Случај „Онкологија 2“: ФЗО плаќал за лекови без спроведени постапки и без фактури - Канал 5

Македонија

Случај „Онкологија 2“: ФЗО плаќал за лекови без спроведени постапки и без фактури

Одбраната побара укинување на притворот за Васев и Нухи.

Случај „Онкологија 2“: ФЗО плаќал за лекови без спроведени постапки и без фактури

Фондот за здравствено осигурување (ФЗО) морал да ги покрие финансиските обврски на Клиниката за радиотерапија и онкологија иако тие биле создадени преку набавка на лекови на реверс, без претходно спроведени постапки и без фактури, беше посочено на денешното рочиште во Основниот кривичен суд - Скопје за случајот „Онкологија 2“, во кој се обвинети поранешниот медицински директор на Онкологија, Нино Васев, и економскиот директор на Клиниката, Нехад Нухи.

Сведокот, поранешен директор на Одделот за финансиско работење при Фондот за здравствено осигурување (ФЗО), во своето сведочење појасни дека Фондот немал увид во набавките на лекови на реверс од страна на Клиниката бидејќи за нив немало документација, но, како што појасни, долговите на крајот морало да бидат платени кога фактурите ќе достасале.

- Во декември 2022 година, имајќи ги предвид висината на долговите и достасувањето на фактурите, 823 милиони денари, ако ги видите претходните месеци, а тоа беше моја работа во Фондот, достасуваат речиси 400 милиони денари за три-четири месеци. Тоа беше врв на долгот на Онкологија во декември 2022 година. Врз основа на ова, се гледа дека наеднаш стигаат многу повеќе фактури отколку при нормалните нарачки и нормалните купувања со постапките. Ова е поради достасувањето на фактурите што дополнително се креирани за предвреме испорачаните, на реверс земени лекови, кои веќе се потрошени. Моравме на крајот да ги платиме и нив како создадени обврски и долгови. Инаку, дававме пари колку што треба да добијат и согласност. Кога веќе ЈЗУ ќе создаде долг, Фондот е должен да го покрие - истакна сведокот.

На прашањето на Обвинителството дали при контролите Фондот имал увид во набавките на реверс, сведокот одговори негативно посочувајќи дека без фактура нема основ за книговодствена евиденција.

- Не можам да кажам дали таму имало испратница или имало реверс, но немало фактура, што значи ако имало некаква испратница, пусулче, што и да е, кога нема фактура, нема достоен документ за израмнување на книговодствената промена. Нема фактура - не е книжено. Контролите ги гледаат книговодствените документи - рече сведокот.

Според сведочењето, иако во извештаите од контролите било нотирано дека има лекови за кои нема ниту постапка, ниту договор, ниту фактура и било укажувано дека тоа не смее да се прави, таквата пракса продолжила. На прашањето дали менаџментот постапувал во согласност со укажувањата, сведокот посочи дека „во делот на набавки без согласност не е постапувано“.

Во однос на финансирањето, беше потврдено дека Фондот во периодот од 2018 до 2021 година нема побарано заем од државниот буџет, но дека таков заем бил побаран во 2022 година.

Одбраната побара укинување на притворот за Васев и Нухи

На денешното рочиште одбраната побара од судот да го укине притворот за обвинетите, поранешните директори Нино Васев и Нехад Нухи, нудејќи и имотна гаранција. Според одбраната на Нухи, адвокатката Анита Бегова, деветмесечниот притвор веќе претставува казна пред пресуда и оневозможува ефективна одбрана.

- Пред овој суд во повеќе наврати како доказ дека обвинетите ќе бидат достапни за судење беше понудена и гаранција од Нухи и Васев. Од Нухи конкретно се понудени куќи од четворица негови братучеди во вредност од над 350.000 евра, и од Васев - куќа во Козле со приближна вредност. Сигурна сум и дека ќе се сложите со мене дека секој има право на фер одбрана. Конкретно, сметам дека обвинетите имаат право на фер одбрана и судење, а такво нешто е невозможно затоа што тие се наоѓаат во притвор - истакна Бегова.

