Поранешниот британски премиер Борис Џонсон предложи да се прекине продажбата на возила со фосилни горива до 2030 година, а најновите извештаи сугерираат дека неговиот наследник Риши Сунак е склон да го одложи воведувањето на забраната до 2035 година.

Актуелниот премиер ја објавил одлуката за одложување на воведувањето на забраната до датумот (2035 година) кој претходно го договорија членките на Европската унија. „Ќе ја олесниме транзицијата кон електрични возила. Сè уште ќе можете да купувате автомобили и комбиња на бензин и дизел до 2035 година“, рече Сунак во говорот. „Дури и после тоа, сепак ќе можете да ги купувате и продавате користените.“

Одложувањето е еден од неколкуте начини на кои Сунак и неговата влада, наводно, размислуваат да ги намалат претходните климатски ветувања, вклучително и постигнување нулта емисија до 2050 година.

Сунак веќе даде индикација и најави одложување: „Горд сум што Британија е лидер во светот во однос на климатските промени. Посветени сме на нето нулта до 2050 година и на договорите што ги направивме на меѓународно ниво - но тоа ќе го направиме на подобар, попропорционален начин“. Тој посочи дека владите „не биле искрени за трошоците и отстапките“ на водечките зелени политики.

Се разбира, тука е и прашањето за автомобилската индустрија, која, и покрај падот по Брегзит, е еден од главните столбови на „островската“ економија. Дури и производителите ја доведуваат во прашање можноста за воведување забрана во 2035 година, а камоли во 2030 година.

Управниот директор на Фолксваген во Велика Британија, Алекс Смит, предупреди дека продажбата на електрични автомобили стагнира, посочувајќи дека истражувањето на 2.375 британски возачи покажало дека само 2 отсто од возачите би купиле електричен автомобил во блиска иднина.

Смит ја споменува повисоката цена во однос на автомобилите на дизел и бензин како најголем проблем за популаризацијата на електричните автомобили, а постепеното намалување на субвенциите дополнително ја влошува работата. Во Велика Британија нема директни стимулации за електричните возила, а од 2025 година сопствениците ќе мора да плаќаат и патарина.

„Дејли мејл“ нагласува дека електричните автомобили во просек се поскапи за 10.000 фунти, осигурувањето пораснало за 60 отсто, а полнењето гориво на бензинските пумпи е и до 20 отсто поскапо од бензинот и дизелот. Затоа, не треба да чуди што уделот на приватните купувачи на електрични возила падна од минатогодишните 36 на сегашните 24 проценти.