Здравје

Се зголемува бројот на заболени од рак, раното дијагностицирање клучно за успешно лекување

Се зголемува бројот на заболени од рак. Раното дијагностицирање е примарна задача, но и имплементирањето на националните скриниг програми.

Со навремени прегледи ракот може да се дијагностицира во ран стадиум, кога е и поголема успешноста во лекувањето, истакна денеска претседателот на Здружението за борба против рак „Борка – за секој нов ден", Биба Додева на панел дискусијата во рамки на одбележувањето на 4 февруари, Светски ден за борба против рак.

Посочи дека се набавени мамографи и изрази надеж дека овој тренд на чекање по неколку месеци за снимање наскоро ќе се надмине.

– Почнато е функционирањето на работната група на Националниот регистар за канцер, првпат во Македонија. Оној момент кога ќе го имаме регистарот ќе можеме да ја знаеме точната статистика за бројот на заболени, рече Додева.

На панел дискусијата учествуваше и министерот за здравство Венко Филипче, кој рече дека годинава ќе се спроведе групната набавка на лекови која ќе опфати и цитостатици што досега не биле на позитивната листа. Појасни дека целта е да ги има во континуитет за сите пациенти со специфични малигни заболувања односно нова т.н. имунотерапија и очекуваат околу 40-тина нови молекули.

– Ги зајакнуваме капацитетите во смисла на поставување регистар за малигни болести, првпат во нашата земја, како за пациентите во болница, така и за пациенти на ниво на нивното место на живеење. Превенцијата е исклучително важна и во таа смисла почнуваме набавка на осум мамографи за јавно здравствени институции ширум земјата, со што значајно ќе го подобриме капацитетот за правење мамографија и програмата за превенција на ова заболување. Инвестиравме и во многу нови вакцини, а тоа е вакцината за ХПВ, а во следниот период ќе ја имаме и четиривалентната вакцина со што може да се превенира појава на карцином на грлото на матката, додаде Филипче.

Директорот на Клиниката за радиотерапија и онкологија, Нино Васев истакна дека минатата година била многу успешна за Клиниката, бидејќи била укината партиципацијата за малигни болни, но и поради набавката на лекови, која се надева ќе биде двегодишна и ќе нема пауза во примањето терапија која годинава ја зголемиле за над 30 нови лекови.

– Достапноста на тие лекови ќе биде континуирана. Имаме нови лекови за рак на бели дробови, на дојка, кои порано биле незамисливи и ќе ги има континуирано, додаде Васев.

Директорката на Клиниката за хематологија, Ирина Пановска-Ставридис рече дека биле реновирани капацитетите на Клиниката, потоа била набавена нова иновативна терапија за голем дел од пациентите со малигни хематолошки заболувања, а бил воведен и нов метод во македонското здравство – несродна трансплантација на матични хематопоетски клетки.

– По потпишувањето на меморандумот за соработка со Детската клиника беа отстранети правните пречки и Клиниката почна да дава услуги на несродна трансплантација и за пациенти помлади од 14 години, додаде Пановска-Ставридис.

Директорката на Клиниката за детски болести, Катерина Ставриќ посочи дека бил направен напредок во третманот и дијагностиката на деца со малигни заболувања, минатата година кадровски се зајакнале и недостигот на медицински сестри го решиле со вработување на осум медицински сестри на Хематоонколошкиот оддел, а имало и преземање психолог кој заедно со другиот мултидисциплинарен тим од Клиниката активно се вклучил во работата со децата и со родителите.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Метео

Утре променливо облачно време со температура до 19 степени

Времето утре ќе биде променливо облачно со повремени сончеви периоди, информираат од УХМР.

МАКСИМАЛНА ТЕМПЕРАТУРА

7 Ѓуриште, 9 Попова Шапка, 10 Струмица, 11 Крива Паланка, Лазарополе, Скопје – Зајчев Рид, 12 Крушево, Скопје – Петровец, Охрид, Прилеп, Тетово, Маврови Анови, 13 Битола, Штип, Претор, Демир Капија, Кавадарци, 14 Виница, Берово, Велес, Гевгелија.