Како причина таа наведе дека во КПУ „Затвор Скопје“ е невозможно да се внесуваат компјутери и средства за подготовка на одбраната, а посетите се временски ограничени, односно имаат право на посета еднаш неделно со времетраење од еден час.

Бранителот на Васев, адвокат Дељо Кадиев, го поддржа предлогот посочувајќи дека е „невозможно да се гради одбрана со клиент што се наоѓа во притвор“ поради, како што рече, ограничувањата во КПУ „Затвор Скопје“.

Кадиев наведе дека вербалните докази се речиси изведени и дека остануваат материјалните, на кои, како што рече, не може да се влијае. Според праксата на Европскиот суд за човекови права, Кадиев додаде дека причините за притвор мора постојано да се преиспитуваат нагласувајќи дека за двајцата обвинети „не може да се зборува за опасност од бегство“.

По предлогот за укинување на мерката притвор, беше најавено дека судот и Обвинителството ќе се произнесат на следното рочиште закажано за 17 февруари 2026 година за кога е најавено присуство на претставник од Државниот завод за ревизија.

Тагови: Онкологија 2

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Живот

Што се случува со организмот ако постите седум дена?

Истражување кое открива како реагира организмот на рестрикција на калориите.

Што се случува со организмот ако постите седум дена?

Истражување спроведено на 12 здрави лица покажа дека седумдневниот пост на вода го менува телото и органите, а најголемите промени се случуваат околу третиот ден.

Повеќедневното постење на почетокот почнува со трошење на складираните масти.

Истражувачи од Лондонскиот универзитет на кралицата Мери и Норвешкиот универзитет за спортски науки следеле 12 здрави лица кои седум дена консумирале само вода. За време на истражувањето анализирале околу 3.000 протеини во крвта на учесниците за да утврдат како организмот се прилагодува на целосното исклучување на храната.

Телото во првите три дена од користење на гликозата преминало на користење на складираните масти како главен извор на енергија, па учесниците изгубиле 5 до 7 кг, и масно и немасно ткиво.

Меѓутоа, она што се случило по првите три дена ги изненадило истражувачите. Почнале да се случуваат значајни промени во нивото на протеини поврзани со многу органи и процеси во организмот. Третина од анализираните протеини се промениле за време на постот, а некои промени не можеле да се објаснат со губење на килограмите.

Меѓу нив се промените на протеините кои имаат улога во структурата и функционирањето на нервните клетки, што укажува дека долготрајното постење може да има многу поголемо влијание врз телото отколку што се сметаше некогаш.

Резултатите не значат дека треба да гладувате

За првпат можеме да видиме што се случува на молекуларно ниво во организмот додека постиме. Нашите резултати нудат докази за здравствената придобивка на постот и не се однесуваат само на губењето килограми, тие се видливи дури по три дена целосна рестрикција на калориите – објаснува Клаудија Лангерберг од Универзитетот Кралицата Мери.

Важно е да се нагласи овие резултати се однесуваат на целосна рестрикција на храна во текот на неколку дена, а не на кратки форми на повремен пост, како што се популарните режими засновани на автофагија. Според тоа, овие резултати не можат автоматски да се применат на секоја форма на пост.

Научниците се надеваат дека подоброто разбирање на овие промени еден ден би можело да помогне во развој на терапии кои би имитирале одредени ефекти на постот, без притоа да се бара од пациентите целосно воздржување од храна со денови.

Мајк Пицнер, еден од авторите на студијата, истакна дека долготрајниот пост не е безбедна опција за секого, особено не за лицата со веќе постоечки здравствени проблеми.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Бизарно

Дошол на погреб на пријател, па случајно пропаднал во гробот на татко му и починал (ВИДЕО)

Адилсон Марсаро (48) од Бразил го загуби животот во необична несреќа на гробиштата, кога пропаднал во гробот на сопствениот татко. 

Дошол на погреб на пријател, па случајно пропаднал во гробот на татко му и починал (ВИДЕО)

Трагедијата се случила додека тој престојувал на гробиштата на погреб на пријател, а бетонската конструкција на која седел наеднаш се урнела.

