Манифестацијата се одржа на платото пред Домот за култура „Браќа Миладиновци“ во присуство на бројни странски и домашни поети, како и на владини претставници и љубители на пишаниот збор.

Поетската порака ја испрати македонскиот поет Милован Стефановски, која потенцираше дека Струга е светска престолнина на поезијата.

- Ако само за миг замислиме, а имагинацијата е непрегледно бескраен небесен океан, дека е можно овде, во една ваква августовска вечер, одеднаш да бидат присутни сите што доаѓале во изминатата повеќе од шестдецениска традиција на СВП, сигурно дека би добиле население колку за уште една Струга. Би добиле неверојатно преклопување на стапките по тротоарите и патеките од двете страни на Дрим на многу познати и признати светски поетски имиња и стожерни великани (Рафаел Алберти, Лу Јуан, Андреј Вознесенски, Ежен Гилвик). Нивните стапки се преклопуваат со стапките на нашите македонски поетски гордости (Блаже Конески, Ацо Шопов, Матеја Матевски, Анте Поповски), но и на поетските перјаници на блиските соседни народи (Десанка Максимовиќ, Фатос Арапи, Љубомир Левчев, Јанис Рицос). Тоа е една само навидум невидлива, но живо присутна мрежа со поетска плетка што ја варди Струга и во исто време во нераскинлива традиција ги поврзува поетите со сите вљубеници и поклоници на убавиот поетски збор. Таа поетска плетка како во огледало има одраз на ѕвезденото небо над Струга - истакна Стефановски.

Министерката за култура Бисера Костадиновска-Стојчевска вечерва, на платото пред Центарот за култура „Браќа Миладиновци“ во Струга, го отвори 62-то издание на „Струшките вечери на поезијата“. Таа во своето обраќање рече дека ехото на Миладиновци е присутно и денес и дека од година во година е сè погласно, посочувајќи дека нашата Струга е посебно место, каде на Мостовите на поезијата се сретнуваат и Истокот и Западот и место каде што сè уште боли „Т ́га за југ“.

- Продолжи тоа ехо благодарение и на Струшките вечери на поезијата, создадени по промислата на величествените македонски современи автори чија визија нè крепи и по децении од нивното заминување – додаде министерката.

Министерката Костадиновска-Стојчевска кажа дека Струга во својот полн сјај сведочи за визијата на големите македонски автори, кои со децении ја збогатуваат нашата култура, а „Струшките вечери на поезијата“ не се само славење на зборовите, туку и поетско рандеву кое е потврда на душата на човештвото.

– Македонскиот современ литературен јазик има збор за секоја песна, за секој стих, на сите поети од светот, за сè што е неизречено. Го има и изразот „вештачка интелигенција“, која можеби ќе напише и поема, ама никогаш нема да допре до длабоката тишина – посочи министерката за култура Бисера Костадиновска-Стојчевска.

За нејзиниот говор главна инспирација беа зборовите на лауреатот, годинашниот венценосец, академик Влада Урошевиќ, според кој „поетот не му е должен никому ништо, освен на јазикот на кој ги создава своите дела“, со кој се согласува и министерката за култура Костадиновска-Стојчевска, посочувајќи дека човештвото не може да и без поезија.

Годинашното фестивалско издание се одржува под мотото „Чувствотворен јазик“ со намера да се потенцира аспектот на поезијата и на поетскиот јазик како јазик творен, односно создаден од чувства, но и како јазик што создава чувства, во своето автентично издание.

На „Струшките вечери на поезијата“, еден од најстарите и најзначајни светски поетски фестивали кој ќе се одржува од 24 до 28 август, годинава поетски читања ќе имаат над 25 странски поети, како и домашни поети од постарата, но и од помладата генерација.

Дел од фестивалот ќе биде и специјалниот настан поврзан со настапот на избраните поети од платформата „Версополис“, проект поддржан од Европската комисија во кој културната манифестација „Струшки вечери на поезијата“ учествуваат од 2014 година.

Од изданијата на Струшките вечери, покрај „Монографијата“ за добитникот на „Златен венец“; „Зборникот“ на фестивалот, кој годинава ќе биде во проширено издание, а ќе има и електронско издание; тријазичното издание на минатогодишниот добитник на наградата „Браќа Миладиновци“; изданието на добитникот на наградата „Мостови“; во чест на јубилејот 60 години од востановувањето на наградата „Браќа Миладиновци“, ќе биде издадена и Антологија за поезијата и флората „Меѓу дрвјата“, чиј приредувач е нашиот истакнат македонски поет, универзитетски професор и филозоф Иван Џепароски.

По повод јубилејот „200 години од раѓањето на Шандор Петефи“, во соработка со Амбасадата на Унгарија, на овогодишното издание на „Струшките вечери на поезијата“ ќе биде отворена изложба за животот и делото на овој славен унгарски поет.

Музичарот Џијан Емин ја изведе нумерата „King Of Sopiste“, додека девојките од балетското студио „БАХ“ го запалија традиционалниот оган.

Вечерта продолжи со поетското читање Меридијани, на кое настапија повеќмина автори од земјава и од странство.

Во следните фестивалски дена на „Струшките вечери на поезијата“ ќе можат да се чујат околу 25 поети од странство и 40-тина од државата.

Манифестацијата, која ќе трае до 28 август, се одржува под мотото „Чувствотворен јазик“.

Во текот на утрешниот ден поетите ќе го посетат манастирскиот комплекс во Калишта, каде што ќе се одржат повеќе читања, а во текот на денот ќе бидат промовирани и неколку поети од „Версополис“, како и антологијата „Меѓу дрвјата (флората и фауната)“ и Антологијата на најмладата македонска поезија. Ќе бидат презентирани и портретите на добитниците на наградите „Мостови на Струга“ и „Браќа Миладиновци“, соопштија од Министерството за култура.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.