Од УХМР велат дека снег ќе има речиси на целата територија, со знак прашалник за југоистокот на земјата. Сепак, граѓаните да подготват уште потопла облека, бидејќи со почетокот на наредната недела ќе биде значително постудено, каде и дневните температури се очекува да бидат минусни.
-Веќе во ноќните часови кон недела и во недела кон текот на денот врнежите ќе бидат од снег, ќе се формира, се очекува да се формира снежна покривка, не само на повисоките места, туку еве и во Скопје ќе има, -УХМР – Ленче Ризова – Синоптичар.
Снегот некои ќе ги израдува, особено најмалечките, но за надлежните тоа ќе значи полни раце работа. Од ЈП Улици и патишта – Скопје, велат дека нема да бидат изненадени и се подготвени за терен, апелираат тоа да го сторат и останатите општини.
-Ние сме спремни во три пункта, Ѓорче Петров, Бутел и Кисела Вода, спремни сме со механизација, со сол и општините исто така треба да постапуваат за општинските улици-Ивана Трајкоска – В.Д директор на ЈП Улици и патишта Скопје.
Доволно механизација и подготвеност има и за регионалните и магистрални патишта, уверуваат од Македонија пат, кои најавуваат и затворање на одредени делници за тешки товарни возила.
-Количините и ризла што ги поседуваме, ние веќе ги имаме потребните количини и дистрибуирани се по пунктовите. Така да, генерално, Македонија пат е спремна за предизвикот кој што ни наидува во текот на викендот, -- Љуљзим Шаќири – Македонија пат.
Во меѓувреме од МВР бараат совесност од возачите за побезбедно и непречено одвивање на сообраќајот. Контролите на полицијата се веќе интензивни, а велат такви и ќе останат за да се избегнат несреќи.
-Во овој зимски период превентивните активности се насочени кон задолжителното користење на зимска опрема, а за оние до кои нема да стигнат превентивните мерки, МВР презема репресивни мерки, -- Гоце Андреевски – Портпарол на МВР.
Од ЦУК апелираат на особена внимателност кај лицата кои ќе одат на повисоките места.. Да бидат со соодветна опрема и се што е потребно за престој во планина.
Апелираат и на внимателност за движењето на тротоарите, бидејќи изминативе години болниците се полнеа поради скршеници..
На вакви места, кога ќе замрзнат тротоарите најчесто се случуваат и скршениците, па надлежните апелираат, покрај тоа што велат е нивна обврска имаат и самите граѓани, да си го исчистат снегот пред своите влезови во зградите, пред локалите и влезовите во дворовите.