Во Македонска Каменица денеска се организираше шаховски настан, во чии рамки шахисти од градот и од регионот одиграа симултан натпревар со шаховскиот велемајстор, Влатко Богдановски, кој е седумкратен шампион на Македонија во шах и долгогодишен репрезентативец.

Настанот го организираше Шаховскиот клуб „Каменица Саса", чиј претседател Лазо Стаменковски пред присутните истакна дека е посебна чест за самиот шаховски клуб да биде домаќин на ваков настан.

-Ова е би рекол историја за Македонска Каменица, бидејќи кај нас првпат гостува македонски велемајстор кој игра за Алкалоид, повеќекратен првак на Македонија и учесник на Меѓународни натпревари. Со овој настан целта моја како претседател и како шаховски клуб ни е да го унапредиме шахот како спорт, пред се да обрнеме внимание на младите кадри, истакна Стаменковски пред присутните.

За шаховскиот велемајстор Богдановски големо е задоволството да се одигра симултанка во градот за кој слушнал многу убави работи за клубот и шахистите од овој град.

-Со задоволство ја прифатив поканата, за прв пат сум како гостин, стварно ми е драго, стварно ми е чест, би сакал оваа соработка да продолжи. Навистина сум слушал добри зборови за овој клуб во последните години за Каменица Саса, за Втора Лига, значи многу добри зборови од колегите имам слушано и стварно ми беше драго да ја прифатам поканата за оваа идеја, рече Богдановски.

На настанот присуствуваше и каменичкиот градоначалник Димчо Атанасовски, кој рече дека Општината ќе продолжи со поддршката за младите шахисти.

-Чест ни е што имаме можност да бидеме присутни на овој настан на кој ги стимулирате нашите млади. Исто така сакам да се заблагодарам не само на претседателот, туку и на целиот шаховски клуб што го возобновија овој спорт во нашата општина, а ние како општина досега го помагаме овој спорт финансиски и се надевам ќе продолжиме така и во иднина, рече Атанасовски.

Шаховскиот клуб Каменица Саса е формиран во 2018 година, клубот е член на Агенцијата за млади и спорт и Шаховската Федерација на Македонија и има обезбедено право за настап на сите натпревари кои се организираат под нивна капа. Оваа година клубот учествуваше и на квалификациите за влез во Втора лига.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.