Сиљановска-Давкова: Родовата еднаквост не е давање предност, туку отстранување на пречките - Канал 5

Македонија

Сиљановска-Давкова: Родовата еднаквост не е давање предност, туку отстранување на пречките

Родовата еднаквост не е давање предност, туку отстранување на пречките и создавање еднаков терен за сите.

Сиљановска-Давкова: Родовата еднаквост не е давање предност, туку отстранување на пречките

Претседателката Гордана Сиљановска-Давкова се обрати на отворањето на настанот за промоција на наодите од Родовата самопроценка и Родовиот акциски план за унапредување на родовата еднаквост во Министерството за одбрана и во Армијата како дел од сеопфатната реформа на безбедносниот сектор во нашата држава, организиран од страна на Министерството за одбрана и Женевскиот центар за управување со безбедносниот сектор, со што се заокружи проектот за изработка на Родовиот акциски план 2024 – 2028.

Зборувајќи како жена, претседателка на државата и врховна командантка на вооружените сили, претседателката Сиљановска-Давкова истакна дека вистинската борба на жените, припаднички на Армијата, не почнува во мисиите во коишто учествуваат и еднакво се жртвуваат, туку во нивните сопствени редови, како борба за еднакви услови за работа и за третман, усогласување со семејните обврски, а за жал и борба за еднакво вреднување и напредок.

Третирајќи го прашањето на промовирање на родовата еднаквост како прашање на националната безбедност, претседателката потсети дека промовирањето на родовата еднаквост не подразбира давање предност, туку отстранување на пречките и создавање еднаков терен за сите, при што мора солидарно да се израмни патот и да се отвори простор за извонредност, без оглед од каде таа доаѓа, бидејќи Министерството за одбрана и вооружените сили коишто целосно ја одразуваат различноста и ползуваат сечии вештини, ќе бидат сила подготвена за секоја мисија или предизвик во иднина.

Во продолжение, интегралниот текст од обраќањето на претседателката Гордана Сиљановска-Давкова.

Почитувани претставници на Армијата,

Почитуван министре за одбрана,

Почитуван началник на Генералштабот,

Почитувани партнери од ДЦАФ,

Почитувани гости,

Дами и господа,

Моето денешно присуство овде, меѓу вас, го сметам за привилегија и резултат на мојата цврста лична заложба – да учествувам во унапредувањето на еднаквите можности, родовата сензитивност и инклузивната институционална култура во одбранбениот сектор.

Денес, таа моја заложба ја реализирам, заедно со министерот за одбрана, кој ме изненади синоќа со прекрасните резултати, преку промоцијата на два клучни документи: наодите од Родовата самопроценка и Родовиот акциски план за унапредување на родовата еднаквост во Министерството за одбрана и во Армијата како дел, како што чувме, од сеопфатната реформа на безбедносниот сектор во државава. Без проценка - нема реформи, без дијагноза – нема терапија. Ова се неопходните први чекори за промени, иако некој може да забележи дека самоевалуацијата не е вистинска евалуација, дека евалуацијата однадвор е пообјективна. Се разбира и таква постои.

Станува збор за настан, овој во кој учествувам, со којшто се заокружува првата самопроценка од оваа област во земјава, но и на Балканот, за што јас, еве сакам да изразам особена благодарност до Женевскиот центар за управување со безбедносниот сектор, како и до сите учесници во овој процес.

Како претседателка и врховна командантка на вооружените сили, многу убаво звучи во женски род, кон родовите прашања во Армијата и во одбраната не се однесувам само како набљудувачка, туку како актерка.

Секоја жена којашто остварила одреден напредок во својата кариера во било која област, особено ако станува збор за успех во т.н. традиционално „машка“ област, вештачка синтагма, ќе се присети на оној за мене тивок, а неретко и гласен сомнеж во нејзините способности, ќе се соочи со скептицизам па и со осудувачки погледи на нашиот трнлив пат, наречен „професионален развој“ и замислете, сето тоа за да не биде гледана, перцепирана како жена претседател, жена војник, нема изгледа ни именка во женски род или жена генерал, туку единствено како личност на претседателската, војничката или генералската должност. Личности сме ние како и сите луѓе.

