Култура

Со мотото „Враќање дома“ во Прилеп отворен 57 МТФ „Војдан Чернодрински“

МТФ „Војдан Чернодрински ќе трае до 16 јуни

Под мотото „Враќање дома“, со доделување на наградите за животно дело на актерите Петар Темелковски и Петар Мирчевски, синоќа пред платото на прилепскиот дом на културата „Марко Цепенков“ свечено беше отворен 57-от Македонски театарски фестивал „Војдан Чернодрински“.

Веднаш потоа во големата сала од домот на културата публиката ја виде првата од 10-те претстави во официјалната конкуренција, претставата на велешкиот театар „Нема струја за електричниот стол“ во режија на Дејан Пројковски.

- Мотото „Враќање дома“ има порака. Сакав на ова место, во прилеп, овие осум дена да се случува едно убаво чувство. да се вратиме сите дома, зашто театарот се случува тука, околу нас. А дома е најубаво, изјави уметничкиот директор на Фестивалот Ана Стојаноска која од пред платото на прилепскиот Дом на културата, на отворањето рече дека зборовите не секогаш ја имаат моќта да го покажат тоа што го чувствуваме во даден миг и затоа најчесто ѝ се обраќаме на уметноста.

На отворањето им беа доделени наградите за животно дело на доајените на македонското актерство Петар Темелковски и Петар Мирчевски. - Многу сум му благодарен на Фестивалот и на ова високо признание. Поддршката низ годините што ја има фестивалот го зајакнува. Фестивалот гордо и со големи чекори веќе патува во втората половина од своето столетие, изјави Темелковски.

- Прекрасно е чувството кога ќе се добие награда за животно дело. Посебно од Фестивалот. Сите претстави во кои играв ми се подеднакво драги, зашто мојот успех сум го споделувал со колегите од различни театри, во позитивна смисла сме се судриле со различни енергии и мислам дека тоа носи квалитет. А овде на публиката ѝ се поклонувам, рече актерот Мирчевски.

Прилепскиот градоначалник Борче Јовчески порача дека во Прилеп секогаш има место за театарот и затоа со право велиме дека Фестивалот е бренд на градот.

- Со претставите кои што се пресек на актуелниот театарски миг ќе добиеме различни пораки, кои не се сомневам дека маестрално ќе ни ги пренесат годинашните учесници кои го создаваат драмското дело. Фестивалот „Војдан Чернодрински“ е насушна потреба и за Прилеп и за Република Македонија, бидејќи ја отсликува потребата од идентификација на културата и традицијата, рече Јовчески.

Министерката за култура Бисера Костадиновска Стојчевска извинувајќи се за неможноста да биде на отворањето на Фестивалот ги испрати своите размисли, прочитани на отворањето.

- Годинава сите се враќаме дома, во градот - театар. И, секогаш е пријатно кога сме свои на своето. Прилеп, македонскиот театарски центар и годинава ни ја покажува моќта на раскажување приказни преку театарската уметност. Фестивалот со гордост го носи името на основоположникот на македонската драма, познатиот драмски автор, актер и режисер Чернодрински, и е вистински симбол на традицијата во развојот на македонската култура и белег на препознатливост за нашите творци. Националната драматургија и националниот театар играат клучна улога во чувањето и промовирањето на македонскиот јазик, на македонското творештво и на културното наследство. Токму затоа, Министерството за култура, во соработка со Фестивалот „Војдан Чернодрински“, со цел збогатување на фондот на драмски текстови од македонски автори, отвори посебен конкурс за избор на три необјавени и непоставени македонски драмски текстови, беше порачано во говорот од министерката за култура Костадиновска Стојчевска, прочитан на отворањето на Фестивалот во Прилеп.

Денеска напладне во Домот на културата „Марко Цепенков“ ќе се одржат првите „Разговори на тркалезната маса“ за синоќешната претстава на велешкиот театар „Нема струја за електричниот стол“, а вечер од 19:30 часот е втората претстава во конкуренција. Прилепскиот театар на матичната сцена ќе ја изведе претставата „Мистерија Буфо“ во режија на Андреј Цветаноски.

Во рамките на Фестивалот целиот ден има театарски настани. Од 10 часот во киното „Мис Стон“ е детската зона „Чернодрински за деца“, поддржана од фондацијата за образовни и културни иницијативи „Чекор по чекор“ во соработка со театарскиот фестивал за деца „Силјан Штркот“, а од 17 часот се отвораат фестивалските зони.

МТФ „Војдан Чернодрински ќе трае до 16 јуни.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Мицкоски: Повеќе од 1.200 проекти во моментов се реализираат низ целата држава

Повеќе од 1.200 проекти во моментов се реализираат низ целата држава - ќе продолжиме да инвестираме во проекти од областа на образованието.

-Јас би сакал исто така да се придружам на честитките на претходните говорнички — на градоначалничката и на министерката. Добро е кога се гради, добро е кога се исполнуваат потребите на најмалите, на децата, бидејќи ваквите објекти им се потребни за да го градат својот дух. Како што велевме: „Во здраво тело, здрав дух“, па така, кога спортувате, кога другарувате и кога се натпреварувате истовремено, тогаш го градите и својот дух во правилна насока, а тука е, нормално, и сето она коешто доаѓа со спортот.

Ние ќе продолжиме како Влада да поддржуваме вакви проекти и во периодот којшто следи. Нашата задача е да работиме и тоа коешто сме го ветиле да го испорачаме. Од ден на ден, дел од проектите коишто ги започнавме се завршуваат, помал дел се во фаза на реализација, а помал дел се отпочнуваат сега, така што јас би сакал уште еднаш да напоменам дека повеќе од 1.200 проекти веќе се реализираат на целата територија на државата. Мислам дека Македонија во моментот е претворена во едно големо градилиште, а тоа беше и целта на оваа Влада кога беше избрана, па во таа насока ќе продолжиме и понатаму.