ВРЕМЕТО ДЕНЕСКА И ДО КРАЈОТ НА ДЕНОТ

Времето денес беше променливо облачно со краткотрајни сончеви периоди. Дуваше слаб ветер од јужен правец. До крајот на денот во западните делови ќе има услови за повремен слаб дожд кои ќе продолжат во текот на ноќта.

ВРЕМЕТО УТРЕ

Променливо облачно со повремени сончеви периоди. Во западните делови ќе има услови за појава на слаби врнежи од дожд. По одделни котлини ќе има услови за појава на магла. Ќе дува слаб до умерен ветер од јужен правец. Минималната температура ќе биде во интервал од 5 до 10, а максималната ќе достигне од 14 до 19 степени.

Во Скопје, променливо облачно со услови за појава на слаб локален дожд. Ќе дува слаб ветер од променлив правец. Минималната температура ќе се спушти до 10, а максималната ќе достигне до 17 степени.

ВРЕМЕТО ВО НАРЕДНИТЕ ДЕНОВИ

До почетокот на следната седмица времето ќе биде променливо облачно со повремени локални врнежи од дожд. Од сабота поради продор на постудена воздушна маса од север температурите ќе бидат во опаѓање. Ќе дува слаб до умерен, а во петок силен повремено многу силен ветер од јужен правец.

Свет

Литванија ќе го задржи руското и белоруското жито

Литванија ќе ги задржи пратките со жито што Русија и Белорусија ги извезуваат преку пристаништето Клаипеда, сè додека не се утврди нивното потекло, изјави за Ројтерс претставник на литванското Министерство за земјоделство.

Тој додаде дека оваа регулатива би можела да доведе до одложување на извозот во траење од неколку месеци. Уште од септември, Литванија врши проверки на пратките со жито од Русија и Белорусија, поради сомневања дека дел од житото всушност потекнува од украински територии кои се под руска окупација.

Почнувајќи од следната недела, пченицата, 'ржта, семките од сончоглед и пченката што пристигнуваат во балтичкото пристаниште Клаипеда од Русија и Белорусија – а се наменети за други земји – нема да поминат царинска процедура сè додека не заврши проверката на нивното потекло, изјави за Ројтерс неименуван литвански функционер.

„Процесот на проверка може да трае два месеци или подолго“, истакна функционерот, додавајќи дека секоја пратка за која ќе се утврди дека има лажно пријавено потекло, ќе биде или вратена или уништена. Бидејќи Литванија не располага со лабораторија способна за вршење на вакви анализи, процесот трае подолго, бидејќи тестирањето мора да се изврши во странство.

ЕУ воведува санкции за увоз на руско жито

Извозниците ќе ги сносат сите трошоци поврзани со складирањето, тестирањето, враќањето или уништувањето на житото, додаде литванскиот функционер. Иако ЕУ воведе санкции за увоз на руско жито, неговиот транзит кон други дестинации останува дозволен. Официјална Москва не даде коментар за правниот статус на житото што потекнува од региони кои меѓународната заедница ги признава како украинска територија.

Од средината на август, испораките на руска и украинска пченица од пристаништата на Азовското и Црното Море се речиси целосно запрени, по нападите врз бродови и терминали. Во такви околности, Русија почна да ги менува своите извозни рути, при што е забележан значителен пораст на пратките со жито преку Каспиското Море.

Руските трговци ја пренасочија пченицата наменета за извоз главно кон балтичките пристаништа, преку кои во септември поминале 1,2 милиони тони – што претставува над 60 отсто од вкупниот руски извоз на жито по морски пат. Според Ројтерс, компаниите пренамениле терминали што претходно се користеле за утовар на ѓубрива и јаглен, прилагодувајќи ги за транспорт на жито.

Русија се свртува кон арктичката поморска рута

Во меѓувреме, балтичките земји се обидуваат да го запрат транзитот на руско и белоруско жито преку нивните пристаништа. Во октомври, Естонија, Латвија и Литванија предложија забрана на ниво на целата ЕУ, при што Естонија веќе воведе свои ограничувања.

