Македонија

Скопје се сеќава - 50 години од катастрофалниот земјотрес

Скупи се урнал во 518 година, Скопје во 1555 по втор пат е разорен, а денеска се одбележуваат 5 децении од третиот катастрофален земјотрес на ова подрачје - во 1963та. Вечерва на плоштадот „Македонија“ во 21:30 часот ќе почне мултимедијалниот проект „Скопје се сеќава“.

Скопје денеска со повеќе активности и манифестации ја одбележува 50-годишнината од катастрофалниот земјотрес од 1963 година во кој 1.070 луѓе го загубија животот, а 3.000 беа повредени.

Одбележувањето ќе почне во 10 часот со положување цвеќе на Градските гробишта во Бутел, пред Споменикот на загинатите во земјотресот. Потоа ќе следи традиционалната крводарителска акција на Црвениот крст на Град Скопје.

Во спомен на жртвите од катастрофалниот земјотрес во Соборниот храм „Свети Климент Охридски“ во 8:30 часот ќе биде отслужена Заупокоена литургија, а во 10 часот Панихида.

Официјалната програма ќе почне во 19 часот со поетско читање „За Скопје со љубов“ пред Музејот на Град Скопје. Во просториите на Музејот, во 20 часот ќе биде отворена изложбата „26 јули 1963“, а Град Скопје на сите земји кои по големата катастрофа ја покажаа својата солидарност и испратија помош ќе им додели благодарници.

На плоштадот „Македонија“ во 21:30 часот ќе почне мултимедијалниот проект „Скопје се сеќава“, а Македонската филхармонија, актери и членови на Македонската опера и балет преку перформанси ќе пренесат приказни за љубовта, храброста и солидарноста – приказни од скопскиот земјотрес.

Ќе има и кино на отворено, меѓународна патувачка изложба „Show your hope“, 24-часовен филмски маратон со бесплатни филмски проекции на светски мегахитови,...

На одбележувањето на 50-годишнината од скопскиот земјотрес во Скопје се очекува да пристигнат повеќе градоначалници и претставници од Љубљана, Загреб, Софија, Тирана, Дрезден, Нирнберг, Нанчанг...
------------------------------------------------------------------------
Што му се случи на Скопје на 26 јули 1963 година
------------------------------------------------------------------------
Катастрофалниот земјотрес во Скопје се случи на 26 јули 1963 година во пет часот и 17 минути, а помали потреси имаше до пет часот и 43 минути. Беа урнати 15.800 станови, а оштетени 28.000. Над 200.000 луѓе остана без покрив над глава.

Веднаш по катастрофалниот земјотрес од 05 часот и 17 минути имало два релативно силни земјотеса и тоа во 05 часот и 32 минути и во 05 часот и 53 минути, кои имале епицентрални интензитети од седум степени по Европската макросеизмичка скала. Во текот на истиот ден во Сеизмолошката станица во Скопје регистрирани се 122 земјотреса, до крајот на 1963 уште 411, во текот на 1964 година 49 земјотреси или вкупно 582 допилнителни земјотреси од појавата на главниот земјотрес до крајот на 1964 година.

Потоа сеизмичката активност се намалила и скопското епицентрално подрачје преминало во редовниот сеизмички режим.

Во Македонија и во Сеизмолошката станица во Скопје не постои запис од силниот скопски земјотрес во 05 часот и 17 минути. Записи се набавени од другите земји, со кореспонденцијата што ја вршела Сеизмолошката станица по овој земјотрес.

Во времето на скопскиот катастрофален земјотрес, Сеизмолошката станица во Скопје била опремена со два механички сеизмогорафа MAINKA, монтирани уште во првата половина на 1957 година и со механичкиот сеизмограф CONRAD, монтиран во февруари 1963 година.

