„Владата го прави тоа што треба да го направи. И ние треба да се обновиме по оваа трагедија и да ја рестартираме економската и социјалната активност“, рече шефот на социјалистичката влада на прес-конференција.

„Подоцна, политичката дискусија ќе се фокусира на прашањата што треба да се подобрат со оглед на оваа климатска криза и, без сомнение, во поглед на преземањето на политичките одговорности кои секако ќе треба да се оправдаат“, продолжи тој.

Санчез најави и 3,76 милијарди евра дополнителни мерки за обнова на Валенсија по најсмртоносните поројни поплави во модерната историја на Шпанија.

Повеќе од 220 лица загинаа, а 32 се водат како исчезнати по обилните дождови кои предизвикаа поплави во предградијата јужно од регионалната престолнина Валенсија на 29 октомври, според извештајот објавен од властите.

Минатата недела веќе беше најавена помош од 10,6 милијарди евра.

„Сè уште има улици што треба да се исчистат, гаражи што треба да се исцедат, има многу инфраструктура што треба да се санира и, згора на тоа, има многу животи, многу домови и многу работни места што треба да се обноват“, им рече Санчез на новинарите.

Делови од шпанскиот регион Валенсија, кој пред речиси две недели беше погоден од обилни врнежи и поплави, од денеска се враќаат во нормалното секојдневие. Се отвораат 47 училишта, соопшти на Х.

Продолжија напорите за спасување и расчистување во 80-те најтешко погодени општини околу регионалниот главен град, со помош на речиси 20.000 полицајци, војници и волонтери.

Шпанската државна метеоролошка служба АЕМЕТ за денеска предвидува продолжување на врнежите во регионот на Валенсија, а од утре пообилни врнежи од дожд во Каталонија околу Барселона на североистокот на земјата и на Балеарските острови во Средоземното Море.