Македонија

Собранието ја донесе Одлуката за прераспределба на 12,5 милијарди денари буџетски средства

Собранието попладнево, со 60 гласа „за“ и девет против, ја донесе Одлуката за прераспределба на средствата помеѓу буџетските корисници на централната власт и помеѓу фондовите.

Како што рече претходно заменик-министерот за финансии Николче Јанкуловски, со Одлуката се врши алокација на 12,5 милијарди денари во рамки на веќе утврдената буџетска рамка, односно во рамки на утврдениот буџетски дефицит за 2025 година од четири проценти.

-Со Одлуката се врши реалокација на планираните средства меѓу буџетските корисници. Целта е соодветна реалокација со цел финансирање на приоритетните потреби на буџетските корисници во функција на уште поуспешна реализација на Буџетот за 2025 година. Со предложената одлука се обезбедуваат потребните финансиски средства за трансфери кон ПИОМ и Фондот за здравствено осигурување за законски обврски поврзани со исплатата на пензиите, придонеси за задолжително здравствено осигурување на лица кои немаат по ниту еден основ здравствено осигурување и за исплата на надоместок на плата за време на отсуство од работа поради бременост, раѓање и мајчинство. Исто така, во делот на социјалната сфера се обезбедуваат средства за поврат на придонеси од задолжително социјално осигурување за вработените во заштитните друштва, за исплата на социјални надоместоци на најранливите категории лица, истакна заменик-министерот.

Дополнително, рече, во областа на транспортот се планираат и средства за навремен трансфер кон ЈПДП за изградба на инфраструктурата - Коридор 8, делница Тетово - Гостивар - Бокојчани и проектот за автопат Требеништа - Струга - Ќафасан, како и Коридорот 10д, делница на автопатот Прилеп - Битола, како и средства за целосна исплата за изработка на подготвителна техничка документација за изградба на брза железница долж Коридорот 10 и за нормално функционирање на целокупниот железнички систем во државата.

-Со одлуката ќе се обезбедат и дополнителни средства за изработка на урбанистички планови и за плаќање контрибуција кон Меѓународната поморска организација. Се обезбедуваат и средства за трошоци во арбитражни постапки, лиценци, реконструкција на згради на владини органи и финансирање на слични тековни расходи, информира Јанкуловски.

Расправата ја почна пратеничката од СДСМ Сања Лукаревска, според која, „со оглед на тоа што е денеска тема на собраниската дискусија, земјава потфрла во секој поглед од економски аспект“. Таа конкретно праша зошто има намалување во Програмата „инфраструктурни проекти од општините“.

-Излегува на виделина се она што го зборуваше опозицијата. Скоро два месеца алармиравме дека има слаба реализација на капиталните расходи за 2025 година. И веќе, за среќа, власта успеа да го надмине прагот од 50 проценти на реализација, па денес влегува во некоја бројка од скоро 51 процент. Но, преку оваа Предлог-одлука може да се види кои буџетски корисници немаат сработено ништо, единствено немаме одговор - зошто тоа не го сработиле. Евидентно е дека има намалување на капитални расходи и зголемување на непродуктивните трошоци, нагласи Лукаревска, оценувајќи дека цените во земјава и натаму галопираат, кошничките не го дадоа ефектот, а нема, како што рече, ниту развој, ниту раст.

Јанкуловски на ова одговори дека реалокацијата на средства е нешто сосема вообичаено што се прави на крајот од секоја година.

-Најверојатно бевте испровоцирани од денешната прес-конференција на министерката за финансии, за растот на БДП во третиот квартал од 3,8 проценти и не знам зошто тоа барем не го спомнавте во вашата дискусија. Знаете со каков раст ги оставивте буџетот и државата. Бидете убедени дека со близу 4 отсто ќе ја завршиме годината. И УЈП денеска соопшти дека даноците во јануари - ноември 2025 во споредба со лани се зголемиле од 120 на 128 милијарди денари или за 7,8 милијарди, а и социјалните придонеси исто, нагласи заменик-министерот.

Пратеникот Бојан Стојаноски од ВМРО-ДПМНЕ укажа дека претходната власт, на СДСМ, за разлика од сегашната, реалоцирала средства за ликвидност на претпријатија како ЕЛЕМ, но потоа се увидело каде завршиле тие средства, додека според Фатмир Битиќи и Јованка Тренчевска од СДСМ, зимата допрва доаѓа „и оваа Влада си игра држава, без да води грижа за граѓаните“. За збор се јави и Љупчо Пренџов кој и се обрати на Тренчевска, обвинувајќи ја дека навредува, манипулира и ги искривува фактите.

По 74. седница чиј дневен ред е исцрпен, Собранието попладнево, како што најави потпретседателот Антонијо Милошоски, продолжи со работа по 72. седница.