- Од силниот удар на земјотресот од 26 јули 1963, сите три сеизмографи во Сеизмолошката станица во Скопје биле исфрлени од работа. Тогашниот раководител на станицата, д-р Драган Хаџиевски успеал околу 38 минути по земјотресот да го врати во работа сеизмографот CONRAD, а по два часа и 32 минути и еден од сеизмографите MAINKA, вели д-р Вера Чејковска, сегашен раководител на Сеизмолошката опсерваторија при Природно-математичкиот факултет во Скопје.
------------------------------------------------------------------------------------------------------------------------
Стручните лица за причините за земјотресот и дали се можни нови слични потреси
--------------------------------------------------------------------------------------------------------------------------
Раководител на Сеизмолошката опсерваторија при Природно-математичкиот факултет во Скопје, д-р Вера Чејковска смета дека на Скопје на 26 јули 1963 година му се случи силен тектонски земјотрес.

- Согласно со истражувањата изведени во Сеизмолошката опсерваторија во Скопје, земјотресот бил предизвикан од наглото поместување на блок под дел од градот Скопје и Скопска Црна Гора кон запад–северозапад и надолу, долж раседна рамнина наклонета кон север–североисток. Оваа раседна рамнина може да се придружи на регионалниот Скопско-Ќустендилски расед, кој се протега низ Скопската Котлина приближно долж правецот исток – запад. Наглото поместување започнало од точка на длабочина од само 5 километри, а се проширило врз површина од околу 130 километри квадратни. Целата оваа површина го претставува дефинитивното жариште (извор) на земјотресот. Средната вредност на дефинитивното нагло поместување врз целата оваа површина изнесува околу 30 сантиметри. Поместувањето не ја пробило Земјината површина. Сепак, поради малата длабочина на која се одвивало, ова поместување предизвикало значајни ефекти врз Земјината површина – многу разурнувања и жртви, вели Чејковска.

Точката од која започнало поместувањето (хипоцентар на земјотресот), нагласува, има вертикална проекција на Земјината површина во подрачјето помеѓу Скупи (Злокуќани), Зајчев Рид и Бразда, и таа проекција е епицентарот на земјотресот.

- Сеизмичноста на Скопското епицентрално подрачје се должи на тонењето на Скопската котлина и на диференцираните вертикални и хоризонтални тектонски поместувања на околните планини, во резултат на регионалните тектонски напрегања. Сето ова предизвикува тектонската и сеизмичка активност на сите раседи во Скопската котлина и околината. Овие раседи се ориентирани долж правецот северозапад–југоисток и приближно долж правецот исток–запад. Најактивен од сите овие раседи е регионалниот Скопско-Ќустендилски расед, за кој веќе беше кажано дека се протега низ Скопската котлина приближно долж правецот исток–запад, прецизира Чејковска.

Директорот на Институтот за земјотресно инженерство и инженерска сеизмологија од Скопје (ИЗИС) Михаил Гаревски исто така вели дека Скопје е град кој е подложен на земјотреси.

- Силни земјотреси се случуваат на секои 300 до 500 години, но тоа не ни гарантира дека не би можел да се случи и утре или наредната година. Со сигурност може да се каже дека повторно ќе има силен земјотрес, но веројатноста дека тоа ќе се случи во блиска иднина не е толку голема, посочува Гаревски.

Тој смета дека скопјани не треба да се плашат бидејќи после земјотресот од 1963 година се градат асеизмички објекти.

- Генерално во Скопје, се гради добро бидејќи постои традиција после 1963 година. Проблем претставуваат само заградите што се доградуваат и надградуваат, особено оние со носечки ѕидови што се изградени пред земјотресот, бидејќи за нив е најтешко да се направи статиката, нагласува Гаревски.

Пред земјотресот, додава, немало прописи за сеизмичка градба и затоа ризикот е најголем кога се надградуваат тие објекти.

- Мислам дека во Законот за градење недостасува член со кој би се забранила надградба на објектите изградени пред земјотресот. Јас се залагам да се забрани секаква надградба без да се докажува дали објектот е добар. Подобро е да се урне стариот објект и да се изгради нов, отколку да се надгради, потенцира Гаревски.

Според него, целата територија на Македонија е сеизмички активна и единствена превенција од земјотрес е сигурната градба на станбените објекти. Како исклучително сеизмички ризични градови во Македонија ги посочува Скопје, Валандово, Охрид, Битола, Пехчево, Берово и Дебар.

