Министерот за здравство Арбен Таравари денеска на прес-конференција информираше дека од тројцата нови пациенти од пожарот кои се пренесени од Кочани во Скопје, двајца се сместени во Клиничкиот центар, а едниот е сместен во „Осми септември“. Со тоа, во болниците во Кочани и во Штип нема пациенти од трагедијата во дискотеката.
-Тоа беше нашата стратегија, сите пациенти да ги повлечеме во Скопје и постепено сите да бидат во Клинички центар, за да бидат третирани на ниво на терциерно здравство, рече Таравари.
Тој информираше дека досега во Скопје се вкупно 84 пациенти, а до крајот на денот уште 26 треба да се испратат во други држави. Во Словенија четири, Хрватска четири, Австрија шест пациенти и Белград 12 пациенти.
До крајот на денот вкупно во земјава ќе останат 58 пациенти.
Таравари рече дека состојбата на сите пациенти досега е стабилна и е под контрола.
Министерот за здравство Арбен Таравари денеска на прес-конференција испрати апел до сите оние кои присуствувале на трагичниот настан во Кочани а не се пријавиле на лекар, да се пријават кај нивните матични лекари во болниците во Кочани или Штип, или пак во трите болници во Скопје.
Како што напомена министерот, состојбата на сите пациенти до сега е стабилна.
-Состојбата на сите пациенти до сега е стабилна. Да се надеваме дека нема да има компликации или влошување на состојбата. Континуирано добиваме информации од сите болници каде што се сместени нашите пациенти, како и од нашите центри тука во Скопје, состојбата е комплетно под контрола. Уште еден апел до сите луѓе кои што ја поминаа таа трагична состојба вчера во Кочани, а кои не се пријавиле на лекар, ги молам да се пријават кај нивните матични лекари или во болниците во Штип или во Кочани или во трите болници во Скопје, доколку имаат каква било симптоматологија, рече Таравари.