Словенската левица го прозва Јанша поради ставовите за Тајван

Изјавата на словенечкиот премиер Јанез Јанша за преговорите на неговата земја со Тајван за меѓусебно отворање трговски мисии, Кина ја оцени како опасна, но стана важна тема и во Љубљана.

Опозициската левичарска коалиција од четири партии повика на вонредна седница на парламентарната комисија за надворешна политика поради изјавата што го возбуди Пекинг, велејќи дека изјавата на премиерот е „провокативна“ и отстапува од начелата за надворешната политика усвоени од парламентот.

Според социјалдемократите (СД), изјавата на Јанша може да им наштети на интересите на Словенија и економската соработка со Кина и да направи опасен „преседан“.

Јанша не ги смета за проблематични неговите ставови за Тајван и Кина, па на жестоките критики одговори со саркастичен твит, алудирајќи на тоа дека социјалдемократите се идеолошки следбеници на Комунистичката партија на Кина.

„Огромното мнозинство од членките на ЕУ имаат свои економски претставништва во Тајпеј и обратно. Само следбениците на диктатурите како што се словенечките социјалдемократи можат да се спротивстават на еднаквоста и на тој начин да се согласат на нашата споредна улога“, рече Јанша во пораката, додавајќи дека словенечките социјалдемократи имаат свои модели во Кина.

Словенечкото Министерство за надворешни работи денеска реагираше и на најавите на Јанша за отворање на трговската мисија на Тајван во Словенија и на политичките и медиумските реакции во Словенија, предупредувајќи дека тоа нема да биде дипломатско претставништво и дека Словенија како членка на Европската унија го почитува принципот „една Кина“.

Неколку земји од Европската унија имаат свои претставништва во Тајпеј кои не уживаат дипломатски статус, како и претставништва на Тајпеј во европските земји, соопшти словенечкото Министерство за надворешни работи.

Отворањето и постоењето на вакви мисии има за цел да ја продлабочи економската и културната соработка и не ги нарушува принципите на една Кина, се вели во соопштението на словенечкото МНР.

Словенечките медиуми јавуваат дека некои анонимни словенечки дипломати изјавата на Јанша, дадена во понеделникот за една индиска телевизиска мрежа, ја сметаат за провокативна и непотребна со оглед на ситуацијата и контрапродуктивна кога се во прашање словенечките интереси. Тие наведуваат и дека некои веруваат дека актуелниот словенечки премиер сакал да и се допадне на американската администрација во светло на заладените односи меѓу Кина и Вашингтон.

Бриселскиот портал Политико ги коментира најавите на Јанез Јанша за размена на трговски мисии со Тајван, наведувајќи дека потегот на актуелниот словенечки премиер може дополнително да иницира тензии во односите меѓу Унијата и Пекинг.

Особено затоа што, се додава, Јанша изјави во интервју за индиската ТВ мрежа дека ќе ја поддржи „суверената одлука на Тајван да живее суверено или да се приклучи на Кина, како што одлучија нејзините жители“, и зборувал за Тајван како суверена држава.

Електромобилот „Шјаоми СУ-7“ пуштен во продажба

Технолошкиот гигант верува дека оперативниот систем „СУ-7“ што го имаат нивните телефони, лаптопи и други уреди, ќе ги привлече веќе постојните клиенти. 

Кинескиот производител на паметни телефони „Шјаоми“ (Xiaomi) го пушти во продажба своето прво електричен автомобил - „Спид ултра 7“ (Speed ​​​​Ultra 7, СУ-7). Извршниот директор на компанијата, Леј Јун изјави дека цената на возилото ќе биде околу 28.000 евра, пренесува „Би-би-си“.

Технолошкиот гигант верува дека оперативниот систем „СУ-7“ што го имаат нивните телефони, лаптопи и други уреди, ќе ги привлече веќе постојните клиенти. Автомобилот, најавен лани, се споредува со моделите на спортски автомобили „Тајкан“ и „Панамера“ на „Порше“. Производството ќе се одвива во Пекинг, Кина, во државната фабрика што може да испорача до 200.000 возила годишно. „Шјаоми“ најави и влог од 10 милијарди долари за развој на возила за следните 10 години.

На кинескиот пазар на електромобили, инаку, се натпреваруваат и „Тесла“ и „БИД“, па со влезот на „Шјаоми“ како трет избор, се предвидува и нова борба за цените.

- Крајното достигнување би било да се покаже дека има потрошувачки пазар и за „Шјаоми“ како бренд на паметни електрични возила, изјави стручњакот од „Аутомобилити“ (Automobility), Бил Русо.

Тој верува дека влезот на пазарот за автомобили ја одразува довербата на „Шјаоми“ во важноста на брендот во и вон матичната Кина. /МИА

Тренчевска: Опфатот на децата во градинките 48 проценти, до 2028 година ќе изнесува 70 проценти

 Дополнителната заменичка министерка за труд и социјална политика во техничката Влада, Јованка Тренчевска денеска информираше дека имаат таргет до 2028 година, 70 отсто од децата да бидат вклучени во градинките.

- Во 2017 година, кога се формира Владата предводена од СДСМ, опфатот на децата во градинките беше од 25 до 27 отсто од вкупниот број деца вклучени во градинките. Денес, тој процент е 48, дополнително ќе се зголеми со градинките што чекаат на отворање. Таргетот ни е до 2028 година, тој процент да се зголеми на 70 отсто деца опфатени во предучилишно образование и секако, тој број да се зголемува, одговори Тренчевска на новинарско прашање на брифингот со новинари во Клубот на пратеници.

Во однос на листите на чекање за прием во градинка, таа кажа дека најкритично е во скопските општини.

- На територијата на целата држава од 2017 година до денес, изградени се 84 градинки со вкупен опфат на над 8 000 деца. Во декември 2023 година, Владата додели четири милиони евра за изградба на нови градинки во општините Бутел, Кисела Вода, Ѓорче Петров, Аеродром и во Карпош, подвлече Тренчевска.

Од 2018 година до денес во детските јавни установи вработени биле вкупно 2 881 лице, а бројот на лиценцирани негувателки и воспитувачки во овој период, изнесувал 740 лица.

НАТО ја одбележува 20-годишнината од своето најголемо проширување

НАТО денеска ја слави 20-годишнината од најголемото проширување на Алијансата, кога на пактот се приклучија седум земји.

„Денеска се навршуваат 20 години од приемот на Бугарија, Естонија, Летонија, Литванија, Романија, Словачка и Словенија“, изјави портпаролката на НАТО, Фара Даклала.

„Оваа година се одбележува и 25-годишнината од првото проширување на пактот по Студената војна со пристапувањето на Чешка, Унгарија и Полска, како и 75 години од основањето на Алијансата“, додаде таа.

Претходно овој месец, НАТО објави податоци кои покажуваат дека повеќе од 80 отсто од граѓаните на земјите од пактот се на мислење дека земјите од Европа и Северна Америка треба да работат заедно за безбедноста.

притисни ентер