- По земјотресот практично не постои објект за кој не се земени предвид сеизмичките сили. Пред земјотресот тоа не се бараше, туку се земаа предвид само силите од ветерот. Сега пи проектирањето се прават статичка и сеизмичка пресметка. Можеме да проектираме 100 отсто сеизмички згради. Тоа значи дека кај мали земјотреси зградата не треба да има скоро никакви оштетувања, а за големи, како скопскиот, може да има конструктивни оштетувања, но зградата нема да падне, појаснува Гаревски.

Зградите,нагласува, паѓаат како резултат на лошо проектирање и поради лошата изведба.

- Кај нас најголемиот број згради се со голем квалитет. Факт е дека до 90-тите години од минатиот век контролата беше поголема. Рредовно се правеа ревизии и динамички анализи. Населбите Аеродром, Капиштец и други беа контролирани од ИЗИС. Од 1990 година наваму се случува понекогаш да не се води сметка. Постои некој многу мал број објекти кои не се добри, посочува Гаревски.

На почетокот на месецов Институтот за земјотресно инженерство и инженерска сеизмологија симулираше вештачки земјотрес од 5,5 степени според Европската сеизмичка скала врз десеткатница во Ново Лисиче изведена од Адора Инженеринг.
------------------------------------------------------
Скопје град на светската солидарност
------------------------------------------------------
Од трагедијата на Скопје предизвикана од катастрофалниот земјотрес на 26 јули 1963 година целиот свет беше ангажиран. Меѓународниот Црвен крст упати апел до сите национални организации да организираат исхрана за скопските деца. Интерпарламентарната унија упати препорака до сите парламенти и влади да помогнат во обновата на градот. Хуманитарните организации во многу земји пристапија кон собирање помош за Скопје. Така Скопје стана град на меѓународна солидарност.

Обединетите нации веднаш по катастрофата презедоа активности за плански и долгорочно да му се помогне на разурнатиот град. Во времето кога екипи стручњаци на ОН почнаа да пристигнуваат во Скопје, во седиштето на меѓународната организација беше речено дека Скопје ќе биде споменик на човечката солидарност. На 23 септември 1963 година 35 земји побараа Генералното собрание да стави на дневен ред од своето заседание точка за преземање мерки по повод земјотресот во Скопје. По четири дена, на 27 септември, Генералното собрание и даде приоритет на меѓународната акција за давање помош на Скопје.

На 14 октомври, по двочасовна дискусија, Генералното собрание на Обединетите нации едногласно усвои Резолуција за давање помош на југословенската влада при реконструкцијата на Скопје. Во Резолуцијата се изразува жалење по повод големата катастрофа. Во дебатата за давање помош на Скопје, Генералното собрание го ислуша излагањето на претставници од над 20 земји од сите континенти. Тој ден остана во аналите на Обединетите нации како ден на Скопје.

Во својата долга историја, градот повеќе пати пропаѓал и одново се раѓал. На просторот меѓу селата Злокуќани и Бардовци постоел град Скупи, метропола на провинцијата Дарданија. Овој римски град во 518 година бил наполно разурнат од земјотрес. Тогаш во провинцијата Дарданија биле урнати 24 градски тврдини. Јачината на овој земјотрес изнесувала 10 - 11 степени. Катастрофалниот земјотрес наполно го уништил Скупи. За време на потресот биле создадени многу пукнатини во земјиштето. Од околните ридови се урнале големи маси карпи. Скопје потоа бил изграден на денешното место.

И новиот град не бил поштеден од сеизмички појави. Наредниот катастрофален земјотрес се случил во 1555 година. Неговата јачина изнесувала околу 10 степени, по што градот вторпат бил разурнат.

Последното трето големо катастрофално разурнување на Скопје се случи пред 50 години, на 26 јули 1963 година, кога Скопје беше погодено од земјотрес со јачина од девет степени по Меркалиевата скала или шест според Рихтеровата со епицентар на плоштадот „Македонија“./MИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Клуни со месеци снимал филм, па се појавил само во една сцена: Целосно ме исекоа (ВИДЕО)

Џорџ Клуни снимил значително повеќе снимки за воената драма од 1998 година „Тенката црвена линија“ отколку што публиката на крајот виде.

