Свет

Сослушување во Конгресот: НЛО се реалност, многумина се плашат да кажат дека виделе

Работната група за декласификација на федералните тајни на американскиот Конгрес вчера одржа сослушување насловено „Враќање на јавната доверба преку транспарентност за НАФ и заштита на свиркачите“.

За време на сослушувањето, членовите ги слушнаа сведоците за постојаните грижи во врска со обелоденувањето на неидентификуваните аномални феномени (НАФ) (Unidentified anomalous phenomena – UAPs) и информациите што ги поседуваат федералните агенции. Конгресмените ги испитаа прашањата за транспарентност во Канцеларијата за решавање аномалии во сите домени (All-Domain Anomaly Resolution Office-AARO) на федералната влада и разузнавачката заедница. Членовите, исто така, анализираа начини на кои Конгресот може подобро да ги заштити свиркачите кои излегуваат во јавност со информации за НАФ, соопшти американскиот Конгрес.

Новинарот за НАФ, Џорџ Кнап, во неговата воведна изјава сведочеше дека на јавноста од доцните 40-ти години постојано и се кажуваше дека нема ништо за што треба да се грижи.

- Овие мистериозни летала видени од милиони луѓе на небото, во океаните, над земјата, не се реални. Тие не се закана. Сведоците се погрешни. Тие се луди. Не им верувајте. Тоа се смени за мене. Она што ме „закачи“ за темата е трагата од документи. Документи што протекоа од владата на САД откако Законот за слобода на информации (Freedom of Information Act – FOIA) стана закон на земјата. И тие документи даваат многу поинаква слика отколку она што на јавноста, на печатот и на Конгресот им беше кажувано во текот на многу години. Документите од воениот и разузнавачкиот персонал зад затворени врати признаваат дека овие работи се реални. Тие не се фиктивни. Тие можат да летаат во формација, тие се евазивни, и тие ги надминуваат перформансите на кој било авион што постои, вклучувајќи ги и нашите. На јавноста, се разбира, како што реков, ѝ е кажано нешто многу поинакво, рече Кнап.

Офицерот во американската морнарица, началникот Александро Вигинс нагласи три точки за работната група и комитетот.

- Безбедност на воздушниот и поморскиот сообраќај: кога екипажите и чуварите забележуваат објекти кои маневрираат или забрзуваат на начини што не се совпаѓаат со познатите профили и го прават тоа во близина на нашите бродови и авиони, тоа е првенствено безбедносен проблем. Стандардизираната листа за проверка и обуката треба да обезбедат да ги снимиме најдобрите можни податоци од сензорите во реално време, вклучувајќи ги поставките за воздух, проценките на косиот опсег и снимките на висината на насоката и опсегот, и веднаш да се промени синџирот на чување за сите записи, рече тој.

Задржувањето на информации ја поткопува довербата на Американците во федералната влада

Ветеранот на американските воздухопловни сили, Џефри Нучетели, нагласи дека транспарентноста е основата на вистината.

- Без неа, сведоците како нас се отфрлени. Заштитете ги сведоците. Многумина молчат од страв за нивните кариери, углед и безбедноста на нивните семејства. Заштитете ги и ќе охрабрите други да се приклучат на оваа кауза. Овие феномени ги предизвикуваат нашите најдлабоки претпоставки за реалноста, свеста и нашето место во универзумот. Нивното истражување може да отклучи трансформативни откритија во технологијата, биологијата и човековото разбирање, нагласи тој.

Началникот Вигинс сведочеше дека „известувањето мора да е без стигма, и да се обезбеди заштита без одмазда“.

- Морнарите треба да знаат дека пријавувањето на средби со НАФ нема да им наштети на нивните кариери. Конгресот може да помогне со зајакнување на заштитата на сведоците и со насочување на надлежната канцеларија да одржува доверливи канали без стигма за припадниците на службата кои излегуваат со податоци наведе Вигинс.

Новинарот Кнап сведочеше дека „луѓето кои виделе чудни нешта и одлучиле да му кажат на светот за тоа, свиркачите и сведоците кои се пријавуваат се рутински навредувани, омаловажувани, или полошо“.

- Тие ги ризикуваа нивните репутации, нивните кариери, нивните дозволи, нивните средства за живот, а понекогаш и многу повеќе од тоа, дури и нивната слобода. Знам дека една од целите на работната група овде е да најде начини да ги заштити свиркачите и сведоците, рече Кнап.

Ветеранот на американските воздухопловни сили, Дилан Борланд, во неговата воведна изјава сведочеше дека „бројни поединци излегоа во јавност на различни начини за да ја откријат вистината за реалноста на НАФ како патриоти и бранители на нацијата“.

- Сепак, многумина се чувствуваат отфрлени, изолирани, безнадежни, одвоени од земјата на која ѝ служат. Напорите за поправање на оваа ситуација за сите свиркачи беа тешки во проблематични услови, истакна Борланд.

Одговарајќи на прашањето на конгресменот Тим Бурчет за тоа како Конгресот може дополнително да ја зголеми заштитата за свиркачите, новинарот Џорџ Кнап предложи да се следи патеката на парите. Тој сугерираше дека многу од информациите за НАФ биле преместени од владата на приватни компании кои ги чуваат.

Кнап истакна дека информациите поврзани со НАФ веќе не се чуваат само во владини агенции, туку се предадени на приватни компании. Според него, овие компании ги криеле податоците толку долго што малку луѓе во самата влада знаат каде се наоѓаат. Затоа, тој предложи дека заштитата на свиркачите може да се зајакне со откривање на финансиските текови и договорите што довеле до пренесување на овие информации на приватни субјекти. Со тоа, ќе се создаде притисок за поголема транспарентност и ќе се овозможи на свиркачите да излезат во јавност без страв од одмазда, бидејќи ќе бидат заштитени со закон.

Како одговор на прашањето на конгресменот Бурчет за тоа дали информациите се преместувале за да се избегне Законот за слобода на информации (FOIA), Кнап потврди дека тоа е точно. Тој истакна дека приватни компании со години ги преземале информациите и воспоставиле сопствени стандарди за тоа кој смее да знае и што.

- Многу мал број луѓе имаат пристап до овие информации, нагласи тој.

Кнап се сомнева дека дури и со безбедносна дозвола, Комитетот ќе може да ја следи вистинската трага на информациите, што покажува дека системот е многу сложен и наменски создаден за да се скрие.

На сослушувањето конгресменот Ерик Бурлисон го праша началникот Вигинс, за тоа како може да се подобрат протоколите и транспарентноста за да се зачуваат и документираат ваквите забележувања.

Вигинс објасни дека војниците на активна должност, како и тој самиот, не се обучени за тоа што да прават кога ќе видат вакви феномени. Тие се фокусирани на извршување на својата воена мисија и немаат јасни насоки за пријавување на НАФ.

Тој нагласи дека е клучно да се воспостават јасни процедури за пријавување за активните војници и да се осигура дека нема да има никаков вид на одмазда за оние кои зборуваат. Вигинс истакна дека поискусните војници, како него, со 24 години служба, можеби ќе се чувствуваат посигурни, но помладите војници со само две години стаж би можеле да се плашат да пријават, стравувајќи за својата кариера.

- Како активен член на морнарицата, нашата мисија е да ја извршуваме мисијата на бродот или мисијата на командата. И ние, генерално, немаме знаење што да правиме кога ќе видиме вакви работи. Едноставно немаме. Таму сме за да ја извршиме нашата мисија и да правиме она што е кажано за нас. Затоа мислам дека би било важно да им се даде на активните членови јасна насока како можат да пријавуваат вакви работи и да се осигураме дека имаме стандардно ниво на разбирање дека нема да има никакво ниво на одмазда или нешто слично, бидејќи, знаете … Јас сум во морнарицата речиси 24 години, но што е со морнарите кои се само две години и кои доживеале вакви работи? Тие нема да имаат знаење, или веројатно ќе се плашат малку повеќе да проговорат, бидејќи во тој момент нивната кариера штотуку почнува, рече Вигинс.

Конгресменот Скот Пери постави прашања до сведокот Нучетели за владиното вклучување во истражувањето на неидентификувани летечки феномени кои тој ги забележал.

Конгресменот Пери го праша Нучетели дали неговата команда спровела истрага или дали некој се обидел да го интервјуира во врска со настанот.