За следната година, преку ЗЕЛС, ги охрабруваме градоначалниците да подготвуваат проекти во зависност од можностите. Исто така, како Влада, планираме дел од средствата да ги децентрализираме од централниот буџет кон општините за да може уште повеќе проекти да се реализираат. Така што, еве, тоа коешто беше приоритет продолжуваме и понатаму да го реализираме.

Уште еднаш честитки до градоначалничката за посветената работа, за сите оние во Советот коишто ја поддржуваат нејзината работа, а се разбира и до администрацијата, без којашто сите овие проекти е невозможно да се реализираат. Би сакал да ѝ се заблагодарам и на министерката за образование, како и на колегите од Владата коишто исто така го носат овој проект за финансирање проекти од Владата кон општините.

Нека е со среќа и голем број спортисти, успешни репрезентативци и репрезентативки да излезат од оваа сала, коишто со гордост, достоинство и успешни резултати ќе ги бранат боите на Македонија.“- истакна премиерот Христијан Мицкоски.

Фудбал

Фото: Салах ќе живее како „султан“ во Турција: Доби вила со осум соби и шест бањи!

Салах ќе живее како султан во Турција: Доби вила со осум соби и шест бањи! Но, тоа е само почетокот!

Салах е воодушевен од вилата која ја доби од Трабзонспор, која се наоѓа на парцела од околу 975 квадратни метри.

Клубот од средината на табелата во Турција успеа да го убеди досегашниот фудбалер на Ливерпул да дојде на брегот на Црното Море.

Покрај големата сума пари, очигледно имале и дополнителни аргументи.

Според турските медиуми, египетскиот ас добил луксузна вила во која ќе живее со своето семејство.

Мохамед Салах избрал луксузна вила за себе и за своето семејство во Јалинџак, откако првите денови во Трабзон ги поминал во кралскиот апартман на еден од градските хотели.

Турскиот портал „Хаберлер“ наведува дека фудбалерот бил воодушевен од вилата, која се наоѓа на парцела со површина од околу 975 квадратни метри.

Станува збор за објект што располага со дури осум соби и шест бањи, но тоа е само дел од она што го нуди оваа луксузна куќа.

Вилата располага со затворен базен, сауна, теретана и просторија наменета за биоскоп, а целиот објект е опремен со напреден систем за „паметен дом“.

Приземјето на вилата зафаќа површина од 120 квадратни метри и вклучува кујна, дневна соба, гостинска соба и бања, како и балкон од 45 квадратни метри. На катот, кој исто така има површина од 120 квадратни метри, се наоѓаат три спални соби и три бањи, вклучувајќи ја и главната спална соба со сопствена бања и гардеробер.

На истиот кат има и просторија за перење алишта, додека луксузните содржини продолжуваат и на долното ниво од куќата. Нивото кон градината зафаќа површина од 230 квадратни метри и таму се сместени некои од најинтересните содржини, како што се затворениот базен, сауната, теретаната и зимската градина.

Тука се наоѓаат и работна соба, дневна соба и кујна, како и простории за складирање и помошни простории.

Салах ќе има и простор наменет за забава, бидејќи на нивото на покривот, кое зафаќа 35 квадратни метри, е сместена посебна кино-сала. Ниту надворешниот простор не заостанува зад ентериерот на вилата. Предната градина зафаќа површина од 270 квадратни метри, додека долната градина се простира на 485 квадратни метри.

НБА

Семејството на починатиот НБА-кошаркар ќе ја добие неговата последна годишна плата од 12,5 милиони долари

На семејството на покојниот кошаркар на „Мемфис Гризлис“, Брендон Кларк, ќе му биде исплатен преостанатиот дел од неговиот договор вреден 12,5 милиони долари, потврди извор од НБА.

Брендон Кларк почина на 11 мај, на 29-годишна возраст.

Според извештајот од Лос Анџелес, неговата смрт е прогласена за несреќен случај, а причината била комбинираното дејство на хероин и кокаин.

За време на својата седумгодишна НБА-кариера, Кларк играше исклучиво за Мемфис.

Тој беше избран како 21-ви пик на драфтот во 2019 година од страна на Оклахома Сити Тандер, по што беше разменет во Гризлис. Уште во својата дебитантска сезона покажа голем потенцијал, а во 2020 година беше меѓу петте најдобри дебитанти во НБА.

Кариерата ја заврши со просек од 10,2 поени и 5,5 скока по натпревар, одигрувајќи вкупно 309 натпревари во регуларниот дел од сезоната.

По неговата контроверзна смрт во јавноста с епојавија неколку верзии за исплатата на последната година од неговиот договор.

Новите информации се во спротивност со претходните извештаи дека семејството на Кларк нема да добие пари од последната година од неговиот договор.

Според Кевин О'Конор, договорот на Кларк со „Мемфис Гризлис“ бил целосно осигуран во случај на негова смрт, што значи дека на неговото семејство треба да му се исплатат сите 12,5 милиони долари.

Претходно, „Front Office Sports“ објави дека семејството нема да ги добие парите, но изворите на О'Конор од НБА тврдат поинаку.

Како што беше објаснето, „Гризлис“ ги надоместуваа трошоците за животното осигурување што го покриваше играчот во случај на смрт. Овој вид договорна заштита е вообичаен во НБА и претставува еден од најсилните облици на финансиска сигурност за играчите.

Парите нема да бидат исплатени директно од „Мемфис“ како плата, туку преку осигурувањето.

Оваа структура може да понуди и даночни поволности за играчот, поради што животното осигурување често се користи за заштита на големи договори.

Тагови: НБА