Искрено, кога ќе прочитам дека дел од нашите одбранбени сили се соочуваат со вакви предизвици и бариери, не само што го разбирам, туку јас добро го познавам тоа чувство.

Жалам што, за многу жени во одбраната, без оглед дали се дел од Министерството или од воените структури, вистинската борба не почнува во мисиите во коишто учествуваат и еднакво се жртвуваат, туку во нивните сопствени редови, како борба за еднакви услови за работа и за рамноправен статус, како борба за усогласување на професионалниот живот со семејните обврски, а за жал и борба понекогаш за еднакво вреднување на трудот и напредокот.

Почитувани,

Самопроценката, сама по себе, е чин на искреност кон себе, но и кон другите, на одговорност, на отчетност, но и на растеж и јас мислам дека не секој и секогаш е подготвен на тоа. Ние сме подготвени.

Таа не е брз поглед во огледалото, туку е длабока интроспекција, фокусирање на сржта на институцијата или организацијата на којашто ѝ припаѓаме и којашто ја сакаме и сакаме да ја негуваме.

Токму затоа, за мене Акцискиот план којшто произлегува од ваквата самопроценка има специфична тежина и има поинаква димензија – се темели на автентичното и интимно чувство на секој од нас за нашата улога во институцијата и ја одразува нашата искрена желба за нејзин развој и за нејзин раст.

Неспорно е дека не е доволно институционалната култура на инклузивност само да се регулира со закон, мислам дека институционалната култура мора да се живее. Родовите стереотипи се длабоко вкоренети и потребен е труд и личен пример за да се искоренат. Затоа јас сум денеска овде. Но, не е доволен ни личниот пример, туку е потребно нешто што јас честопати сум им го замерила на жените – солидарноста, женска солидарност, женско сестринство, да не зборуваме повеќе за „успешни мажи зад кои стојат добри жени“, туку успешни мажи и жени коишто чекорат заедно, свесни дека дискриминацијата еднакво ја чувствуваат, но не секогаш на иста основа, но со еднаков разорен ефект.

Затоа силината и важноста на овој момент лежат во нашата волја да се соочиме со сите предизвици заедно, и мажите и жените, а тоа го правиме, не заради некој надворешен фактор или заради убавата слика, небаре е Доријан Греј, туку затоа што така е правилно и така е добро.

Кога ги игнорираме или ги потценуваме способностите на луѓето заради нивниот пол, всушност ги ослабнуваме сопствените капацитети. Кога унапредувањата во која било област, па и во Армијата, се вршат врз основа на некои застарени претпоставки, тогаш буквално ги испуштаме од раце оние што можат да ја обликуваат иднината или ако сакате во најмала рака, да внесат нов и поинаков дух во начинот на управувањето и менаџирањето, односно во начинот на којшто се работи во овие институции.

Тука доаѓам до едно прашање на кое му посветувам особено внимание.

Иако денес жените се присутни во речиси секој армиски род, сепак се многу ретко или поретко, да бидам поумерена, присутни на раководна, водечка или командна улога. Го гледам началникот пред мене и знае колку сум досадна кога велам: чекам предлози за жени генерали. Оваа нерамнотежа испраќа една суптилна порака дека иако жените се прифатени како дел од Армијата или безбедносните структури, не секогаш се добредојдени и на врвот, токму како резултат на одредени застарени концепти, за мене налик на некакви бирократски Гордиеви јазли што мора да се пресечат со нови, современи решенија. Јас ветувам дека како претседателка ќе дадам сè од себе да помогнам во тој процес.

