Врнело со часови, а малите реки и поројните водотеци надојдоа! Градот Копер објави дека ситуацијата на терен е опасна и се влошува. Обилните врнежи од дожд сè уште се задржуваат помеѓу словенечка Истра и внатрешноста на земјата. На некои места веќе наврнале повеќе од 150 милиметри дожд, објавува Метеоинфо Словенија.

Бурата оштети и неколку патишта во областа Копер, а се случи лизгање на земјиштето пред тунелот Декани од правец на Чрни Кал кон автопатот.

„Патот до Оспа е затворен поради поток што го поплави коловозот, патот пред полициската станица Шкофија е тежок за возење, на патиштата во Побеги се отворија шахти, регионалниот пат во Чепки е целосно затворен“, беше објавено.

На некои места низ Словенија, бурите го попречуваат сообраќајот. „24ур“ известува дека сите достапни екипи се на терен во Копер, а властите ги повикуваат граѓаните да бидат исклучително внимателни на патот бидејќи водата се акумулира на коловозот.

„Поради лошите временски услови и брзото зголемување на нивото на водата на реките Бадашевица и Рижана, ги повикуваме жителите во областите покрај двете реки да останат во своите домови. Ситуацијата брзо се влошува, патиштата се затвораат, а областа е опасна за патување“, соопшти општина Копер.

Пожарникарите регистрирале 70 интервенции поради бурата до 10 часот наутро. Тие нагласуваат дека животите во моментов не се во опасност, но ги замолуваат луѓето строго да ги следат упатствата на надлежните служби.

На граѓаните им е кажано и да ги отстранат своите возила од ниските подрачја и паркинзите, а се нуди бесплатен паркинг во гаражите.

Железничката линија Дивача-Копер е поплавена и затворена поради последиците од бурата, објавија Словенечките железници, а за патниците е организиран алтернативен превоз до понатамошно известување.

Словенечката агенција за заштита на животната средина претходно издаде портокалово предупредување за бури и дожд за северозападните, југозападните и централните делови на земјата. Попладнево беше издадено жолто предупредување за бури за југоисточните и североисточните делови на Словенија.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.