На Филмскиот фестивал во Венеција, актерот се сети на моментот кога сфати дека неговата улога е сведена на само една сцена, иако помина неколку месеци снимајќи во Австралија, пишува People.

Режисерот е сликар

Клуни, 65, зборуваше за својата мала улога во филмот за Втората светска војна на Теренс Малик на панел во Венеција во четврток, еден ден откако го доби Златниот лав за животно дело. Темата беше покрената кога беше прашан што му се допаѓа повеќе во режијата отколку во глумата.

„Актерот влијае на филмот само колку што му дозволува режисерот. Како режисер, можам да ја сменам изведбата на кој било актер. На крајот, можам целосно да го исфрлам“, рече Клуни.

„Се сеќавам дека работев на „Тенката црвена линија“.

„Бев во Австралија со месеци и тој на крајот ме исфрли од сè освен од последната сцена. „Буквално последната сцена во филмот“, додаде тој.

„Го видов филмот и реков: „Ме исклучи целосно. Само во последната сцена сум? Боже, изгледам како кретен!“. Тој рече: „Не, Џорџ, тоа е одлично“, а јас реков: „Срање“.

Ѕвездена екипа и минимална улога

Во „Тенката црвена линија“ глумат Шон Пен, Адриен Броди, Џим Кавизел, Џон Кјузак, Вуди Харелсон, Џаред Лето, Тим Блејк Нелсон, Ник Нолти, Џон Ц. Рајли, Џон Траволта и многу други. Заплетот ги следи американските војници за време на борбите во Пацификот. Ликот на Клуни се појавува само во последните сцени, и покрај тоа што поминал месеци на снимање.

Клуни неодамна глумеше во минатогодишниот „Џеј Кели“, а се појави и во овогодинешниот наслов „Повикај го мојот агент! Филмот“. Неговиот следен проект е новото продолжение на франшизата „Оушнс“.

Тагови: Џорџ Клуни

Европа

Русите го нападнаа граничниот премин Орливка- блокиран сообраќајот кон Романија

Руските сили ја нападнаа граничната инфраструктура во областа Измаил во регионот Одеса во Украина, привремено суспендирајќи го работењето на граничниот премин Орливка меѓу Украина и Романија.

Руските сили ја нападнаа граничната инфраструктура во областа Измаил во регионот Одеса во Украина, привремено суспендирајќи го работењето на граничниот премин Орливка меѓу Украина и Романија, соопшти денес регионалната државна администрација на Измаил.

„Непријателот изврши воздушен напад врз граничната инфраструктура на областа Измаил“, се вели во соопштението објавено на Телеграм, кое го пренесе украинската новинска агенција Укринформ.

Граничниот премин Орливка привремено ги прекина операциите поради нападот, се додава во соопштението.

Укринформ потсетува дека Русите целосно го нападнаа меѓународниот граничен премин Орливка, кој обезбедува фериботска врска меѓу Украина и Романија, четири пати од почетокот на војната.

Тагови: Романија Русите

Живот

Милијардерка и нејзиниот сопруг, ријалити ѕвезда, измамиле пријател за 2 милиони долари, па се сликаат на јахта (ФОТО)

Канадска милијардерка и нејзиниот поранешен сопруг, ѕвезда на ријалити шоуа, се обвинети за измама на нивниот најдобар пријател за 2 милиони долари, според новата тужба.

Брендан Фицпатрик (38), кој глумеше во филмот „Богатите деца од Беверли Хилс“, и неговата сопруга, Клое де Серињи (31), внука на покојниот канадски финансиер Пол Демар, наводно го измамиле својот богат пријател да земе кредит, а потоа да одбие да го врати, се наведува во поднесокот.

Макс Џен Фаулс-Паздро (46) го обвини Брендан за „искористување на нивното лично пријателство“ за да добие 2 милиони долари за проект за недвижнини во Обединетото Кралство во јануари 2025 година, според тужба поднесена во федералниот суд и добиена од Дејли Меил.

„По повторените и сè поочајни молби од Брендан - близок пријател на Фаулс-Паздро во тоа време, Фаулс-Паздро посегна по своите и животните заштеди на неговата сопруга и финансираше мостовен заем од 2 милиони долари, кој Брендан вети дека ќе почне да го враќа во рок од шест недели“, се наведува во поднесокот.

