Шест држави на НАТО ќе градат „ѕид од дронови“ кон Русија

Шест земји од НАТО планираат да развијат „ѕид од дронови“ за одбрана на границите со Русија.

Министрите од Финска, Норвешка, Полска и трите балтички земји во текот на викендот изјавија дека разговарале за создавање на координиран систем за беспилотни летала долж нивните граници со Русија за да „спречат шверц и понатамошни провокации“, пишува Фајненшл тајмс.

„Ова е сосема нова работа - ѕид од дронови што се протега од Норвешка до Полска - и целта е да се користат беспилотни летала и други технологии за заштита на нашите граници од провокации од непријателски земји и да се спречи шверцот“, изјави литванската министерка за внатрешни работи Агне Билотаите за Baltic News. Сите шест земји се соочија со, како што велат, таканаречените хибридни напади од Русија во последните месеци и години, вклучително и испраќање баратели на азил од Африка и Блискиот Исток преку нивните граници.

Мари Рантанен, министерката за внатрешни работи на Финска, за јавната телевизија Yle изјави дека планот „ќе се подобри со текот на времето“ и може да помогне во одбраната на 1.340 километри долгата граница на нордиската земја со Русија.

Детали за тоа кога и како ќе функционира „ѕидот од дронови“ не се дадени. Билотаите рече дека секоја земја треба да ја заврши својата „домашна задача“ и предложи да се користат и средствата од ЕУ.

Земјите од првата линија на НАТО ги засилија предупредувањата за намерите на Русија по инвазијата на Москва на Украина во февруари 2022 година. Руското Министерство за одбрана објави нацрт-предлог на својата веб-страница минатата недела за еднострано проширување на своите поморски граници со Литванија и Финска, а потоа го избриша планот.

Еден ден подоцна, руските граничари отстранија 25 пловки од естонските води што ја означуваат границата, што предизвика бес во Талин.

Војната на Русија против Украина ја истакна важноста на беспилотните летала во војувањето, при што двете страни ги користат во нападите. Неколку земји на НАТО одговорија со формирање или зајакнување на сопствени единици за борбени дронови.

Шесте земји на НАТО, исто така, разговарале за плановите за евакуација на голем дел од нивното население во случај на конфликт. Финските официјални лица, на пример, изразија изненадување што Украина држи цивили на или во близина на линијата на фронтот, велејќи дека плановите за одбрана на нордиската земја вклучуваат евакуација на пограничното население.

ОН: Во 2023 година за 72 проценти зголемен бројот на цивилни жртви во конфликтите ширум светот

 Бројот на цивилни жртви во вооружените конфликти ширум светот минатата година се зголеми за 72 отсто, изјави денеска Високиот комесар за човекови права на ОН, Волкер Турк.

Тој посочи дека алармантно е зголемен бројот на убиени жени и деца во споредба со 2022 година.

Според податоците на ОН двојно е зголемен процентот на убиени жени во 2023 година, додека бројот на деца жртви е трипати поголем. /МИА

Собранието гo избра составот на Буџетскиот совет на Собранието

 Собранието на денешната петта седница ги избра составите на Буџетскиот совет на Собранието и на Советот на Собранискиот канал.

За претседател на Буџетскиот совет на Собранието на Република Северна Македонија е избран Антонијо Милошоски, потпретседател на Собранието, а за заменик-претседател Сања Лукаревска, претседател на Комисијата за финансирање и буџет. Членови на Буџетскиот совет се избраа пратениците - Бојан Стојаноски, Ели Панова, Игор Здравковски, Лидија Петковска, Халил Снопче, Фатмир Битиќи, Ељми Азири, Илир Хасани и Борислав Крмов.

За претседател на Советот на Собранискиот канал е избран Јован Митревски, актуелен потпретседател на Собранието. За членови на Советот на Собранискиот канал се избраа пратениците - Ели Панова, Марија Митева, Благица Ласовска, Санарда Имери-Стафаи, Аднан Азизи, Бобан Карапејовски, Горан Мисовски, Даниела Николова, Дијана Тоска и Илир Демири. За заменици-членови на Советот на Собранискиот канал се избраа пратениците - Љупчо Пренџов, Тони Јаревски, Драгана Арсова, Имрлије Салиу-Фетаи, Садик Сулејмани, Даниела Белимова, Митко Белимова, Митко Трајчулески, Бисера Костадиновска Стојчевска, Рина Ајдари и Сали Мурати.

Во рамки на денешната пленарна седница беше потврдена оставката на Сеат Личина поднесена на 23 април 2024 година од функцијата член на Регулаторната комисија за домување. Исто така, на оваа седница беше констатиран престанок на мандатот на Валентина Димовска од функцијата на Државниот совет за превенција на детско претстапништво заради исполнување на условите за старосна пензија.

Ијан Меккелен паднал од театарска сцена и се повредил

Сер Ијан Меккелен, последниве десетлетија познат по улогите во „Господарот на прстените“ и „Икс-мен“, паднал од сцена за време на театарска претстава во Лондон.

Британскиот глумец наводно се сопнал од реквизитите и потоа почнал да вика од болка, пишува „Дејли мејл“.

„Помогнете ми, моите раце...“ - повторувал Меккелен (85) во театарот „Ноел Кауард“, каде што глумел во „Кралски игри“ (Player Kings). Лекарите од публиката му пришле на помош, а набрзо пристигнала и брзата помош којашто го пренела глумецот в болница. Публиката беше изведена надвор од театарот со известување дека претставата е откажана. Од театарот потоа соопштија дека Меккелен се чувствува добро и се очекува брзо закрепнување, но додадоа дека, „за да му се даде време за одмор“, следната претстава што требаше да се одржи - е откажана.

- Сите беа преплашени кога тоа се случи, поради неговата возраст се плашевме дека тоа може да биде смртоносно за него, изјави еден посетител.

Инаку, претставата „Кралски игри“, со приказна сместена во Англија во раниот 15. век, игра во истиот театар до јули, а потоа треба да гостува низ театрите ширум Велика Британија. /МИА

притисни ентер