Почитувани припадници на Армијата,

Промовирањето на родовата еднаквост според мене не подразбира давање предност, туку отстранување на пречките и овозможување еднаков третман за сите. Ние мора да го израмниме патот и да отвориме простор за извонредност, без оглед на тоа од каде таа доаѓа. Јас уште во мојата кампања најавив дека имам амбиции за отворање на национален центар за извонредност и очекувам тука помош од нашата претставничка, заменичката во НАТО, Радмила Шекеринска, мислам дека може да ни помогне. Не станува збор за идеологија, туку за национална безбедност бидејќи Министерството за одбрана и вооружените сили, коишто целосно ја одразуваат различноста и ползуваат сечии вештини, сигурна сум дека ќе бидат сила подготвена за секоја мисија или предизвик во иднина.

На крај, би сакала да им честитам и да им заблагодарам на кои учествуваа во овој процес, да ги охрабрам да продолжат во истиот правец, со дела, а не само со зборови, вклучувајќи ме и мене. Начинот на којшто донесуваме одлуки, начинот на којшто правиме акциски планови и ги реализираме, е марш кон нашата иднина. Не велам маратон зошто имаме и друг маратон - евроинтеграциски. А, вие, одбравте вистински начин, свесни дека силата се гради со еднаквост, а јас сум убедена дека силната, правична и единствена Армија е темелот на секоја држава.

Тагови: Гордана Сиљановска-Давкова родова еднаквост

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Живот

Може ли да се предвиди колку ќе живееме? – научниците развија нова метода

Научниците развија нов биолошки часовник базиран на генска активност кој прецизно ја проценува биолошката возраст и ризикот од смртност и открива индикатори за хронични болести.

Може ли да се предвиди колку ќе живееме? – научниците развија нова метода

Иако оваа алатка не може точно да предвиди кога некој ќе умре, се покажа како многу успешна во проценката на стадиумот на животниот век на една личност или животно, пишува Science Alert.

Според истражувачкиот тим, алгоритмот базиран на биомаркери ќе биде корисен за анализа на стапките на биолошко стареење кај различни видови, вклучувајќи ги и луѓето, и за разбирање кога тоа стареење се забрзува или забавува.

Нов пристап кон мерење на стареењето

Сегашните алатки за проценка на биолошкото стареење, таканаречените епигенетски часовници, ги следат хемиските ознаки на ДНК кои се акумулираат со возраста, но тие не се секогаш сигурни. Новиот часовник е транскриптомски, што значи дека ги анализира молекулите на РНК кои ги носат генетските инструкции за создавање протеини. Ова одредува кои гени се активни, а кои се неактивни, и бидејќи оваа активност се менува со возраста, овие податоци можат да се користат како индикатор за стареење.

Истражување на четири видови цицачи

Една од клучните иновации на истражувањето беше фактот дека научниците собраа огромен сет на податоци за четири видови - глувци, стаорци, макаки и луѓе - и ги споредија процесите на стареење помеѓу животните и различните делови од телото.

„Стареењето и надворешните влијанија влијаат на здравјето и смртноста, но основните молекуларни механизми на овие процеси остануваат нејасни“, наведуваат истражувачите во својот труд.

„Развивме транскриптомски часовници за хронолошка возраст и ризик од смртност за повеќе видови и ткива, врз основа на повеќе од 11.000 примероци од четири цицачи. Така одговоривме на потребата за биомаркери на стареење што можат да се применат на различни органи и видови, а во исто време да ја одразуваат здравствената состојба.“

Што откриваат гените за стареењето?

Тимот откри дека гените поврзани со здрава клеточна делба и заздравување на раните се знак на побавно молекуларно стареење. Од друга страна, гените поврзани со клеточната смрт и воспалението се индикатори за побрзо стареење и постара биолошка возраст.