Тагови: Собранието

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

СДСМ: Додека Мицкоски со државен авион оди на екскурзија, народот со часови е блокиран на граница

Додека Христијан Мицкоски со државниот авион (што веќе го гледа како приватен) оди на своите екскурзии, граѓаните со часови чекаат на граница, поради неговата политика на изолација на државата.

И кај Стар Дојран е метеж, колоната е до „Св. Илија“.

Ова е реалната слика на политиката што ја спроведува организираната криминална група ВМРО-ОКГ и Мицкоски.

Половина од Владата има бугарски пасоши.

Нивните семејства имаат бугарски пасоши.

Имаат фирми во Бугарија.

Имаат европски пасоши и посебен премин на граница.

Тие си обезбедија Европа.

На граѓаните им обезбедија блокада, изолација и часови чекање под сонце.

Додека тие летаат, народот стои во колона.

Ова е нивна политика.

СДСМ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Фнидек во вонредна состојба по мигрантската криза

По масовниот наплив на мигранти кон шпанската енклава Сеута, состојбата во соседниот марокански град Фнидек останува крајно напната.

Властите воведоа засилени безбедносни мерки, додека стотици луѓе и натаму се обидуваат да стигнат до Европа.

Плажите во Фнидек се обезбедени со жичени огради и засилено полициско и воено присуство, со цел да се спречат нови обиди за нелегално преминување на границата со Сеута.

Мигрантите кои се вратија од шпанската енклава сведочат за тешки услови, недостиг на храна и насилство, додека многумина и понатаму не се откажуваат од обидите да стигнат до Европа.

Експертите оценуваат дека мигрантскиот бран е последица на влошените односи меѓу шпанија и мароко, поврзани со спорот за западна Сахара. Според проценките, во обидот за влез во сеута учествувале повеќе од 50 илјади луѓе.

Во меѓувреме, Европската унија подготвува итен состанок на министрите за внатрешни работи, на кој ќе се разгледуваат натамошните чекори за справување со мигрантската криза и зајакнување на соработката со Мароко.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Балкан

Во Грција и натаму беснее опасна огнената стихија

Во Грција и натаму беснее опасна огнената стихија. Пожарникарските служби водат тешка битка со десетици шумски пожари, а најкритична останува состојбата во регионот Атика.

Во Грција и натаму беснее опасна огнената стихија. Пожарникарските служби водат тешка битка со десетици шумски пожари, а најкритична останува состојбата во регионот Атика, каде еден од пожарите се доближи на само неколку километри од градот Мегара, кој е лоциран околу 50 километри западно од Атина. Градоначалникот ја оцени состојбата како хаотична, додека жителите на повеќе населени места добија предупредувачки пораки за евакуација.

Во гаснењето на пожарите се ангажирани стотици припадници на службите за итни интервенции, меѓу кои и пожарникари од Романија и Франција. Само во областа Порто Гермено се распоредени речиси 500 пожарникари, а дополнителни околу 100 интервенираат на северот од Пелопонез. Според грчката противпожарна служба, низ земјата се регистрирани 73 шумски пожари, од кои 51 избувнале во еден ден.

-Не знам. Пожарите се активни многу денови. Овде има црква, а изутринава видов на телевизија дека областа ја зафатила пожар. Пожарите се на 1 км далечина од овде. Фрустриран сум. Ми изгореа маслиновите дрва овде, а пожарот се уште е активен,- Тасос Ѕемпеликос - Локалец.

Првичните проценки покажуваат дека од почетокот на пожарите во Грција изгореле повеќе од 10 илјади хектари шума, како и куќи, штали и земјоделски површини. Како можна причина за големиот пожар кај Мегара се посочуваат небрижност на локалното население а во врска со случајот приведени се две лица.

-Пожарот е активен од вчера доцна вечерта. Очигледно е дека не може сегде да има пожарникари. Ние како локално население правиме се што можеме да помогнеме. Се мобилизиравме и на своите поседи го чиниме истото, да видиме дали е изгорено. Дали нешто е потребно да направиме до еден км од овде,- -Манолис Далас - Жител од регионот на Атика.

Трагедијата дополнително ја засени операцијата за гаснење откако кај Псата, западно од Атина, се судрија два противпожарни хеликоптери од типот „Бел“. Во несреќата загинаа дански пилот и грчки координатор, додека британскиот пилот и неговиот грчки колега беа повредени. По налог на обвинителството, полицијата спроведува истрага за причините за судирот. Со ова, бројот на жртви поврзани со пожарите во Грција се искачи на пет, откако претходно животот го загубија и тројца пожарникари.

Со големи пожари деновиве се соочува и поширокиот регион на јужна Европа. Високите температури, долготрајната суша и силните ветрови ја отежнуваат работата на пожарникарите во Франција и Шпанија, каде службите остануваат во состојба на висока подготвеност поради зголемениот ризик од нови огнени жаришта.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.