Шефот на Меѓународната агенција за енергија предупредува дека глобалната економија е пред голема закана - Канал 5

Свет

Шефот на Меѓународната агенција за енергија предупредува дека глобалната економија е пред голема закана

Шефот на Меѓународната агенција за енергија, Фатих Бирол, денеска изјави дека глобалната економија е соочена со „исклучително голема закана“ поради војната во Иран.

Шефот на Меѓународната агенција за енергија предупредува дека глобалната економија е пред голема закана

- Ниту една земја нема да остане имуна на ефектите од оваа криза доколку ситуацијата продолжи да се движи во овој правец – рече Бирол во австралискиот град Канбера.

Според него, кризата на Блискиот Исток има полоши последици за нафтата отколку двата нафтени шока во 70-тите години на минатиот век, а нејзините ефекти врз ситуацијата со гасот се полоши од последиците од руско-украинската војна.

- Ситуацијата е многу сериозна – предупреди Бирол и потсети дека нафтените кризи од 1973 и 1979 година доведоа до загуба на вкупно 10 милиони барели дневно, предизвикувајќи големи економски проблеми и рецесии ширум светот.

Тој укажа дека, сепак, денес се губат 11 милиони барели дневно, што е повеќе отколку за време на двата големи нафтени шока заедно.

Бирол наведе дека пазарите на гас, особено во Европа, по руската инвазија на Украина изгубиле околу 75 милијарди кубни метри, а досега, како резултат на оваа криза, е изгубено речиси двојно повеќе, односно околу 140 милијарди кубни метри. Тој додаде дека 40 енергетски објекти во девет земји ширум регионот се „тешко или многу тешко оштетени“.

- Кога станува збор за некои од виталните артерии на глобалната економија, како што се петрохемиските производи, ѓубривата, сулфурот, хелиумот, нивната трговија е прекината, што би имало сериозни последици по глобалната економија – рече тој.

Бирол информира дека Меѓународната агенција за енергија, со цел да ја ублажи кризата, пуштила на пазарот резерви од 400 милиони барели нафта, „што е историски настан“.

- Никогаш не сме пуштиле толку нафта на пазарите. Најважното решение за овој проблем е отворањето на Ормуската Теснина – порача тој.

Тој додаде дека се консултира со владите во Европа, Азија, Северна Америка и на Блискиот Исток за можноста за пуштање понатамошни резерви на нафта.

- Ќе видиме, ќе ги следиме пазарите. Ако биде неопходно, секако, ќе го сториме тоа, но ќе ги следиме и анализираме приликите и ќе го процениме пазарот во разговор со нашите земји членки – заклучи тој.

Тагови: Фатих Бирол

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ВМРО-ДПМНЕ: СДС е против секоја инвестиција што носи развој, не можат да се помират со фактот дека Македонија се движи напред

Додека СДС и Венко Филипче денес се обидуваат да го проблематизираат развојот на дата центрите, јавноста треба да ја види суштинската разлика меѓу нивната и политиката на ВМРО-ДПМНЕ.

ВМРО-ДПМНЕ: СДС е против секоја инвестиција што носи развој, не можат да се помират со фактот дека Македонија се движи напред

СДС ја гледаа Македонија низ призма на политики како развојот на индустријата со марихуана кои отвораа простор за интереси на тесни кругови, додека ВМРО-ДПМНЕ денес отвора можности за инвестиции во технологии и индустрии кои се дел од иднината на светската економија.

Дата центрите се токму таква можност.

Станува збор за современа индустрија која е тесно поврзана со дигитализацијата, вештачката интелигенција и развојот на новите технологии. Македонија не смее да остане надвор од овие процеси.

Наместо да ја препознае можноста, Филипче повторно избира да напаѓа и да шири паника. Очигледно е дека не може да се помири со фактот дека Македонија конечно се движи напред.

СДС зборува за потрошувачка на електрична енергија и вода како аргумент против развојот, притоа занемарувајќи дека денес постојат различни современи технологии и решенија за функционирање и ладење на дата центрите, во зависност од нивната намена и големина.

Исто така, Македонија денес функционира како пазарна економија, со јасно утврдени механизми за снабдување и плаќање на електричната енергија.

Затоа, наместо да се создава непотребна паника, потребно е да се гледа што може да добие државата.

Нови инвестиции, нови работни места, развој на ИТ-секторот, ангажирање на домашни компании и можност Македонија да стане дел од глобалната дигитална економија.

Владата предводена од ВМРО-ДПМНЕ нема да дозволи ниту еден проект да биде реализиран на штета на граѓаните, животната средина или природните ресурси. Сите конкретни инвестиции ќе ги исполнуваат законските и еколошките стандарди.

ВМРО-ДПМНЕ ќе продолжи да привлекува инвестиции, да отвора нови индустрии и да создава услови Македонија да биде конкурентна, модерна и технолошки развиена држава, се наведува во партиското соопштение.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Мртва трка на Исланд- опцијата против преговори со ЕУ премина во водство

Опцијата „не“ за започнување преговори за приклучување кон Европската Унија е водечка, покажаа новите резултати објавени од исландската јавна телевизија.

