Во одговор на вчерашната реакција на македонското МНР, кое изјавите на лидерот на националистичката „Преродба“ за припојување на Македонија кон Бугарија, ги нарече непримерни и со јасни територијални претензии, Костадинов на фејсбук статус денеска отиде чекор понатаму. Македонскиот премиер го советува што да прави за време на посетата на Вашингтон.
-Го советувам македонскиот премиер, кога ќе оди на инаугурацијата на Трамп во Вашингтон следната недела, лично да му го каже истото во однос на претензиите на САД кон Канада и Панамскиот канал. Освен тоа, очекувам македонското МНР да ја осуди изјавата на Трамп како „неконзистентна со духот и времето во кое живееме“. , пишува Костадинов на фејсбук.
И додека барањето од МНР, Софија да ги отфрли изјавите на Костадинов засега не наоѓа одек во Бугарија, во Македонија се нижат реакциите. Претседателката Сиљановска Давкова во гостување на Алфа пораките на бугарскиот пратеник ги оцени за непристоен предлог, кој е плод на фрустрации.
-Намерата не е чесна, намерата не е заради почит. Обратно. Намерата вака да се искаже едностранo, всушност значи непочитување, значи непризнавање. Тогаш мојот коментар е дека фрустрации се во прашање. , изјави Гордана Сиљановска Давкова, претседателка на Македонија.
Реагираа и од Вреди за кои Костадинов е маргинален проруски политичар, чии провокации ги отежнуваат напорите за динамизирање на европскиот пат на земјава. Неговите контроверзните изјави најдоа простор и во грчките медиуми. Предлогот по урнекот на Трамп за анексија на Македонија предизвика гнев во земјата, пишува грчкото издание на Еуроњуз. Лидерот на националистичка партија го имитира Трамп, додава „Њузбист“, во чии текстови се потенцира дека проруската „Преродба“ во моментов е трета политичка сила во Бугарија.