Новиот молекуларен часовник, прилагоден на овие наоди, се покажа како точен во проценката на побавното или побрзото биолошко стареење, како и на ризикот од смртност. Во примероци од човечка крв, тој го процени ризикот од смртност исто толку успешно како и најдобрите постоечки епигенетски часовници.

Покрај тоа, тој идентификуваше познати фактори кои придонесуваат за стареење, како што се хроничните болести, кај животински модели и примероци од ткива од човечки пациенти.

Изненадувачка сличност меѓу видовите

Научниците беа изненадени од фактот дека генетските индикатори за стареење беа многу слични кај сите четири набљудувани видови. Оваа конзистентност е покажана и кај различни типови клетки, вклучувајќи мускулни и крвни клетки.

„Истите гени се поврзани со стареењето, на пример, во црниот дроб и срцето на стаорци и луѓе“, изјави за Scientific American водечкиот автор на студијата, биоинформатичарот Александар Тишковски од Медицинскиот факултет Харвард.

„Иако клетките имаат сосема различни функции и потекло, тие сепак ги делат истите биомаркери поврзани со стареењето.“

Причина, последица или адаптација?

Овие заеднички карактеристики сугерираат дека овие биомаркери може да бидат вистински маркери на стареење, иако сè уште не е јасно дали тие придонесуваат за самиот процес на стареење.

„Одамна е познато дека активноста на гените што штитат и реагираат на клеточниот стрес се зголемува со возраста, што укажува на адаптација, а не на предизвикувачки двигатели“, напиша молекуларниот биолог Жоао Педро де Магаљаес од Универзитетот во Бирмингем во коментар за студијата.

„Затоа, не е сигурно дали транскриптомските маркери го поттикнуваат стареењето, се резултат на него или претставуваат компензаторни механизми.“

Потенцијална примена на новата алатка

Иако не можеме да влијаеме на поголемиот дел од процесот на стареење, некои фактори, како што се исхраната, болестите или загадувањето, можат да го забрзаат или забават нашиот биолошки часовник. Новата аналитичка алатка би можела да биде корисна токму за тестирање на ефектите од различни интервенции.

Може да се користи за следење на тоа како промените во животниот стил или лековите влијаат на биолошкото стареење, без потреба од долгорочни клинички испитувања. Сепак, важно е да се напомене дека ова е сè уште алатка за проценка што во многу случаи нема да го замени класичното тестирање, но би служела за рани проценки.

Научниците сè уште имаат многу работа да направат за да ја развијат оваа техника, вклучително и понатамошно тестирање на поразновидни човечки популации и попрецизно дефинирање на мерењето на стареењето. Сепак, се чини дека ова би можело да биде уште една важна алатка во истражувањето на стареењето.

Истражувачите веруваат дека откриле заеднички модели на биолошко стареење кај различни видови и ткива.

„Оваа студија открива зачувани модели и модуларна архитектура на регулирање на смртта, обезбедувајќи рамка за квантифицирање и таргетирање на стареењето на клеточните подсистеми кај различни видови и ткива“, заклучуваат истражувачите во труд објавен во списанието Nature.

Тагови: научниците

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Украинците тестираа опасен проектил: Треба да биде исто толку добар, но поевтин од американскиот

„Фајер Поинт“, најголемиот украински производител на ракети и беспилотни летала, спроведе пробен лет на балистичка ракета што ќе биде основа за нов проект за систем за ракетна одбрана.

Украинците тестираа опасен проектил: Треба да биде исто толку добар, но поевтин од американскиот

„Фајер Поинт“, најголемиот украински производител на ракети и беспилотни летала, спроведе пробен лет на балистичка ракета што ќе биде основа за нов проект за систем за ракетна одбрана, изјави директорката на компанијата, Ирина Терек.

„Неодамна спроведовме исклучително важен тест: целосно контролиран маневар на летот на ракетата FP-7.X, што ќе биде основа на идниот пресретнувач на антибалистички ракети „Фреј“, објави Терек на платформата X, пренесува Ројтерс.

