Македонија

Шест вола „пребегале“ во Ѓуешево, Бугарија- заедничка комисија ќе одлучува околу нивната судбина

Локалниот проблем со кравите во Крива Паланка излезе од границите на Македонија откако шест вола преминаа во Бугарија

Локалниот проблем со кравите во Крива Паланка излезе од границите на Македонија откако шест вола преминаа во Бугарија, па сега главоболки им создаваат и на надлежните кај источниот сосед. Говедата ги забележала градоначалничката на погранично Ѓуешево која веднаш пријавила, по што и тамошните власти веднаш се впуштиле во заловување.. Три грла имале ушно обележје, па се дефинитивно од Македонија, за останатите велат ќе биде предизвик да се утврди..

-Две од животните се со ушни обележја, идентификувано е од каде се, како што разбрав, ушните обележја се всушност од Македонија,- Кристијан Иванчов – Управител на Ќустендил.

Судбината на грлата засега им задава дополнителна главоболка на надлежните – вели градоначалникот на Ќустендил, во чија околина е Ѓуешево. Една од опциите е евтаназија, која според него е помалку веројатна, оти ги прегледале и воловите биле здрави. Тој верува и дека ќе има интерес кај сопствениците да си ги вратат воловите, оти едно грло чинело околу 3500 евра.

-Во овој момент ги храниме и ги одгледуваме, станува збор за шест животни, за кои пред неколку минути пристигнаа последните испитување, и сите шест се апсолутно здрави. / Во пракса опцијата е евтаназија, но животните се здрави, што значи ќе може да се избегне евтаназијата, може да се дадат во банка за храна(хуманитарно), тоа е втората варијанта, и третата е да се најде процедура, по договор да се вратат во Македонија,- Огнен Атанасов – Градоначалник на Ќустендил.

Воловите кои на проблемот му дадоа меѓународни димензии, се истите оние кои 27 годишната поранешна мисица Јулија Ѓорѓиевска ги бркаше по улици и ридови за да ги спречи службените лица да ги фатат – потврдуваат од О. Крива Паланка. На опструкции од поранешните сопственици се жалеа тогаш и од АХВ.

Од општината додаваат дека и натаму, по бројните протести и апели, проблемот со грлата останува и дека тие и натаму им создаваат проблеми на граѓаните, уништувајќи им ги дворовите и посевите. Обвинуваат дека агенцијата бавно ги спроведува најавените акции за заловување.

Од АХВ пак, кои на 27 февруари посочија дека во рок од 10 дена проблемот ќе биде целосно отстранет, велат дека и натаму дронски ги мапираат кравите и во соработка со МВР работат на нивно заловување, по што во најбрз рок ќе биде објавен оглас за нивна продажба.

Инаку, пред неколку години, позната стана кравата Пенка, кој премина од Србија во Бугарија, па иако и’ се закануваше евтаназија, Пенка сепак беше поштедена и се врати кај својот сопственик кој продолжи да се грижи за нејзе.

Тагови: крави

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Обама: Потрошивме милијарди, многумина загинаа, а состојбата само се влоши (ВИДЕО)

Поранешниот американски претседател Барак Обама изјави дека САД, по војната против Иран што ја започна претседателот Доналд Трамп, се чини дека се вратиле на почеток или дури и во полоша позиција отколку пред почетокот на конфликтот.

„Сега влеговме во војна, потрошивме милијарди и милијарди долари, ја ставивме нашата војска под огромен притисок. Многу луѓе загинаа. И се чини дека сме назад таму каде што бевме пред да ја започнеме војната, освен што можеби сме во малку полоша ситуација“, рече Обама во интервју за емисијата „TODAY“.

Тој одговараше на прашање за меморандумот за разбирање меѓу САД и Иран. „Многу ми е мило што гледам прекин на огнот и се надевам дека ќе се одржи“, рече Обама, додека ја доведуваше во прашање оправданоста за војна против Иран.

Трамп ги повлече САД од нуклеарниот договор потпишан во 2015 година

Поранешниот претседател потсети дека според нуклеарниот договор со Иран, постигнат за време на неговиот мандат, „Иран се согласи да не развива нуклеарно оружје“. „Оваа администрација, или неговата претходна верзија, се повлече од тој договор, што потоа доведе до тоа Иран да развие поголем нуклеарен капацитет“, тврдеше Обама.

За време на неговиот прв мандат во 2018 година, Трамп ги повлече САД од нуклеарниот договор потпишан во 2015 година. Тој договор ги утврдуваше деталните чекори што Техеран требаше да ги преземе во текот на повеќе од 25 години за да го спречи да стекне или развие нуклеарно оружје.

