Неговото закрепнување и состојбата се чуваат во тајност и јавноста добива многу малку информации за еден од најдобрите спортисти на сите времиња. Италијанскиот весник Газета дело Спорт денес објави дека неврологот Ерих Ридерер ја открил состојбата на Шумахер во документарец на француската ТМЦ.

"Тој дише, буден е, срцето му чука нормално. Веројатно може да седне и да направи мал чекор со нечија помош", рече Ридерер, а потоа додаде дека му се чинело дека неговата состојба нема да може многу да се подобри: "Повредите што ги доби беа тешки и направија голема, неповратна штета. Се плашам дека нема да може подобро од ова. Тој е во вегетативна состојба. Буден е, но не одговара во разговор."

Да потсетиме, Шумахер беше на одмор на Алпите кога на скијање со неговиот син се удри во карпа поради што полета во воздух, падна од патеката и се здоби со сериозни повреди. Јавноста наскоро дозна дека тој бил ставен во кома за да се спречи оток на мозокот, а експертите велат дека неговиот живот го спасила кацигата без која тој би умрел.

Во текот на следните неколку години имаше лажни вести дека Шумахер е подобар и веќе оди. Досега ваквите информации доаѓаа од неофицијални канали, а сега јавноста за прв пат има информации од експерт.

Пред два месеци, поранешниот шеф на Ферари откри дека го посетувал. Ниту тој ниту Фелипе Маса не ја откриле точната дијагноза и напредок. Маса рече: "Ја познавам неговата состојба, ги имам сите потребни информации затоа што секогаш сум бил близу до него. Не се дружев често со неговата сопруга Корина затоа што не доаѓаше на трките. Сите мора да бидеме свесни дека ова е тешка ситуација и дека мора да ја почитуваме желбата на семејство кое сè уште не сака да ги објавува работите јавно. Тогаш, кој сум јас да го сторам тоа? “, рече Маса, нагласувајќи дека желбите на семејството за тајност мора да се почитуваат.

Претходно оваа година, италијанскиот хирург Никола Ачијари рече дека Шумахер никогаш нема да биде личноста што ја паметиме. "По шест години, Михаел Шумахер повеќе не е личноста што ја паметиме од автомобилизмот. Иако долго време интензивно се грижевме за него, многу се промени во и на неговото тело - од органи, преку коски, до мускули. Тоа му се случи “, рече Ачијари.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.