Во Истанбул денеска треба да се одржат тројни средби на претставници на Турците, Американците и Русите од една страна, како и на Турците, Американците и Украинците од друга страна, јавија синоќа извори блиски до турското Министерство за надворешни работи.

„Уште една рунда состаноци ќе се одржи утре во различни формати. На дневен ред се трипартитни преговори на САД, Украина и Турција, како и Русија, Украина и Турција. Не е сигурно дали состанокот ќе се одржи во четиристран формат (САД, Русија, Украина, Турција)“, додадоа истите извори.

Украинскиот претседател Володимир Зеленски синоќа испрати украинска делегација во Истанбул на преговори со Русите, предводена од министерот за одбрана Рустем Умеров.

Меѓутоа, рускиот претседател Владимир Путин, кој ги предложи директните преговори меѓу Русија и Украина, не дојде и дури вчера објави дека руската делегација ќе ја предводи неговиот помошник Владимир Медински, што предизвика незадоволство и кај Украина и кај САД.

Претседателот на Европскиот совет, Антонио Кошта, доцна синоќа, пред неформалната вечера што ја приреди за учесниците на Самитот на Европската политичка заедница во Тирана од Западен Балкан, на платформата Х објави дека има нов моментум во проширувањето на Европската унија.

„Понатамошните напори за напредок кон пристапување мора да бидат водени од фундаментални принципи: доследност и доверба“.

„Доследност - од страна на ЕУ во одржувањето на проширувањето на врвот на својата политичка агенда. И доследност од страна на партнерите во усогласувањето со нашите вредности и спроведувањето реформи. Доверба - ова може да се изгради само преку отворен дијалог. Внатрешно, меѓу партнерите во регионот и со институциите на ЕУ и земјите-членки“, напиша Кошта

Судот се уште нема одлучувано по останатите предлози на обвинителство за 19 лица, во врска со трагедијата во дискотеката „Пулс“ во Кочани. Портпаролот на основниот суд Кочани во изјава за МИА информира дека судија на претходна постапка одлучувал по предлогот за бектеши, додека за другите се чека делегирање на член од Кривичен совет и да се произнесат адвокатите по предлозите. Државното јавно обвинителство претходно, соопшти дека до судот во Кочани освен предлогот за замена на изречената мерка „притвор“ со „куќен притвор“ за две лица, доставен е предлог и за продолжување на претходно определени мерки притвор и куќен притвор за 18 лица.