Сегашниот меморандум за разбирање не го решава целосно прашањето за иднината на нуклеарната програма на Иран. Трамп го потпиша меморандумот за време на вечера во Версајскиот дворец во среда навечер. Документот предвидува рок од 60 дена за постигнување на потраен договор што би го прекинал конфликтот.

Тагови: Барак Обама

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Живот

Најубавата плажа на светот почнува да смрди на расипани јајца- туристите се соочуваат со сериозни здравствени проблеми

Плажите на Карибите со нивната тиркизно сина вода и бел песок привлекуваат милиони туристи секоја година.

Меѓутоа, на многу места во моментов сликата е сосема поинаква: на бреговите се натрупуваат наслаги од кафени алги долги метри, кои покриваат цели плажи и шират остра смрдеа. Експертите зборуваат за една од најтешките наезда на саргасум (вид на кафеави алги) од почетокот на мерењата. Веќе во мај, околу 38 милиони тони од овие алги беа регистрирани на Атлантикот и на Карибите, што претставува нов рекорд, објави ОЕ24.

Посебно беа погодени популарните туристички региони во Мексико, Доминиканската Република, Барбадос, Мартиник и другите острови на Карибите. Таму локалните самоуправи и хотелиерите секојдневно се борат против новите количества алги кои струите ги носат на земјата. Количините би можеле уште повеќе да се зголемат во текот на летните месеци, поради што туристичкиот сектор стравува од сериозни загуби.

Најголемиот проблем всушност започнува дури кога алгата ќе остане на плажата. По околу два дена започнува процесот на распаѓање, при што се ослободуваат гасови како водород сулфид и амонијак. Водородниот сулфид е главниот виновник за озлогласениот мирис на расипани јајца, кој на некои места може да се шири со километри наоколу.

На одредени делови од брегот смрдеата станала толку интензивна што туристите не ги отвораат прозорците на хотелските соби или воопшто не ја избегнуваат плажата. Засегнатите туристи пријавуваат и придружни симптоми како што се печење и насолзени очи, главоболки и гадење.

Дури и персоналот на хотелот и екипите за чистење вложуваат многу напор. На Кајманските острови туристичките компании се жалат на огромни дополнителни трошоци и значителен пад на бројот на гости.

Американската агенција за заштита на животната средина (ЕПА) посочува дека гасовите што се ослободуваат од гнили може да предизвикаат иритација на дишните патишта, кашлање, главоболка, вртоглавица и гадење. Особено чувствителни се децата, постарите лица, како и астматичарите и хроничните пациенти. Во Мартиник и Гвадалупе веќе се регистрирани илјадници случаи на здравствени проблеми поврзани со водород сулфид.

Покрај смрдеата трпат и екосистемите. Густите теписи од алги ја блокираат сончевата светлина, ги уништуваат коралните гребени и ливадите со морска трева и им отежнуваат на морските желки да ги снесат јајцата на плажите.

Научниците сè уште не разјасниле целосно зошто количината на алги се зголемува со години. Се претпоставува дека станува збор за комбинација од зголемени температури на морето, променети ветрови и морски струи, како и зголемен прилив на хранливи материи од големите речни системи. Од 2011 година, на Атлантикот редовно се формира огромен „појас на саргасум“, кој се протега на неколку илјади километри и секоја година носи нови маси на алги кон Карибите.

За туристите оваа појава не мора да значи откажување на нивниот одмор. Многу хотели секојдневно ги чистат своите плажи и поставуваат заштитни бариери во водата. Сепак, пред да резервираат, патниците треба детално да ја проверат ситуацијата на посакуваната локација, бидејќи на некои места сонот за тропски рај буквално го измива кафеав, смрдлив бран алги.

Тагови: плажа туристи

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Дрон погоди брод во Црното Море- загина еден член на екипажот

Еден член на екипажот загина, а двајца други се повредени по напад со беспилотно летало врз брод под панамско знаме во Црното Море, соопшти Панамската поморска администрација (AMP).

Инцидентот се случил во четврток и еден од повредените членови на екипажот е во сериозна состојба, соопшти AMP. Панамските власти собираат официјални информации за нападот и се во контакт со вклучените страни.

Додека се истражува потеклото на нападот со беспилотно летало, AMP им советуваше на бродовите да избегнуваат пловење низ украинските и руските води во Црното Море и Азовското Море на север.

Панама управува со најголемиот регистар на бродови во светот, со околу 16 проценти од глобалната трговска флота што го вее нејзиното знаме.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.