- Спроведовме истраги во реално време. Ги документираме сите докази. Но, што се однесува до било што од повисоко ниво, не знам дали имало истрага, не се појавија информации за тоа што треба да направиме, рече Нучетели и додаде дека никој друг н ги прашал ништо.

Конгресменот Пери нагласи дека то е „чудно“, бидејќи се работело за операции од милиони или дури милијарди долари поврзани со националната безбедност, а сепак имало аномалија. Тој индиректно сугерираше дека владата не покажала интерес за ваквите настани и не сакала да се занимава со нив.

Можност за владина измама со НЛО

Конгресменката Ненси Мејс го праша Кнап дали верува дека е можно неидентификуваните летечки феномени да се психолошка операција на американската влада.

Кнап одговори дека тоа е „сосема можно“. Тој истакна дека и американската влада и други влади признале дека користеле НЛО приказни за да прикријат тајни проекти. Сепак, Кнап додаде дека владата, исто така, врши „обратен инженеринг“ на овие тврдења. Тој објасни дека откако луѓето ќе почнат да гледаат НЛО над, на пример, Зоната 51, владата подоцна измислува приказна и тврди дека таа приказна била намерно подметната.

Кнап го нарече овој процес „апсурден“. Тој даде пример од голем весник каде што прочитал дека владата намерно им подметнала лажни фотографии од НЛО на новинари преку полковник на воздухопловните сили во еден бар, со што започнала целата приказна за Зоната 51. Со ова, тој имплицираше дека владата создава лажна документација за да го контролира наративот за појавите, што ја отежнува потрагата по вистината.

Тагови: Конгрес НЛО

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Живот

Хобија со речиси ист ефект врз умот како и медитацијата

Кога станува збор за медитација, повеќето луѓе замислуваат мирно седење со затворени очи и фокус на дишењето.

Иако ова е најпозната форма на медитација, постојат неколку хобија кои можат да го смират умот и да го насочат вниманието на сегашниот момент.

Психолозите долго време истакнуваат дека одредени активности можат целосно да го преокупираат нашето внимание, така што секојдневните грижи и брзите мисли привремено исчезнуваат од фокусот, нивото на стрес се намалува.

1. Градинарство

Без разлика дали садите цвеќе, полевате зеленчук, плевите коров или ги посматрате растенијата, вниманието спонтано се насочува на она што се случува пред вас.

Растенијата растат по свое темпо, а градинарството нè потсетува дека некои работи не можат да се забрзаат, туку бараат грижа и внимание. Затоа ова хоби развива чувство на смиреност и прифаќање на природниот ритам на животот.

Особено радува кога ќе видите како вложениот труд во текот на неколку недели или месеци постепено се претвора во цвеќе, плодови или бујни билки. Видливиот напредок смирува, а свежиот воздух, движењето и фокусираното внимание ментално ве ослободува од товарот.

2. Печење од основни состојки

Правењето леб, колачи или други печива бара целосна концентрација - од мерењето на состојките и месењето тесто до крајниот производ.

За разлика од многу активности каде постојано го префрламе вниманието помеѓу пораките, електронската пошта и социјалните медиуми, печењето нè прави трпеливи. На тестото му треба доволно време да нарасне, а колачите не можат да се печат пред да им дојде времето. Во свет каде што сме навикнати на брзи резултати, печењето нè потсетува на важноста да успориме и да веруваме во процесот.

Споделувањето на она што сте го подготвиле со семејството или пријателите додава дополнителна емоционална вредност на ова хоби бидејќи поттикнува поврзување со другите.

3. Набљудување птици

Набљудувањето птици е еден од наједноставните начини да го вежбате вниманието. Наместо да размислуваме за утрешните задачи или минатите настани, фокусот се префрла на природата - движењето меѓу гранките, пеењето на птиците или воочувањето разлики меѓу видовите.

Ова хоби не бара никакво посебно предзнаење, ниту посета на национални паркови. Многу луѓе кога ќе обрнат внимание откриваат колку е разновиден дивиот свет во соседството, градските паркови, па дури и низ прозорецот.

