат на трговијата наместо на војната.

„Двете страни се задоволни од развојот на настаните, додаде Трамп.

Тагови: Доналд Трамп

Живот

ТикТок го крши Законот за дигитални услуги на ЕУ, покажа прелиминарна истрага на ЕК

Социјалната мрежа ТикТок не ги почитува преземените обврски од Законот за дигитални услуги (ДСА) во однос на т.н. „складиште на реклами“, соопшти денеска Европската комисија врз основа на наодите од нејзината прелиминарна истрага.

„Складиштето на реклами“ е база на податоци или архива која содржи податоци за рекламите, вклучувајќи ја нивната содржина, спонзори, трошоци и должина на траење и емитување. Примарна цел на оваа база е поголема транспарентност на онлајн рекламирањето и можност на истражителите, надзорните тела и јавноста да имаат пристап до податоците за рекламите.

Комисијата посочува дека ова „складиште на реклами“ е клучно за откривање на реклами со кои се мамат граѓаните и кои се користат за кампањи со хибридни закани и координирани информативни операции, вклучително и во контекст на избори.

- Комисијата утврди дека ТикТок не ги обезбедува потребните информации за содржината на рекламите, за корисниците кон кои се насочени рекламите и за тоа кој платил за рекламите. Покрај тоа, „складиштето за реклами“ на ТикТок не овозможува сеопфатно пребарување на рекламите врз основа на овие информации, со што се ограничува корисноста на алатката, се додава во соопштението на ЕК.

Комисијата посочи и дека за прелиминарни наоди од истрагата веќе го информирала ТикТок, кој сега има право на одбрана со проверка на документите од истражната постапка и давање писмен одговор на забелешките.

Доколку во понатамошните фази на истрагата бидат потврдени прелиминарните наоди, тогаш Комисијата може да му изрече парична казна на ТикТок во висина до шест отсто од вкупниот негов годишен промет на глобално ниво, како и да го засили надзор врз социјалната мрежа.

Формална постапка против Тик Ток, Европската комисија ја започна на 19 февруари минатата година и со неа покрај проценката за транспарентноста на рекламирањето, беа оценувани и негативните ефекти од дизајнот на алгоритамските системи, гарантирањето на високо ниво на приватност, безбедноста и сигурноста за малолетници, како и можноста на истражителите за пристап до информации, за што истрагата продолжува.

Паралелно со ова, ЕК во декември 2024 година започна истрага против ТикТок и за начинот на справување со ризиците поврзани со изборите и граѓанскиот дискурс, која исто така е во тек.

Тагови: Тик Ток