Според весникот, Зоран Заев и Радмила Шекеринска го преземаат лидерството на „Бихаќска“. Повикувајќи се на извори од СДСМ, весникот пишува дека овој двоец е најпосакуваната опција меѓу членството во партијата на мајскиот Конгрес. Наводно, ниту актуелниот лидер Бранко Црвенковски немал против новите наследници, а Заев и Шекеринска веќе добиле поддршка и од меѓународниот фактор.
„Се лобира за таа варијанта, која за мнозинството членови е најприфатлива. Има голем дел приврзаници на Црвенковски и тие заговараат тој да остане на челното место, а дел јавно, дел прикриено се спомнуваат и други имиња. Но, Заев и Шекеринска се фаворити“, тврдат функционери во партијата.
Се зборува дека меѓународниот фактор веќе дал поддршка за ваквата коалиција. Според калкулациите, Шекеринска важи за одличен промотор на земјава при евроатлантските интеграции, има воспоставено добри односи со угледни странски политичари и организации, високо котира и кај амбасадорската елита во земјава. Од друга страна, нејзиниот имиџ на политичар кој нема директна врска со теренските работи, треба да го надополни струмичкиот градоначалник, Зоран Заев, кој важи за „човек од народот“.
„Ќе имаме баланс со ВМРО-ДПМНЕ на секое поле, па дури и ќе бидеме подобри. Ќе добиеме искусно водство што ќе знае да води висока политика, но и што ќе знае да им угоди на граѓаните, да направи подобар живот за сите во Македонија. И странскиот фактор нема толку индолентно да стои настрана“, велат нашите извори.
Заев и Шекеринска вчера не сакаа да ги коментираат ваквите гласишта. Во СДСМ е договорено да се молчи околу претстојниот Конгрес, кој би требало да се одржи околу 20 мај. Подготовките се во тек, но информациите се држат во тајност со цел одредени (погрешно протолкувани) изјави да не создадат раздор. Минатата недела, струмичкиот градоначалник, кој е и потпретседател на партијата, во изјава за „Утрински“, најави промени во СДСМ.
„Бидете сигурни, во СДСМ ќе има кадровски, програмски и организациски промени“, изјави Заев. Тој рече дека на Конгресот во мај ќе се направи сеопфатна анализа, но изрази сомнеж дали кадровските програми и новиот програмски концепт ќе бидат доволни за победа на следните избори доколку нив ги организира оваа Влада.
Како би функционирале Заев и Шекеринска? Нашите информации велат дека станува збор за копирање на американскиот концепт. Таму претседателот и потпретседателот, Барак Обама и Џо Бајден, работат како тим. Кандидатот за претседател уште пред почетокот на кампањата го соопштува името на својот потпретседател и тој практично е подготвен во секој момент да застане на чело на државата. Кај Заев и Шекеринска, се' уште не е јасно кој формално ќе биде лидер на партијата, но извесно е дека би се укинале сегашните три потпретседателски места.
Ќе се повлече или не Црвенковски, кој до пред локалните избори важеше за неприкосновен лидер и кој има најголемо влијание меѓу 700 делегати со право на глас на Конгресот? Извори од СДСМ тврдат дека од него, во најмала рака, ќе се очекува воздржаност и со тоа да го остави членството да ги одбере своите фаворити.
Некогашниот директор на Агенцијата за разузнавање и близок соработник на Црвенковски, Кире Наумов, јавно рече дека активно би се вклучил во трката за нов лидер само доколку се случи редефинирање на делегатската структура на Конгресот, највисокиот орган на партијата.
Според статутот, во Конгресот членуваат по еден делегат на определен број членови од општинските организации, претседателот на СДСМ, секретарот, членовите на Централниот и на Надзорниот одбор, претседателите на општинските организации, членовите на Градската организација на СДСМ - Скопје, претседателот на СДММ и координаторот на Клуб на жени, членовите на пратеничката група, министрите и замениците-министри избрани од листата на СДСМ, градоначалниците од редовите на партијата.
Членот на Централниот одбор на СДСМ, Есад Рахиќ, кој своевремено беше исклучен од партијата, во изјава за „Утрински“ рече дека можеби поправедно би било други делегати да го избираат евентуалниот нов лидер, но напоменува дека не го дозволува тоа статутот на партијата.
Радмила Шекеринска е член на Централниот одбор на партијата. Беше лидер на СДСМ, но си замина по поразот на предвремените парламентарни избори во 2008 година. Таа го наследи Владо Бучковски, а место неа како в.д. претседател дојде Зоран Заев. Од 2009 година, односно по истекот на петгодишниот претседателски мандат на чело на државата, лидер на партијата е Бранко Црвенковски.
Блокот Шекеринска - Заев јавно проработи во пресрет на локалните избори, кои тие двајцата беа најгласни противници на одлуката за бојкот на локалните избори.