4. Плетење или хеклање

Повторувањето на движењето со рацете има речиси терапевтски ефект. Плетењето и хеклањето бараат доволно концентрација за да го окупираат умот, но не дотолку за да предизвикаат дополнителен стрес. Затоа многу луѓе ги опишуваат овие активности како исклучително смирувачки.

Ритмот на движењата создава чувство на предвидливост и сигурност, а грешките не се причина за фрустрација. Доволно е да се расплетат неколку редови и да се продолжи понатаму, што исто така нè потсетува дека напредокот не мора да биде совршен за да биде вреден.

Друга предност на овие хобија е што напредокот е лесно видлив. Ред по ред, се создава шал, ќебе или друг предмет, што дава чувство на цел и покажува како малите, доследни чекори со текот на времето произведуваат конкретни резултати. По ментално напорен ден, комбинацијата од повторување, креативност и чувство на исполнетост може да има исклучително релаксирачки ефект.

5. Пешачење

Престојот во природа е еден од најприродните начини за смирување на умот. За време на подолга прошетка, вниманието спонтано се насочува кон патеката, пејзажот, временските прилики и на ритамот на сопствените чекори, наместо на мобилниот телефон и листата со обврски.

За разлика од вежбањето во затворен простор, природата постојано нуди нови глетки, звуци и мириси што нè враќаат во сегашниот момент и помагаат секојдневните проблеми да добијат поинаква перспектива.

6. Сликање или цртање

Изборот на бои, скицирањето форми, мешањето нијанси или испробувањето нови техники бара доволно концентрација што загрижувачките мисли постепено ја губат својата моќ.

Во уметноста, честопати не постои еден точен начин на работа, овозможува слобода за истражување, експериментирање и играње.

Многу возрасни се откажуваат од цртањето или сликањето зашто веруваат дека не се доволно талентирани или се премногу стари за такво хоби. Но, откажувањето од потребата за совршенство е често она што ги прави овие активности корисни за менталното здравје. Целта не е да се создаде ремек-дело, туку да си дозволите целосно да се посветите на креацијата.

Не постои универзален начин за опуштање

Важно е да се нагласи дека не постои „вистинско“ хоби или универзален метод на релаксација. Заедничко за сите овие активности е тоа што ни помагаат да го успориме темпото, да го намалиме нивото на стрес и барем накратко, да го стишиме ројот на мисли, токму како медитацијата.

Извор: ordinacija.vecernji.hr

Здравје

Урамнотежениот појадок е клучен за енергија во текот на денот

– Што е најдобро да се јаде наутро?

За појадокот да обезбеди доволно енергија за цел ден би требало да вклучува сложени јаглехидрати, протеини и здрави масти. Намирниците како овес, јајца и авокадо спречуваат ненадејни промени во нивото на шеќер во крвта, како и последичен замор, за разлика од појадокот што се сведува на кафе и печива.

Веројатно ви е познато чувството на краткотраен наплив на енергија после печиво од пекара, по кое набргу следува умор и повторно чувство на глас. За стабилно ниво на енергија, клучна е рамнотежата на макронутриенти кои гарантираат бавно и постепено ослободување на гликоза во крвотокот.

Сложените јаглехидрати се основа на енергијата

За појадокот да биде вистинско гориво за телото, тој мора да содржи избалансиран сооднос на сложени јаглехидрати, протеини и здрави масти. Комплексните јаглехидрати се клучни за утринската енергија бидејќи се варат побавно поради нивната висока содржина на влакна, за разлика од едноставните шеќери.

Кога го започнувате денот со овесна каша од цело зрно или интегрален леб со кисело тесто, на организмот му обезбедувате стабилен доток на гликоза без ненадејни скокови на шеќер. Хељдата и киноата имаат сличен ефект, а можат да се подготват и како топла утринска каша.

Протеини за долготрајна ситост

Само јаглехидратите не се доволни. За да се избегне пад на енергијата и да си обезбедите долготрајна ситост, важно е да се вклучат квалитетни протеини во оброкот. Јајцата се чест избор за појадок бидејќи содржат висококвалитетни протеини и витамини од групата Б, кои помагаат храната да се претвори во енергија.

Добри алтернативи се грчкиот јогурт и сирењето со малку маснотии, богати со казеин, протеин кој бавно се вари и на тој начин го продолжува чувството на ситост. За луѓето кои јадат храна базирана на растенија, тофуто е одличен извор на протеини и железо, чиј недостаток може да предизвика хроничен замор.

