Од 120 до 160 денари за еден килограм, вака се продаваат уметничките бисти на македонските великани, дејци и хероини, како што се оние на Ѓорѓија Пулевски, Круме Кепески, Невена Георгиева-Дуња, Вера Циривири Трена, вели уметникот Димитар Филиповски, академски вајар кој се бави со лиење на склуптури во бронза, како оставен аманет и љубов од татко му и дедо му.

Филиповски, кој инаку е и автор на поголем број на скулптури ширум Македонија вели дека не смее да се дозволи уметноста да завршува во отпад, да се продава „пошто-зошто“ и државата мора да ја заштити, со закон кој ќе предвидува драконски казни, и до 10 години затвор. Тој смета дека така ќе се превенираат кражбите на скапите бисти кои сега исчезнуваат од улилишни дворови, паркови и објекти среде Центар, но и од гробишта.

-Штетата која ја нанесуваат е навистина сериозно висока сума на пари, а откупот во отпадите, е, видете, се откупува по некоја цена од 150, 160 денари за килограм. Кога ќе им ги понудат овие уметнички дела, бисти, пред се, дури им нудат помала откупна цена од 120 денари, пониска од онаа вообичаената, бидејќи знаат дека се крадени. Треба превенција, бидејќи мора на тој начин да се делува, мојот предлог е да биде една буквално драконска казна, бидејќи само така ќе ги одвратиме од намерата,- Димитар Филиповски – Скулптор.

Според Филиповски, дополнително може да се забрани откупот на метали, како што државата направи пред околу дванаесетина години, бидејќи во текот на првата половина од годинава, полициските билтени изобилуваа со информации за кражби на бисти и споменици, дури и од централното подрачје на градот. Една од највпечатливите беше онаа на Споменикот на децата бегалци од егејот, кој се наоѓа во паркот „Жена борец“, спроти Собранието. Откорнат беше релјефот, мотив на мајка со три деца, а украдени беа и буквите од натписот „Татковината копнеж на прогонетите“.

-Внимавајте, тоа е наспроти Собранието, споменик кој што физички за да го одвојат од постаментот и да го отстранат, треба тројца или четворица сериозно силни мажи, нема друг начин. Тоа да помине среде Центар каде што има и камери и се, не ми е јасно, до која мера можеби и службите спијат. А за гробиштата во Бутел, тоа е една посебна приказна. Мене лично ми се случува, бистата на дедо ми од неговиот гроб, дело на Боро Митриќески е украдена. Кога појдов таму да разговарам во таа една куќичка кај што има обезбедување, мене човекот ми рече, знаете како, украдени се уште 50, 60 бисти, меѓутоа никој не смее да збори,- Димитар Филиповски – Скулптор.

На прашањата на Канал 5, колку бисти годинава „исчезнале“ од гробиштата и што се презема за да не се случуваат кражби, како и каде е нивната одговорност за надомест на штета, од АД „Бутел“, не одговорија. Од нивната ПР служба во телефонски разговор ни кажаа дека официјални информации не давале во недела и посочија оти немаат многу што да додадат околу оваа тема, бидејќи била актуелна пред неколку месеци.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.