FP-7.X е варијанта на пресретнувачот на балистички ракети FP7 на „Фајер Поинт“, кој моментално е во фаза на развој и, според раководството на компанијата, ќе може да погодува и копнени цели.

Коосновачот на „Фајер Поинт“, Денис Штилерман, во април изјави за Ројтерс дека компанијата е во преговори со „некои европски компании“ за лансирање на нов систем за воздушна одбрана способен да соборува суперсонични балистички ракети, создавајќи поевтина алтернатива на американскиот систем за воздушна одбрана „Патриот“.

Самата ракета е само еден дел од системот за воздушна одбрана, а аналитичарите посочуваат дека најсложените делови од системот се копнената радарска мрежа и системот за водење инсталиран во проектилот.

Од почетокот на војната во Украина во 2022 година, Русија често извршува напади со балистички ракети.

Украинскиот претседател Володимир Зеленски денес изјави дека Европа мора да ја забрза својата програма за антибалистичка ракетна одбрана.

Официјален Киев со месеци се жали на критичен недостиг на пресретнувачки ракети за системот за воздушна одбрана „Патриот“, единственото сигурно оружје за одбрана од балистички закани.

Тагови: проектил

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Бизарно

Кумот се струполи пред шокираните младенци, матичарот продолжи како ништо да не било (ВИДЕО)

Снимка од свадба во Тексас на која кумот се онесвестил среде церемонијата додека матичарот продолжил како ништо да не се случило стана вирален хит со повеќе од седум милиони прегледи.

Кумот се струполи пред шокираните младенци, матичарот продолжи како ништо да не било (ВИДЕО)

Драматичниот момент е забележан на свадба на отворено.

Кумот се струполил среде церемонијата

Видеото е објавено на TikTok од кумот, 28-годишниот претприемач Дрејтон Вилијамс од Остин. „Луѓе, не клекнувајте“, се пошегува тој во описот на објавата. Во видеото, Вилијамс прво почнува да се ниша зад младоженецот, а потоа одеднаш паѓа со лицето надолу на земја со силен удар.

Додека гостите воздивнуваа во шок, младоженецот и вториот кум веднаш му притрчаа на помош. Матичарот, сепак, продолжи да зборува речиси без пауза.

Младоженецот набрзо се врати кај својата свршеница, додека таа и деверушите изгледаа видливо загрижени. Другите членови на свадбената придружба го поддржаа Вилијамс, додека матичарот изговори: „Но, кога љубовта е вистинска и вистинита, таа трае“.

„Зошто не престана?“

Видеото собра повеќе од седум илјади коментари, а многумина беа изненадени што матичарот не ја прекина церемонијата за да може кумот да се опорави. Коментарот „Зошто не престана?“ собра повеќе од 452.000 лајкови.

„Зошто никој не реагираше веднаш? Зошто продолжи да зборува?“ праша еден корисник. „Сигурно имале навистина густ распоред“, се пошегува друг, додека некој додаде: „Дефиницијата за „шоуто мора да продолжи“.“

@draytonw Don’t lock your knees folks #wedding #groomsmen #bridesmaids #fail ♬ original sound - Drayton Williams

Кумот објасни што се случило

Вилијамс објасни за американскиот портал Newsflare дека за време на церемонијата стоел на вкочанети колена и дека топлината и нервозата заедно предизвикале вртоглавица. „Мислев дека е само трема од сцената, а не дека ќе се срушам“, рече тој.

„Следното нешто што го паметам беше како моите пријатели ме кренаа и како се обидував да станам откако накратко ја изгубив свеста“, додаде тој.

Тој, исто така, изјави за списанието People дека младенците не биле лути поради инцидентот. Откако јаделе и пиеле, подоцна одржал говор на свадбената вечера. „Искрено се смееја затоа што ми беше срам, па сакаа да ме развеселат“, рече тој.

Тагови: матичарот младенците

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер