Планинарскиот клуб „Љуботен“ од Тетово синоќа одбележа „90 години Попова Шапка“ со мултимедијален настан на кој беа прикажани разгледници и кратки филмови посветени на јубилејот на скијачкиот центар. Како година кога почнал да се оформува како скијачки центар се смета 1934-тата кога таму бил отворен и пуштен во употреба првиот воопшто изграден објект на Попова Шапка - планинарски дом чии темели сега се дел од истоимениот хотел.

-На 11 ноември 1934 година е свечено отворен првиот планинарски дом на Попова Шапка, која до тогаш не ни се знаела, не ни постоела, како скијачки центар. Со отворањето на овој планинарски дом почнува градењето на Попова Шапка. Овој дом е првиот чекор кој планинарите го направиле со цел освојување на височините на тој дел од Шар Планина. Домот го изградиле членовите на нашиот клуб, тогаш планинарско друштво „Љуботен“ со членовите на туристичко друштво Југ од Скопје и тоа се почетоците на Попова Шапка“, истакна Јован Божиновски.

Презентирани беа десетици разгледници на кои е фотографирана Попова Шапка од 1935 година па се досега. Првата е од 1935 година со фотографија на која го има токму првиот објект планинарскиот дом кој бил отворен претходната 1934 година.

Во планинарскиот клуб „Љуботен се чуваат над 400 разгледници од Шар Планина, од кои 70 отсто се од различни периоди на Попова Шапка.

-Разгледницата е фотографија направена од мајстор на фотографија кој треба да пренесе еден од најубавите амбиенти до оние кои ја добиваат разгледници и на позадината ќе прочитаат од каде пристигнала и кој ја испратил. Таа мануела комуникација нè радуваше сите нас и тоа беше нашиот Фејсбук на многу генерации. Почнале да се прават уште во 19 век, а досега стотина години се изработен во количини кои не можат да се пребројат во милијарди. Но ја изгуби својата улога, сега со технологијата стана архивски документ и музејски предмет која се чува само од колекционери и од музеи и установи, елаборираше на тема разгледница, д-р Бранислав Светозаревиќ историчар и архивист.

Презентацијата „90 години Попова Шапка“ е дел од активностите кои се организираат во чест на ослободувањето на Тетово 19 ноември и манифестацијата „Непокорот е слобода-80 години Слободно Тетово.