„Поминаа две години од тогаш - и ниту еден долар од заемот не е вратен. Со исцрпувањето на нивните заштеди, Фаулс-Паздро и неговата сопруга сега се на работ на финансиска пропаст.“

Во тужбата на Фаулс-Паздро се тврди дека Фицпатрикови се „оптоварени на секој фронт“, но „продолжуваат да живеат - и да се претставуваат себеси на другите како да живеат - во сјајот на луксузот.“

Судскиот документ вклучуваше неодамнешна објава на социјалните мрежи од двојката на јахта во Медитеранот.

Фаулс-Паздро ја опишува двојката како „лишена од какви било грижи на светот додека пловеле по Медитеранот“.

Во тужбата се тврди дека двојката постојано ветувала дека ќе му ги вратат парите на Фаулс-Паздро, па дури и предложиле да побараат помош од мајката на Клое за отплатата.

„Ќе поправам сè оваа недела“, наводно Брендан му напишал порака на Фаулс-Паздро, се тврди во тужбата.

Во друга порака, Брендан наводно напишал: „Апсолутно ќе го „поправиме“ ова утре [sic]; ако не, ќе позајмам од тешта ми... Ќе ги добиеме средствата до 14 часот, или ќе ги добијам од неа [sic]. Ќе кажам дека е живот или смрт.

Во еден момент, Клое наводно му рекла на Фаулс-Паздро: „Мајка ми сериозно разговарала со Брендан; таа рече дека ќе ги замениме чамците на 10 март ако ништо не се случи... и ќе смислиме како да им ги вратиме парите на сите и да си одиме оттаму.“

Мајката на Клое, Софи Демар, е старател на имотот на нејзиниот дедо. Пол Демар беше претседател и извршен директор на „Power Corporation of Canada“, компанија за финансиски услуги, до 1996 година.

Проценетата нето вредност на семејството Демара е 4,5 милијарди долари, а во времето на неговата смрт во 2013 година, Пол беше четвртиот најбогат човек во Канада.

Брендан и Клое се венчаа на раскошна церемонија во винскиот регион на Калифорнија во 2023 година, која беше објавена во списанието „People“. Според социјалните мрежи, тие имаат едно дете.

Фаулс-Паздро тврдеше дека двојката имала заеднички пријатели додека живееле во Калифорнија и почнале да поминуваат повеќе време заедно во 2024 година додека живееле во Мајами.

„Двојките се зближиле, поврзувајќи се поради нивните деца и други заеднички интереси. Брендан често го нарекувал Фоулс-Паздро свој „најдобар пријател“, велејќи му дека неговото семејство е „и мое семејство“, се наведува во судскиот документ.

Фолс-Паздро и неговата сопруга го поминале летото 2024 година во изнајмениот дом на Фицпатрикови на југот на Франција, а тој септември престојувале во домот на мајката на Клое во Монтреал.

Во тужбата се наведува: „За време на овие раскошни патувања, Фицпатрикови ги поставиле темелите за измама и кражба на Фаулс-Паздро и неговото семејство“.

Неколку месеци подоцна, во јануари 2025 година, Брендан наводно тврдел дека му е потребен кредитот за проект за недвижнини во Велика Британија и дека Фаулс-Паздро го отплатил.

Фаулс-Паздро бара отштета, вклучувајќи ги сите адвокатски трошоци, плус камата.

Ова доаѓа во време кога Брендан се соочува со посебна тужба во која го обвинуваат за водење на Понци шема од 80 милиони долари преку неговата компанија за рударство и управување со ресурси, Карбонатик.

Адвокатите на Брендан поднесоа одговор во кој во голема мера ги негираа многу од наводите во тужбата и признаа некои основни факти поврзани со договорите и одредени комуникации.

Тие, исто така, поднесоа контратужба обвинувајќи го тужителот за прекршување на своите обврски.

Случајот е сè уште во тек, а Брендан поднесе барање за промена на неговиот правен застапник на 3 септември.

Тагови: јахта милијардерка