Несреќата се случила во средата, на 21 октомври, на градските гробишта Сао Хозе во Линхарес, во бразилската држава Еспирито Санто.

Марсаро дојде тој ден да присуствува на погребот на пријател кој загинал во сообраќајна несреќа претходниот ден.

Според гробарот Назаре Бравин, човекот пристигнал на гробиштата со мотор, ги поздравил присутните и прашал каде ќе биде погребан неговиот пријател.

После тоа, тој ги оставил моторот и кацигата, а потоа се упатил кон гробот на својот покоен татко, кој се наоѓал на истите гробишта.

Кога стигнал до гробот на својот татко, Адилсон седнал на бетонскиот надгробен камен.

Во тој момент структурата наеднаш попуштила под неговата тежина и човекот пропаднал во гробницата.

Силен тресок го привлече вниманието на луѓето во близина. Кога сфатиле што се случило, веднаш повикале брза помош.

На местото на настанот пристигнале припадници на противпожарната служба и брзата помош, но несреќниот човек не можел да се спаси.

Лекарите можеле само да констатираат смрт. Неговото тело е извлечено од урнатата гробница и пренесено на обдукција.

Како што пишува Њујорк Пост, Марсаро бил погребан веќе следниот ден, на истите гробишта каде што го загубил животот.

Градските власти на Линхарес изразија сочувство до семејството и пријателите на жртвата.

Во соопштението тие наведуваат дека вработените на гробиштата веднаш ги известиле надлежните органи, но дека обидите за спасување биле неуспешни.

Воедно, тие ги потсетија граѓаните да бидат особено внимателни при посетата на гробните места, особено во пресрет на празникот Денот на мртвите, кога се очекува поголем број посетители.

По трагедијата се отвори и прашањето за безбедноста на гробните градби.

Градската управа соопшти дека е надлежна за одржување на заедничките површини, патеките и другите јавни делови на гробиштата.

Сепак, одржувањето на поединечните гробови и надгробни споменици, според локалните правила, е обврска на семејството на починатиот.

Бразилската цивилна полиција покрена истрага за да се утврдат сите околности на несреќата.

Засега не е соопштено зошто попуштила бетонската конструкција или дали претходно имало знаци на нејзино оштетување.

Тагови: гробот погреб

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Трамп: Мора да го запрам убивањето на иранските лидери

Американскиот претседател Доналд Трамп изјави дека мора да престане да убива ирански лидери за да утврди со кого преговараат САД и го повтори својот став дека на Иран никогаш не смее да му биде дозволено да развива нуклеарно оружје.

Трамп: Мора да го запрам убивањето на иранските лидери

„Морам да престанам да убивам ирански лидери затоа што морам да сфатам со кого, по ѓаволите, преговараме“, рече Трамп на предизборен митинг во Џорџија, објави Дејли експрес. Трамп повтори дека Иран повеќе нема авиони, нема бродови и нема лидери.

„Лидерот од прво ниво го нема, лидерот од второ ниво го нема“, рече Трамп.

Тој, исто така, ја бранеше својата одлука од 2018 година да ги повлече САД од нуклеарниот договор со Иран од 2015 година, постигнат под тогашниот американски претседател Барак Обама, велејќи дека ја донел одлуката во клучно време за да го спречи Техеран да добие нуклеарно оружје.

„Го раскинав еден од најлошите договори што некогаш биле склучени, Заедничкиот сеопфатен план за акција (JCPOA) на Барак Хусеин Обама, познат и како нуклеарен договор со Иран, што доведе до тоа Иран да добие нуклеарно оружје. За среќа, го раскинав токму на време“, тврдеше Трамп.

Тој повтори дека САД го уништиле капацитетот за збогатување ураниум на Иран во воените операции спроведени оваа и минатата година.

„Ги победивме воено, финансиски и на други начини. Мора да се погрижиме тие никогаш, ама баш никогаш да не добијат нуклеарно оружје“, повтори Трамп.

Тагови: Доналд Трамп

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер