Една нова студија открива детали од истражувањето кое посебно ќе ги интересира припадничките на понежниот пол.

Жените кои ретко имаат интимни односи не само што може да бидат поподложни на насобраната тензија, туку според новата студија, може да бидат изложени и на поголем ризик од рана смрт. Студијата спроведена од медицински истражувачи од Универзитетот Валден во Пенсилванија покажа дека жените на возраст меѓу 20 и 59 години кои имале секс помалку од еднаш неделно имаат 70 отсто поголеми шанси да умрат во следните пет години, во споредба со жените кои имале интимни односи барем еднаш неделно.

Тимот научници користел податоци од огромната база на податоци на американскиот Центар за контрола на болести (ЦДЦ) и анализирал сексуална активност, депресија, дебелина и други здравствени фактори кај 14.542 мажи и жени. Иако студијата ги опфатила двата пола, врската помеѓу ретката сексуална активност и зголемената смртност била пронајдена само кај жените.

Поголем ризик од смртност

Научниците открија дека жените кои ретко имаат сексуални односи, имаат зголемено ниво на протеин кој пак е поврзан со појавата на воспаленија, што може да предизвика оштетување на здравите клетки, ткива и органи. Исто така, кај жените кои почесто биле сексуално активни овој ризик од смртност бил значително помал.

Посебно интересно е откритието поврзано со депресијата. Според податоците, жените кои пријавиле ниска сексуална активност, страдале од депресија имале зголемен ризик од смрт, за дури 97 отсто во споредба со жените кои биле депресивни, но имале редовни сексуални односи.

- За време на интимниот однос се ослободуваат ендорфини кои можат да спречат сериозни здравствени проблеми и да ги намалат ефектите од депресијата – изјавил главниот автор на студијата, д-р Сриканта Банерџи.

Важно предупредување за мажите

Иако истражувачите веруваат дека сексуалната активност има позитивен ефект врз општото здравје, вклучувајќи го и кардиоваскуларното здравје, тие не пропуштаат да напоменат нешто важно и за мажите. Иако поврзаноста со смртноста кај жените е јасна, кај мажите, истражувањата покажале дека премногу сексуални односи може да бидат штетни.

– Мажите кои имале многу чести сексуални односи имале шест пати поголеми шанси да умрат предвреме од жените со истата зачестеност – истакнуваат истражувачите, пренесува Дејли меил.

Оваа студија покажува дека сексуалната активност може да има големо влијание врз здравјето, но дека честотата и рамнотежата играат клучна улога. Експертите препорачуваат дека сексуалната активност не треба да се занемарува, бидејќи може да биде важен фактор за намалување на здравствените ризици и за подобрување на квалитетот на животот.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.