Четириесет и едногодишната пациентка која според лекарите е со најтешка форма на цистична фиброза за разлика од останатите, а функцијата на белите дробови и е само 23% е хоспитализирана на Пулмологија и веќе ја прима првата доза на лекот „Трикафта“, потврдуваат од Клиниката. Нејзината состојба се влошила уште викендов, па вчера во 4 часот по полноќ со Итна помош била донесена во болница, сепак лекарите очекуваат од лекот да и се подобри состојбата, која ја оценуваат како ризична.
Уште една пациентка со потешка состојба за која беа набавени лекови, но поради ограничените капацитети на болницата, таа ќе биде третирана во наредните денови.
Во меѓувреме, најмладото осумгодишно дете за кое има „Трикафта“, после само три дена од примање на лекот во болничкиот кревет на Детска болница, веднаш има подобрување, вели Директорката на Клиниката.
Поради пониската цена од очекуваната, Детската клиника побара од ФЗО со останатите пари да се набават терапии за уште четворица пациенти, но засега не добиле одговор од Фондот. Во меѓувреме, останатите пациенти ги чекаат законските измени што треба да отворат можност државата дирекно да преговара со производителот на „Трикафта“. Дел лекарите што го советуваат Премиерот велат дека идејата е за краток рок да се заврши со собраниските процедури.
Во Македонија со ова ретко заболување има околу 130 пациенти, но не сите можат да го примаат лекот „Трикафта“, бидејќи не сите имаат предиспозиции за ваквата терапија.