СДСМ тврди дека премиерот Христијан Мицкоски и ВМРО-ДПМНЕ ангажирале странска приватна разузнавачка компанија за да го следат партискиот лидер Венко Филипче и нивни функционери. Според партијата, станува збор за израелската компанија „Блек кјуб“, која ја опишуваат како „приватен Мосад“ и која, како што наведуваат, е позната по активности за собирање информации, следење и спроведување операции насочени кон политички противници.

Од СДСМ наведуваат дека оваа компанија во минатото била поврзувана со активности во други земји, вклучително и во Унгарија и Словенија, каде, според нив, била користена за пресметка со политички неистомисленици. СДСМ тврди дека тим на разузнавачката агенција престојувал во Скопје и остварил средби со лица блиски до владејачката структура.

-Тимот на ‘Блек кјуб‘ неодамна престојувал во Скопје и во еден ексклузивен хотел имале состанок со заштитниците на криминалната група ВМРО. На состанокот присуствувал и еден бизнисмен, многу близок до ВМРО, кој треба да го финансира ангажманот на оваа приватна израелска компанија. Целта е јасна – да се следи опозицијата, да се собираат информации и да се фабрикуваат афери за да се дискредитира СДСМ. Ова се случува токму сега, кога ВМРО е во слободен пад, веќе изгуби над 150 000 гласа“, велат од опозициската партија.

Од ВМРО-ДПМНЕ ги демантираат ваквите наводи. Според владејачката партија СДСМ и Филипче живеат во свет на лаги, конструкции и политичка заблуда.

- СДС и Филипче не ја разбраа пораката од граѓаните на парламентарните и претседателските избори, кога освоија само 18 пратеника, најмалку во историјата. СДС и Филипче не ја разбраа пораката од граѓаните на локалните избори минатата година, кога освоија само 130 илјади гласови. Тие тоа го претставија како огромен успех. Во нивниот свет на илузии, тие се претставуваат како успешни, иако нивната поддршка е сведена на минимум. Време е СДС и Филипче да се разбудат од оваа политичка фантазија и конечно да се соочат со реалноста, изјави Петрушевски од ВМРО-ДПМНЕ.

Вчера од СДСМ поднесоа кривична пријава против премиерот Мицкоски и испратија писмо до ЕУ, за како што велат кршење на Уставот и законите по неговата изјава дека имал чувство дека ќе се гонат поранешни високи функционери од опозицијата.

Со реакција за политички притисок од власта се огласи и екс градоначалникот на Сарај Блерим Беџети од ДУИ откако МВР вчера поднесе кривична пријава против него и уште едно службено лице вработено во Град Скопје, за злоупотреба на службената положба и овластување „Вчера Мицкоски имал „чувство“ дека ќе има кривични пријави. Денес, Министерството за внатрешни работи го реализира тоа „чувство“. Случајност? Не. Ова е чист политички притисок“, објави синоќа Беџети на социјалните мрежи.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.