Улогата на здравите масти

Третиот важен елемент се здравите масти, кои обезбедуваат долготрајна издржливост. Авокадото, бадемите, оревите, чиа семето и ленено семе го забавуваат варењето на храната, го продолжуваат чувството на ситост и содржат магнезиум, минерал неопходен за производство на енергија во клетките. Лажица путер од кикирики или бадеми може да претвори обична чинија житарки во многу похранлив оброк.

Примери за избалансиран појадок

Сите горенаведени елементи можат лесно да се комбинираат. За солен појадок, можете да подготвите омлет од спанаќ и да го послужите со тост од цело зрно и малку авокадо. За оние кои сакаат слатки, овесната каша зготвена во вода или млеко може да се збогати со лажица протеини, шака боровинки и лажица семе од чиа за добар сооднос на влакна и антиоксиданси.

Кога немате многу време, решението е грчки јогурт измешан со шака бадеми и половина исечена банана. Таквиот оброк комбинира природни шеќери за брз почеток на денот и протеини кои обезбедуваат стабилност.

Што да се избегнува

За да се избегне ментална магла и замор кон средината на утрото, се препорачува да се избегнуваат печива направени од бело брашно и житарки во форма на снегулки и мусли, кои често содржат скриени шеќери.

Исто така, пиењето кафе на празен стомак веднаш по будењето може да го наруши природниот ритам на кортизол. Подобро е да го започнете денот со чаша вода, да јадете квалитетен појадок и да го испиете првото кафе дури околу еден час подоцна.

Извор: ordinacija.vecernji.hr

Автомобилизам

Шефот на „Aston Martin“ за рачните менувачи: „Многу покомплицирано отколку што изгледа“

„Aston Martin Valiant“ беше претставен на саемот за автомобили во Монтереј оваа недела, а изјавата на извршниот директор на компанијата за инсталирање рачни менувачи во „Aston Martin“ привлече внимание.

Извршниот директор на „Aston Martin“, Адриан Холмарк, објасни дека инсталирањето рачен менувач во модерен „Aston Martin“ е многу покомплицирано отколку што изгледа на прв поглед. Компанијата нудела рачни менувачи низ целата своја историја, но тие биле поврзани со постари архитектури на возила и електронски системи.

„Проблемот не е наоѓање рачен менувач, туку создавање електронски и адаптиран систем што може да работи со рачен менувач“, објасни Холмарк за „Road & Track“.

Голем дел од проблемот лежи токму во модерната електроника. Современите автомобили имаат сè поголем број системи за активна безбедност и помош на возачот, а некои од нив не се лесни за комбинирање со рачен менувач.

Холмарк особено ги издвои адаптивниот темпомат и системите за ублажување на последиците од судири. Според него, отстранувањето на овие функции или нивното прилагодување на рачниот менувач може да биде поскапо од развивањето на целосно нов рачен систем.

Сепак, примерите од други производители покажуваат дека не е технички невозможно да се комбинираат напредни системи за помош на возачот со рачен менувач. На пример, „Toyota GR86“ има адаптивен темпомат во сите верзии, додека „Honda Civic Type R“ исто така го има.

Затоа, останува уште едно важно прашање: дали развојот на таков систем е финансиски исплатлив?

Побарувачката за рачни менувачи повторно се зголеми меѓу ентузијастите, но тие сè уште претставуваат релативно мал дел од купувачите на скапи автомобили. Затоа, производителот мора да процени дали потенцијалната продажба ќе ги оправда трошоците за развој.

Холмарк, исто така, спомена интересно решение имплементирано од „Ferrari“ на „12Cilindri Manuale“. Иако автомобилот изгледа како да има класичен шестстепен мануелен менувач, тој всушност користи осумстепен менувач со двојна спојка, додека рачката на менувачот и педалата на спојката се дизајнирани да ја симулираат класичната конфигурација.

Според Холмарк, „Aston Martin“ потенцијално би можел да имплементира сличен концепт, но извршниот директор на компанијата досега одби да потврди дека такво решение е во фаза на изработка.

Извор: Б92

Тагови: Aston Martin мануелен менувач