Од своја страна, Русија – за првпат – се сврте кон арктичката поморска рута за испорака на пченица на меѓународните пазари. Кон крајот на октомври, комерцијалното пристаниште во Мурманск и компанијата за трговија со жито „Деметра Холдинг“ објавија дека е во тек утовар на 3.400 тони жито од „клучни земјоделски региони“.

Мурманск се наоѓа во заливот Кола во Баренцовото Море, неговото пристаниште останува без мраз, иако лежи 200 километри северно од Арктичкиот круг. Тоа е едно од најважните пристаништа во северна Русија, служи како матично пристаниште за рибарска флота и мразокршачи, а се наоѓа на западниот крај на Северната морска рута.

Кој увезува најмногу руско жито?

Податоците од консултантската фирма „ПроЗерно“ покажуваат дека, во периодот од почетокот на новата земјоделска сезона во јули до октомври, Иран бил најголемиот увозник на руско жито, со вкупно 1,716 милиони тони – кои главно се состојат од јачмен и пченка.

Египет увезол 1,35 милиони тони, а по него следува Азербејџан со 545.000 тони, според „ПроЗерно“. Според истите податоци, и Нигерија се наоѓа меѓу првите пет увозници, со 420.900 тони.

Извор: Индекс.хр

Тагови: жито

Македонија

МФ: Собранието го усвои Дополнетиот ребаланс на Буџетот за 2026

Обезбедуваме стабилност во Буџетот до крајот на годината и сигурност за граѓаните и стопанството.

Собранието денеска го усвои Дополнетиот ребаланс на Буџетот за 2026 година. Со Дополнетиот Ребаланс на Буџетот вкупните приходи се планирани на ниво од 374,2 милијарди денари или пониско за околу 5,3 милијарди денари на проекциите за 2026 година. Истовремено на исто ниво е направена надолна корекција на расходната страна, односно вкупните расходи се планирани на ниво од 420,5 милијарди денари. При тоа нивото на дефицитот во Буџетот останува на ниво од 46,3 милијарди денари.

Дополнетиот предлог ребаланс пред пратениците го образложи министерката за финансии Гордана Димитриеска-Кочоска која истакна дека приоритет на Владата е да ја зачува економската стабилност и да одговори на предизвиците поради продолжените глобални геополитички случувања. Оттука измените и дополнувањата на Буџетот се во насока на обезбедување стабилност во Буџетот до крајот на годината и сигурност за граѓаните и стопанството.

„Државната каса до крајот на годината е стабилна и е обезбедено финансирање на сите обврски – плати, пензии, исплата на социјални надоместоци, обврски кон стопанството, како и отплатата на долгови кои доспеваат. Тоа е суштината на одговорното управување со јавните финансии – да се реагира навреме кога околностите го бараат тоа, да се заштитат граѓаните и економијата и, пред сè, да се гарантира дека државата ги исполнува своите обврски“, рече министерката.

На расходната страна надолната проекција се должи на намалување на расходите за стоки и услуги и субвенциите, а во насока на дисциплинирано трошење и обезбедување дополнителни средства за најранливите категории граѓани и здравствени услуги.

Со ребалансот се обезбедени дополнителни 3,7 милијарди денари за социјални трансфери, од кои 1,4 милијарди денари за социјални надоместоц, и дополнителни 887 милиони денари за здравствена заштита. За Министерството за социјална политика, демографија и млади се обезбедуваат дополнителни 1,8 милијарди денари за ранливи категории, социјална помош, народни кујни и социјални услуги. Исто така дополнителни 600 милиони денари за редовна и навремена исплата на породилните надоместоци.

Капиталните расходи се проектирни на 40,1 милијарда денари со кои се продолжува со вложувања во одбраната, патната и железничката инфраструктура, комуналната инфраструктура, животната средина, енергетската ефикасност, образованието, детската и социјалната заштита, земјоделството и локалната инфраструктура. Исто така продолжува и финансиската поддршка за општините и капиталните инфраструктурни проекти на локално ниво.

Тагови: МФ