Членовите на Советот за безбедност на ОН започнаа разговори за резолуции за заштита на комерцијалниот превоз во и околу Ормутскиот теснец, при што Бахреин предложи употреба на „сите потребни средства“, на што Франција се спротивставува, предупредувајќи дека таков текст веројатно нема да добие поддршка.

Дипломатите изјавија за Ројтерс дека нацрт-документот на Бахреин, поддржан од земјите од Заливот и САД, предвидува употреба на сила преку формулацијата „сите потребни средства“, што е стандарден дипломатски јазик за овластување на воена акција.

Сепак, Франција понуди поумерен алтернативен текст, а во тек се разговори за да се види дали двата предлози можат да се усогласат.

Францускиот министер за надворешни работи Жан-Ноел Баро рече дека не е сигурно дека предлогот на Бахреин ќе ја добие потребната поддршка од членовите, велејќи дека наредните денови ќе бидат клучни.

Нацрт-документот на Бахреин ги опишува постапките на Иран како закана за меѓународниот мир и безбедност и им овластува на државите, поединечно или преку мултинационални поморски коалиции, да користат „сите потребни средства“ за да обезбедат слобода на пловидба и да спречат мешање во меѓународната пловидба, вклучително и во територијалните води на земјите што се граничат со теснецот.

Исто така, изразува подготвеност за воведување мерки, вклучително и целни санкции.

Амбасадорот на Бахреин во Франција, Есам ал-Џасем, изјави дека разговорите се во рана фаза, оценувајќи дека меѓународните коалиции би можеле да придонесат за безбедноста на водните патишта, но дека тие главно реагираат на настаните, без да се осврнат на причините за ескалација.

Текстот на резолуцијата бара Иран веднаш да ги прекине нападите врз трговските бродови и сите обиди за попречување на слободата на пловидба во Ормутскиот теснец.

Сепак, дипломатите проценуваат дека шансите за усвојување на таква резолуција се мали, бидејќи сојузниците на Иран, Русија и Кина, би можеле да стават вето.

Резолуцијата бара најмалку девет гласа „за“ и без вето од постојаните членки, Русија, Кина, САД, Обединетото Кралство и Франција.

Францускиот нацрт не го споменува Иран и не се базира на Поглавје VII од Повелбата на ОН, но ги повикува сите страни да покажат воздржаност, да ги прекинат непријателствата во Персискиот Залив, Ормутскиот теснец и Оманскиот Залив и да се вратат на дипломатијата.

Наместо да овластува употреба на сила, предлогот ги охрабрува државите заинтересирани за поморски патишта да координираат исклучиво одбранбени мерки, вклучително и придружба на трговски бродови, со целосно почитување на меѓународното право и правото на морето.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.