Мртва трка на Исланд- опцијата против преговори со ЕУ премина во водство

Опцијата „не“ за започнување преговори за приклучување кон Европската Унија е водечка, покажаа новите резултати објавени од исландската јавна телевизија, но многу малите разлики укажуваат дека конечниот исход од референдумот ќе биде познат дури откако ќе бидат преброени сите гласови.

По пребројувањето на 152.000 гласови, 50,1 процент од гласачите се против рестартирање на преговорите со Европската Унија, додека 49,9 проценти се „за“. Според првите нецелосни резултати, по пребројувањето на 87.000 гласови, опцијата „за“ беше во мало водство (51,2 проценти).

Што велат едните, а што другите?

Застапниците на кампањата „за“ нагласија дека приклучувањето кон ЕУ ќе ги намали високите каматни стапки со кои Исланд се бори долго време и ќе ја зголеми безбедноста на земјата во свет потресен од руската агресија во Украина и реториката на Трамп за барање на најголемиот остров во светот, Гренланд.

Од друга страна, кампањата „против“ предупреди дека членството во ЕУ ќе го загрози суверенитетот на земјата, како и контролата врз риболовните подрачја кои играат клучна улога во исландската економија. Каматните стапки, риболовот и трошоците за живот беа во фокусот на кампањата за референдумот. Целосните резултати можеби нема да бидат достапни до пладне, соопштија изборните службеници.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Пукотница на забава во Швајцарија- има загинати и повредени (Вознемирувачко видео)

Во швајцарскиот град Арау, синоќа се случило пукање на рејв забава каде што се собрале околу 3.500 луѓе. 

Пукотница на забава во Швајцарија- има загинати и повредени (Вознемирувачко видео)

Според првичните информации, најмалку едно лице е убиено, а петмина се ранети, од кои некои потешко.

Напаѓачот или повеќе се во бегство, а полицијата спроведува обемна потрага, во која е вклучен и воен хеликоптер. Мотивите за нападот и точните околности сè уште се непознати, а граѓаните се повикуваат да ја избегнуваат областа.

Најмалку едно лице е убиено, петмина се ранети

„Според првите сознанија, ноќната пукање во областа Шахен во Арау резултираше со една смрт и петмина ранети, од кои некои потешко. Потрагата по сторителите, кои засега се непознати, е во тек“, објави кантоналната полиција на Ааргау, додавајќи дека „можните мотиви и точните околности на делото сè уште не се разјаснети“.

Големи области од градот Арау се блокирани, соопшти полицијата, и го зголемија своето присуство надвор од градот како мерка на претпазливост.

Сведок: Се скривме под диџејската маса

Една читателка му раскажа на Блик како нејзината пријателка од прва рака го видела нападот и се скрила под диџејската маса, додека друг очевидец од настанот рекол дека на почетокот помислил дека некој пали огномет.

Реткост во земја со многу оружје

Арау е мирен град со околу 22.000 жители и административен центар на кантонот Аргау, кој се наоѓа на север од Швајцарија, околу четириесет километри западно од Цирих.

Масовните пукотници и вооружените напади на јавни собири се исклучително ретки во Швајцарија, и покрај фактот дека земјата има една од највисоките стапки на поседување огнено оружје во Европа и светот поради нејзиниот систем на регрутација и традицијата на стрелаштво. Сепак, строгите закони за набавка и складирање на муниција го прават вооруженото насилство на улиците вистински преседан.

Најлошиот вооружен напад во поновата швајцарска историја се случи во септември 2001 година во Цуг, кога вооружен човек упадна во локалниот кантонален парламент и уби 14 политичари и функционери пред да се самоубие.

На забавата имало илјадници луѓе

Швајцарскиот весник „Блик“ објави дека истрелите биле испукани пред 3 часот наутро на „Арауер Рејв“, годишна техно забава која привлекла околу 3.500 луѓе на хиподромот во Арау помеѓу 15 часот во саботата и 2 часот наутро во неделата.

Инцидентот наводно „се случил на хиподромот“, изјави портпаролката на полицијата Ванеса Рамполд за весникот. Засега, полицијата може да потврди дека „биле испукани неколку истрели во голема група луѓе“, додаде таа.

Полицијата апелираше до посетителите и јавноста да им достават какви било видеа или фотографии што би можеле да помогнат во расветлувањето на околностите на овој напад.

Ги бараат напаѓачите со хеликоптер, мотивите се нејасни

Полицијата потврди дека потрагата по сторителот е во полн ек, но сè уште не е познато дали станува збор за еден или повеќе напаѓачи, како и кој точно отворил оган.

„Можните мотиви и точните околности на инцидентот сè уште се нејасни“, објави полицијата.

Голем број полицајци учествуваат во масовното пребарување и обезбедување на локацијата, а според извештаите на локалните медиуми, ангажиран е и воениот хеликоптер „Супер Пума“. Полицијата ги повика граѓаните строго да ја избегнуваат целата област, а поради безбедносната операција, блискиот градски базен беше затворен до понатамошно известување.

Објавено видео, се слушаат истрели

Швајцарскиот таблоид „Блик“ објави и видео испратено од читател, кое е снимено од покачена позиција и прикажува ноќни сцени од улицата додека во позадина одекнуваат неколку последователни истрели.

Тагови: Швајцарија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер